မေ ၂၅၊၂၀၂၅။ဇေအောင်/People’s Spring
စစ်ကိုင်းတိုင်း၊ မုံရွာမြို့မှာ မိုးများပြီး ရေကြီး၊ရေလျှံလို့ ရပ်ကွက်တွေက နေအိမ်တွေအတွင်း ရေဝင်နေပါတယ်။
မနေ့က မေလ ၂၄ရက်ကနေ ဒီကနေ့ မနက်ပိုင်းအထိ မုံရွာမြို့မှာ မိုးသည်းထန်စွာ ရွာသွန်းခဲ့တာကြောင့် မုံရွာမြို့ပေါ်က ရုံးကြီးရပ်၊ ဘုန်းစိုးရပ်၊ ချမ်းမြဝတီရပ်၊ မြဝတီရပ်၊ ရန်ကင်းရပ်၊ ရုံးကြီးရပ်၊ မုံရွာတောင်ရပ် စတဲ့ရပ်ကွက်တွေအပါအဝင် ရပ်ကွက်အများအပြားက နေအိမ်တွေအထဲ ရေဝင်ခဲ့တယ်လို့ ဒေသခံတွေက ပြောပါတယ်။
“မနှစ်က သုံးလေးရက်ရွာမှ တက်တာ။ ဒီနှစ်က တခါရွာတခါတက်တာ။”လို့ ဒေသခံတစ်ဦးက ပြောပါတယ်။
Public Service Announcement
ရုတ်တရက်ရေတွေဝင်လာခဲ့တာကြောင့် နေအိမ်တွေက လျှပ်စစ်ပစ္စည်းတွေ ရေဝင်ပျက်စီးခဲ့တယ်လို့ ရပ်ကွက်ခံတွေက ပြောပါတယ်။ မိုးများတာအပြင် ရေမြောင်းတွေ ရေမဆင်းတာ၊ ချောင်းရေတွေလျှံတာတွေကြောင့်ပါ ရေကြီးခဲ့တာလို့ မုံရွာမြို့ခံတွေက ဆိုပါတယ်။
“အခုက စည်ပင်တွေက လူကြီးလမ်းကြောင်း ရှိမယ့်နေရာလောက် အလုပ်လုပ်ကြတော့တာ။ မြောင်းတွေလည်းအကုန်ပိတ်ဆို့နေတာ”လို့ မုံရွာမြို့ခံတစ်ဦးက ပြောပါတယ်။
အမျိုးသားညီညွတ်ရေးအစိုးရရဲ့ လူသားချင်းစာနာထောက်ထားရေးနဲ့ ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနကတော့ ဘင်္ဂလားပင်လယ်အော်နဲ့ ကပ္ပလီပင်လယ်ပြင်တို့မှာ မုတ်သုံလေအားကောင်းနေတာကြောင့် မြန်မာနိုင်ငံတဝှမ်းလုံး နေရာစိပ်စိပ်မှ နေရာအနှံ့အပြား မိုးထစ်ချုန်းရွာနိုင်ကြောင်း၊ ကချင်ပြည်နယ်၊ ချင်းပြည်နယ်၊ ရှမ်းပြည်နယ်မြောက်ပိုင်း၊ စစ်ကိုင်းတိုင်းအထက်ပိုင်း၊ မန္တလေးတိုင်း၊ မကွေးတိုင်း၊ တနင်္သာရီတိုင်းနဲ့ ရန်ကုန်တိုင်းတို့မှာ နေရာကွက်ပြီး မိုးကြီးနိုင်ပြီး တချို့နေရာတွေမှာ ရေကြီးရေလျှံနိုင်တယ်လို့ ပြီးခဲ့တဲ့ ၂၃ရက်က သတိပေးခဲ့ပါတယ်။
လာမယ့် မေလ ၂၇ရက်မှာ ဘင်္ဂလားပင်လယ်အော်အနောက်အလယ်ပိုင်းမှာ လေဖိအားနည်းရပ်ဝန်းတစ်ခုဖြစ်ပေါ်လာနိုင်ခြေရှိပြီး အဲဒီနေ့ကနေ နောက်ထပ် ၄၈နာရီအတွင်း ပိုမိုအားကောင်းလာနိုင်တယ်လို့ ဆိုပါတယ်။
