ဖူးခက်ကျွန်းမှာ သောင်တင်ရာက နောက်ဆက်တွဲ နစ်မြုပ်သွားတဲ့ မြန်မာ စက်လှေကြောင့် ရေအောက် သန္တာကျောက်တန်းတွေနဲ့ ဂေဟစနစ် ထိခိုက်ခဲ့မှုအတွက် ဘတ် ၁၂ သန်းထက်မနည်း နစ်နာကြေး တောင်းဆိုဖို့ ထိုင်းအာဏာပိုင်တွေက စီစဉ်နေပါတယ်။
MV Ayar Linn ရေယာဉ်ဟာ ဖူးခက်ရဲ့ မူခိုဆူရင် အမျိုးသား သဘာဝဥယျာဉ်အဖြစ် သတ်မှတ်ထားရာ ရေပြင်မှာ ဇွန်လ ၁ ရက်နေ့က သောင်တင်ပြီး နစ်မြုပ်သွားခဲ့တာ ဖြစ်ပါတယ်။ ရေယာဉ် နစ်မြုပ်မှုကြောင့် ၁၅၀ စတုရန်း မီတာလောက် အကျယ်အဝန်းရှိတဲ့ သန္တာကျောက်တန်းတွေ ပျက်စီးခဲ့တယ်လို့ ဆိုပါတယ်။
နစ်မြုပ်ခဲ့တဲ့ ရေယာဉ်ပေါ်မှာ လူသုံးကုန် ပစ္စည်းအမျိုးအစားတချို့ တင်ဆောင်လာပြီး ဒီဇယ်ဆီပုံးတွေကတော့ ယိုစိမ့်မှု မရှိသေးဘူးလို့ အဲဒီနေရာမှာ ရှင်းလင်းရေး လုပ်ဆောင်နေတဲ့ ထိုင်းရေငုပ်သမားတွေက ပြောပါတယ်။ အာဏာပိုင်တွေက ဘိလပ်မြေအိတ် ၃၀၀၀ ကျော်ကြောင့် ပတ်ဝန်းကျင် ညစ်နွမ်းမှုတွေ ဖြစ်မှာကိုလည်း စိုးရိမ်နေပါတယ်။
ရေယာဉ်ရော၊ တင်ဆောင်လာတဲ့ ကုန်စည်တွေကိုပါ ဆယ်ယူဖယ်ရှားဖို့ ကြိုးစားနေပေမယ့်လည်း ရာသီဥတု ကြမ်းတမ်း ပြင်းထန်မှုတွေကြောင့် အခက်အခဲတွေ ကြုံနေရပါတယ်။ စက်လှေရဲ့ ဆီတိုင်ကီထဲက ဆီတွေကိုတော့ မယိုစိမ့်ခင်မှာ စုပ်ထုတ်နိုင်ခဲ့ပြီး ဖြစ်တယ်လို့ သိရပါတယ်။
Public Service Announcement
သန္တာကျောက်တန်းတွေ ထိခိုက်ပျက်စီးမှုဟာ လှေရဲ့ ကိုယ်ထည် အောက်ဖက်မှာ အဓိက များပြားပြီး အပြာရောင် သန္တာကျောက် အမျိုးအစား တစ်ခုဟာ အဆိုးဆုံး ထိခိုက်မှုတွေ ကြုံခဲ့ရတယ်လို့ ဆိုပါတယ်။ စုစုပေါင်း သန္တာကျောက်တန်း အပျက်အစီး ပမာဏရဲ့ ၈၀ ရာခိုင်နှုန်းဟာ အပြာရောင် သန္တာကျောက်တွေပါ။
ရေယာဉ်နစ်မြုပ်မှုမှာ စုစုပေါင်း သန္တာကျောက် အမျိုးအစား ၆ ခုလောက် ထိခိုက်မှုတွေ ခံခဲ့ရတယ်လို့လည်း သဘာဝ ပတ်ဝန်းကျင် ထိန်းသိမ်းရေး ပညာရှင်တွေက မှတ်ချက်ပေးထားပါတယ်။
ကိုးကား: Nation
