ဇွန်-၂၂၊၂၀၂၅။ဇော်ရမ်း/People’s Spring
ဒုဗိုလ်မှူးကြီးအပါအဝင်စစ်ကောင်စီအရာရှိလေးဦးသေဆုံးခဲ့သည့်မင်းလှမြို့နယ်အတွင်း စစ်တပ်က အင်အား ၈၀၀ခန့်ဖြင့် စစ်ကြောင်းထိုးလာပြီး သေဆုံးခဲ့သည့် ဗိုလ်မှူးကို စစ်ကောင်စီက ရာထူးတိုးပေးလိုက်သည်ဟုသတင်းရရှိသည်။
ပဲခူးတိုင်း၊မင်းလှမြို့နယ်၊ရန်ကုန်-ပြည်လမ်းပိုင်းအပါအဝင်နေရာအချို့၌ ဇွန်လ၁၆ရက်နှင့် ၁၇ရက်က တိုက်ပွဲများအပြင်းအထန်ဖြစ်ခဲ့ပြီး စစ်ကောင်စီမှ အရာရှိအချို့အပါအဝင် ၂၀ကျော်သေဆုံးကြောင်း သာယာဝတီခရိုင် အမှတ်(၃)တပ်ရင်း ၊P2 3803က သတင်းထုတ်ပြန်ခဲ့သည်။
သေဆုံးသူများတွင် သာယာဝတီခရိုင်စီမံအုပ်ချုပ်ရေးအဖွဲ့ဝင်ဒုတိယဗိုလ်မှူးကြီးဇော်မျိုးဝင်း ၊ အုတ်ဖိုမြို့နယ် စီမံအုပ်ချုပ်ရေးအဖွဲ့ဝင်(၁)ဗိုလ်မှူးဖြိုးမင်းဦး ၊သာယာ၀တီခရိုင်ခရိုင်ရဲတပ်ဖွဲ့မှူး ဒုတိယရဲမှူးကြီး စိုးခိုင်၊ မင်းလှမြို့နယ် စီမံအုပ်ချုပ်ရေးအဖွဲ့ဝင်(၁) ဗိုလ်မှူးရန်နိုင်အောင်တို့ ပါဝင်ခဲ့သည်။
Public Service Announcement
” သေဆုံးသူတွေရဲ့ဆွမ်းသွပ်ကိုမင်းလှထွေအုပ်ရုံးမှာဒီနေ့ လုပ်မှာပါ။ဝန်ထမ်းတွေကြောက်နေကြလို့ ပရိတ်ရွတ်တာလို့လည်းကြားတယ်။ တစ်မြို့လုံး လုံခြုံရေးပတ်နေပါတယ်။ ရန်ကုန်-ပြည်လမ်းရဲ့ အရှေ့ဘက်ကရွာတွေကိုစစ်ကြောင်းထိုးနေတယ်” ဟု ဒေသခံတဦးကပြောသည်။
စစ်ကောင်စီဝါဒဖြန့်ချိရေးလူမှုကွန်ယက်များတွင် သေဆုံးခဲ့သောဗိုလ်မှူးရန်နိုင်အောင်အား ဒုတိယဗိုလ်မှူးကြီးရာထူးတိုးပေးထားပြီး ဆွမ်းသွပ်တရားပွဲကို ယနေ့ ပြုလုပ်မည်ဟုဖော်ပြထားကြသည်။
စစ်ကောင်စီအထိနာခဲ့သည့် ဇွန်လ ၁၆ရက်နှင့် ၁၇ရက်က စစ်ဆင်ရေးကို ပြည်သူ့ကာကွယ်ရေး တပ်မတော်၊ တောင်ပိုင်းတိုင်းစစ်ဒေသ၊ပဲခူးတိုင်းစစ်ဌာန၊ဗျူဟာ(၂၂)လက်အောက်ခံ တပ်ရင်းများဖြစ်သော သာယာဝတီခရိုင်အမှတ်(၃)တပ်ရင်း၊ သာယာဝတီခရိုင်အမှတ်(၁)တပ်ရင်း၏ တပ်ခွဲ(၆)/ဧရာညီနောင်PDF ၊ MDF (Special Force) နှင့် Asho Chin Defense Force(ACDF) မဟာမိတ် တပ်များပူးပေါင်းတိုက်ခိုက်ခဲ့ခြင်းဟုသိရသည်။
ဇွန်လ ၂၂ ရက်နေ့စစ်ရေးအခြေအနေမှာ စစ်တပ်၏စစ်ကြောင်းသုံးကြောင်းသည် ယခင်ရက်က တိုက်ပွဲဖြစ်ခဲ့သည့် ကျေးရွာများဘက်ကို စစ်ကြောင်းထိုးနေသည်ဟု သာယာဝတီခရိုင်အမှတ်(၃)တပ်ရင်း ၊P2 3803ထံမှ သတင်းရရှိသည်။
ထိုအပြင် ဇွန်လ ၁၈ရက်နှင့် ၁၉ရက်တို့တွင်လည်း တိုက်ပွဲပြင်းထန်ခဲ့ပြီး စစ်ကောင်စီဘက်မှ သေဆုံးထိခိုက်မှုများရှိခဲ့သလို ၊ တော်လှန်ရေးရဲဘော်အချို့လည်းကျဆုံးခဲ့သည်။ လက်ရှိတွင် ဒေသခံများ စစ်ဘေးရှောင်နေကြရသည်။
သာယာဝတီခရိုင်အတွင်းရှိပြည်သူများအနေဖြင့် စစ်ကောင်စီတပ်၊ ရဲစခန်း၊ထွေအုပ်ရုံး၊ ရဲကင်းစခန်း၊လမ်းပိုင်းကင်းစခန်းများအနီးဆိုင်ခန်းဖွင့်ဈေးရောင်းခြင်း၊အိမ်ဆောက်နေထိုင်ခြင်း ၊အချိန်ကြာမြင့်စွာရပ်တန့် စကားပြောခြင်းများမပြုလုပ်ကြပါရန်နှင့် ပြည်သူ့ကာကွယ်ရေးတပ်မတော် (PDF)မှ နယ်မြေလုံခြုံရေးအတွက် လိုအပ်၍ ထုတ်ပြန်သော ထုတ်ပြန်ချက်များကို နားလည်ပေး၍ ပူးပေါင်း ဆောင်ရွက်ပေးကြပါရန်လည်း သာယာဝတီခရိုင် အမှတ်(၃)တပ်ရင်းက ထုတ်ပြန်ထားသည်။
