“ဆန်အိတ်ဆို အပိုင်းလိုက်ဝယ်မရဘူး။ဝယ်လာရင် အသိမ်းခံရတယ်”
—ဒေသခံတဦး
ဇွန်-၂၂၊၂၀၂၅။မေရီ/People’s Spring
မန္တလေးတိုင်း၊ မြင်းခြံမြို့နယ်မြောက်ပိုင်း ရွာတွေက ပြည်သူတွေ မြို့ထဲဝင်ရင်စစ်တပ်က ထောက်ခံစာမပါဘဲ ဝင်ခွင့်မပေးဘူးလို့ ဒေသခံတွေက ပြောပါတယ်။
တိုက်ပွဲတွေ မကြာခဏ ဖြစ်ပွားပြီး စစ်ကောင်စီရဲ့ လေကြောင်းတိုက်ခိုက်မှု ခံနေရတဲ့ မြင်းခြံမြို့နယ်မြောက်ပိုင်း ရွာတွေက ပြည်သူတွေဟာ မြင်းခြံမြို့ထဲလာမယ်ဆိုရင် စစ်တပ်ဂိတ်တွေက ထောက်ခံစာမပါဘဲ ဝင်ခွင့်မပေးတော့ဘူးလို့ ဒေသခံတွေက ပြောပါတယ်။
“ထောက်ခံစာမပါရင်အကုန်ပြန်လှည့်ခိုင်းတာ။ အုပ်ကြီးမရှိတဲ့ရွာတွေကဆိုရင် ရှိတဲ့ရွာသွားလုပ်ခိုင်းတယ်။”လို့ ဒေသခံတဦးက ပြောပါတယ်။
Public Service Announcement
ဒါ့အပြင်စားသောက်ကုန်၊ဆေးဝါးနဲ့ အခြားကုန်ပစ္စည်းဝယ်ယူမှုကအစ ကန့်သတ်ခံထားရတယ်လို့ ဒေသခံတွေက ပြောပါတယ်။
“ဆန်အိတ်ဆို အပိုင်းလိုက်ဝယ်မရဘူး။ဝယ်လာရင် အသိမ်းခံရတယ်။”လို့အခြားဒေသခံတဦးကလည်း ပြောပါတယ်။
စစ်ကောင်စီဟာ သူတို့ကို တော်လှန်တိုက်ခိုက်မှုအားကောင်းတဲ့ ဒေသတွေကို ပိတ်ဆို့လေ့ရှိတာကြောင့် တော်လှန်ရေးအားကောင်းတဲ့ မြင်းခြံမြောက်ပိုင်းကို အခုလို တားမြစ်ကန့်သတ်တာတွေ ပြုလုပ်ခြင်းဖြစ်ကြောင်းဒေသခံတွေက ပြောပါတယ်။
ဇွန်လ (၂၂)ရက် နံနက် ၁နာရီခွဲခန့်ကလည်း မြင်းခြံမြို့နယ်၊မရိုးကုန်းရွာကို ဂျပ်ဖိုက်တာဖြင့် ဗုံးကြဲတိုက်ခိုက်ခံရပြီးအသက်(၈၀)ကျော်အဘိုးအိုနဲ့ အသက် (၄၀)ကျော်သမီးဖြစ်သူတို့ သေဆုံးခဲ့ပါသေးတယ်။
