မေလနှောင်းပိုင်း ပြင်းထန်တိုက်ပွဲများကြောင့် နေရပ်စွန့်ခွာထွက်ပြေးရသူ ၁၁၀,၀၀၀ ကျော်ရှိဟု ကုလထုတ်ပြန်

ဇွန်-၃၀၊ ၂၀၂၅။ ရဲခေါင်/People’s Spring

ပဲခူး၊ မကွေး၊ စစ်ကိုင်း၊ တနင်္သာရီ နှင့် ရှမ်းပြည်တောင်ပိုင်းတို့တွင် မေလနှောင်းပိုင်းကစ၍ တိုက်ပွဲများပိုပြင်းထန်လာကြောင်း ကုလသမဂ္ဂလူသားချင်းစာနာထောက်ထားမှုဆိုင်ရာ ညှိနှိုင်းရေးရုံး(UNOCHA) က ထုတ်ပြန်သည်။

ဇွန်လနောက်ဆုံးပတ်က ထုတ်ပြန်သည့် UNOCHA၏ အစီရင်ခံစာအရ မေလနှောင်းပိုင်း ပြင်းထန်လာသော တိုက်ပွဲများကြောင့် နေရပ်စွန့်ခွာထွက်ပြေးရသူ ၁၁၀,၀၀၀ ကျော်ရှိသည်ဟု ဆိုသည်။

အိုးအိမ်စွန့်ခွာထွက်ပြေးနေရသူများ၏ သွားလာမှုများသည် အတိအကျမရှိသဖြင့် အခြေအနေအလိုက်ပြောင်းလဲနေကြောင်း ဖော်ပြသည်။

Public Service Announcement

“ဒီလ အစက ဖယ်ခုံဘက်ကို စကစ တွေစစ် ကြောင်းထိုးလာလို့ စစ်ရှောင်နေရတာ လူဦးရေက လေးသောင်းထက်မနည်းဘူး။ ပြည်တွင်းကူညီမှုတစ်ခုတည်းနဲ့ကတော့ မလုံလောက်ဘူးလေ။ပြည်ပနိုင်ငံ တွေရော အထူးသဖြင့် UN အဖွဲ့တွေရဲ့ထိရောက်တဲ့အကူအညီတွေ ပိုလိုနေတယ်”ဟု ရှမ်းပြည်တောင်ပိုင်းရှိ စစ်ရှောင်အရေး ကူညီနေသူတစ်ဦးက လူထုနွေဦးသို့ ပြောသည်။

ပြင်းထန်နေဆဲ လက်နက်ကိုင်ပဋိပက္ခ၊ မုတ်သုံရာသီ ရေကြီး ရေလျှံခြင်းနှင့် မတ်လ ၂၈ ရက်နေ့ ငလျင်ဒဏ်၏ နောက်ဆက်တွဲ အကျိုးဆက်များကြောင့် မြန်မာနိုင်ငံရှိ လူသားချင်းစာနာမှုဆိုင်ရာ လိုအပ်ချက်များမှာ များသထက်များလာကြောင်း UNOCHA က အသိပေးသည်။

ထို့အပြင် နိုင်ငံတစ်ဝန်းတွင် ပြည်တွင်းနေရပ်စွန့်ခွာ လူဦးရေသည် ၃ ဒသမ ၅ သန်း ခန့်ရှိကြောင်း ခန့်မှန်းသည်။ သို့သော် စစ်ဘေးရှောင်များကိုကူညီနေသောအဖွဲ့အစည်းများက ကုလသမဂ္ဂ၏ စစ်ဘေးဒုက္ခသည်စာရင်းများမှာ မြေပြင်တွင် အမှန်တကယ်ရှိသူထက် များစွာနည်းပါးနေကြောင်း ပြောသည်။

မြန်မာနိုင်ငံ၌ အရပ်သား ကာကွယ်စောင့်ရှောက်ရေးဆိုင်ရာ စိုးရိမ်ဖွယ်ရာများမြင့်တက်လာခြင်းနှင့်အတူ ဖြစ်ပွားဆဲ ပဋိပက္ခများနှင့် လူသားချင်းစာနာမှုဆိုင်ရာ လိုအပ်ချက်များဖြင့်ဆက်လက်ရုန်းကန်နေရဆဲဖြစ်ကြောင်း ကုလအေဂျင်စီက ဖော်ပြထားသည်။