ဇွန်-၃၀၊၂၀၂၅။ရဲခေါင်/People’s Spring
ရှမ်းတောင် နှင့် ကရင်နီပြည်နယ် အစပ်ရှိ မိုးဗြဲမြို့အတွင်းသို့ စစ်ကောင်စီတပ်က အင်အားအဆမတန်သုံး၍ ထိုးဖောက်ဝင်ရောက်လာခြင်းကြောင့် ပြည်သူများအနေဖြင့် မိုးဗြဲမြို့ရှိအဓိက မိန်းလမ်းမကြီးအား လုံးဝ ဖြတ်သန်းသွားလာခြင်းမပြုရန်ရှမ်းတောင်ကရင်နီတပ်ပေါင်းစုက ယနေ့ညတွင်သတိပေးထုတ်ပြန်သည်။
အဓိကလမ်းမကြီးကို ပြည်သူများလုံးဝအသုံးမပြုရန် အပြင် မိုးဗြဲ မြို့အနီးနားရှိကျေးရွာလူထုအနေဖြင့် စစ်ရေးသတိဖြင့်သွားလာနေထိုင်ကြရန်လည်း တိုက်တွန်းထားသည်။
မိုးဗြဲ မြို့ကို ပြန်လည်းသိမ်းပိုက်နိုင်ရန်ထိုးစစ်ဆင်နေသော စစ်ကောင်စီကို ရှမ်းတောင်ကရင်နီတပ်ပေါင်းစုက လပေါင်းများစွာအပြင်းအထန်တိုက်ခိုက်ခုခံနေခြင်းဖြစ်သည်။ရှမ်းတောင် ကရင်နီတပ်ပေါင်းစုတွင် ကရင်နီအမျိုးသားများကာကွယ်ရေးတပ် -KNDF၊ DMO Local PDF၊ရှမ်းတောင်ဗျူဟာ ၁ ၊ မိုးဗြဲ Local PDF နှင့် ကရင်နီပြည် ပြည်သူ့လွတ် မြောက်ရေးတပ်မတော်- KPLA တို့ပါဝင်သည်။
Public Service Announcement
“မိုးဗြဲအခြေအနေကတော့နောက်ဆုံးအဆင့်မဟုတ်သေးပေမယ့် အဆုံးအဖြတ်ဖြစ်လာမယ့် အဆင့်ထိရောက်နေတယ်။စကစ က အင်အား ရာနဲ့ချီ ကို သုံးပြီးတက်လာတာ။လေယာဥ်တွေလည်းပါတယ်”ဟု မိုးဗြဲ မြို့ရှိစစ်ရေးသတင်းရင်းမြစ်က လူထုနွေဦးသို့ ပြောသည်။
ကရင်နီတပ်ပေါင်းစုက ၂၀၂၃ နှစ်ကုန်ပိုင်းတွင် ခမရ ၄၂၂ မှအပ မိုးဗြဲမြို့နှင့် မြို့ရှိစစ်တပ်စခန်းများကိုသိမ်းပိုက်ထိန်းချုပ်ခဲ့သည်။စစ်တပ်ကမြို့ကို ပြန်သိမ်းနိုင်ရန် စစ်ကောင်စီတပ်က ၂၀၂၄ ဒီဇင်ဘာလမှထိုးစစ်ဆင်နေခြင်းဖြစ်သည်။
မိုးဗြဲမြို့မြောက်ဘက်ခြမ်း ၏ နှစ်မိုင်ကျော်အကွာရှိ မြို့စောင့်တပ် ခမရ ၄၂၂ မှတဆင့် မြို့တွင်းသို့ဝင်ရောက်ရေးအတွက် စစ်ကောင်စီသည် အင်အား ၇၀၀ ထက်မနည်းအသုံးပြုလျက်ရှိကြောင်း ကရင်နီပူးပေါင်းတပ်တာဝန်ရှိသူများက ပြောထားသည်။
စစ်တပ်က လေကြောင်း၊မစ်ဇိုင်းဒုံးများ နှင့် ၁၂၀ မမ လက်နက် ကြီးများကို အများအပြားအသုံးပြုတိုက်ခိုက်ခဲ့ခြင်းဖြစ်သည်။ဇွန်လ ၁၄ ရက်နောက် ပိုင်းကစ၍ တိုက်ပွဲများမှာ ပို၍ပြင်းထန်ခဲ့သည်။
“မိုးဗြဲ မြို့ အပြင်ကို ဖယ်ခုံ အင်းအရှေ့ဘက်ခြမ်းမှာပါ စကစ နဲ့ PNO ပြည်သူ့စစ်ရဲ့ထိုးစစ်ကို တော် လှန်ရေးအင်အားစုတွေက ရင်ဆိုင်နေကြတယ်။စစ်မျက်နှာနှစ်ခုစလုံးမှာက စစ်ကောင်စီဘက်က အင်အား နှစ်ထောင်လောက်သုံးထားတယ်လို့ခန့်မှန်းရတယ်”ဟု ကရင်နီစစ်ဘက်သတင်းရင်းမြစ်က ပြောသည်။
တိုက်ပွဲ မဖြစ်ခဲ့စဥ်က လူဦးရေ နှစ်သောင်းကျော်နေထိုင် ခဲ့သော မိုးဗြဲ မြို့သည် နေပြည် တော်သို့ နာရီပိုင်းအတွင်းရောက်နိုင်သည့် ပင်လောင်း-ဖယ်ခုံ -(မိုးဗြဲ)-လွိုင်ကော် လမ်းပိုင်းပေါ်တွင်ရှိသည်။
