'/%3E%3C/svg%3E){kind=small}
ဇူလိုင်-၁၁၊၂၀၂၅။ဇော်ရမ်း/People’s Spring
ကချင်ပြည်နယ်၊ ဖားကန့်မြို့နယ်တွင် ကချင်လွတ်လပ်ရေး တပ်မ တော်(KIA)၊ကချင်ဒေသကာကွယ်ရေးတပ်(KPDF)ပူးပေါင်းတပ်နှင့် စစ်ကောင်စီတပ်တို့ ယနေ့ (ဇူလိုင် ၁၁ရက်)ဖြစ်ပွားခဲ့သော တိုက်ပွဲများအတွင်း စစ်ကောင်စီတပ် ထိခိုက်သေဆုံးမှုများကြောင်း မြေပြင်စစ်ရေးသတင်းရင်းမြစ်က ပြောသည်။
ယနေ့နံနက်က ဖြစ်ပွားသောတိုက်ပွဲအတွင်း စစ်ကောင်စီတပ်ဖွဲ့ဝင် ၁၀ဦးထက်မနည်းသေဆုံးခဲ့သလို နေ့လယ်ပိုင်းတွင်လည်း KIA၊KPDFက ပစ်ခတ်သည့်လက်နက်ကြီးကျည်သည် စစ်ကောင်စီတပ်၏ လက်နက်ခဲယမ်းများထားသည့်နေရာ ကျရောက်ပေါက်ကွဲပြီး အထိအခိုက်များပြားကြောင်း မြေပြင်စစ်ရေးသတင်းရင်းမြစ်ကပြောသည်။
အမှိုက်ပုံ ကျေးရွာပတ်ဝန်းကျင်တွင် တပ်စွဲထားသည့်စစ်ကောင်စီတပ်စစ်ကြောင်းကို KIA၊KPDFက တိုက်ခိုက်နေခြင်းဖြစ်ပြီး တိုက်ပွဲပြင်းထန်နေသည်။
Public Service Announcement
” မနက်က အမှိုက်ပုံရွာ ချင်းဘုရားကျောင်းအနီးမှာ တိုက်ပွဲအပြင်းအထန်ဖြစ်တယ်။ စစ်ကောင်စီဘက်က သေဆုံးတာ ၁၀ဦးမကဘူး။ဒဏ်ရာရတဲ့သူတွေကို ဆွဲပြေးတယ်။ တိုက်ပွဲက ဆက်ပြင်းထန်နေပြီး ဒီဘက်ကလက်နက်ကြီးနဲ့ပစ်တာက သူတို့ခဲယမ်းတွေစုပုံထားတဲ့နေရာကို ကျတယ်။ အဲဒီမှာထပ်ပေါက်ကွဲပြီး အထိအခိုက်များတယ်။ ဒါတွေက မျက်မြင်တွေပဲ”ဟု KPDFနှင့် နီးစပ်သူတစ်ဦးကပြောသည်။
အမှိုက်ပုံကျေးရွာသည် မူလက KIA၊KPDF နယ်မြေစိုးမိုးမှုရယူထားသည့်နေရာ ဖြစ်သည်။ ဖားကန့်ဒေသသ်ို့ ဝင်ရောက်လာသည့်စစ်ကောင်စီတပ် စစ်ကြောင်းက ဇွန်လကုန်ပိုင်းတွင် ပြန်လည်ထိုးစစ်ဆင်လာ၍ ဒေသခံများထွက်ပြေးခဲ့ကြရပြီး KIA၊KPDFကလည်း ယာယီဆုတ်ခွာထားသည့်နေရာဖြစ်သည်။
ယခုအခါ KIA၊KPDF က ပြန်လည်ထိုးစစ်ဆင်နေပြီး တိုက်ပွဲပြင်းထန်နေသည်ဟု စစ်ရေးသတင်းရင်းမြစ်အချို့က ပြောသည်။ စစ်ကောင်စီက ၎င်းတို့တပ်စွဲထားသည့်နေရာများမှနေ၍ လက်နက်ကြီးများဖြင့် မကြာခဏပစ်ခတ်နေသည်ဟု ဆိုသည်။
ဆွတ်ငိုင်ယန်၊အမှိုက်ပုံ၊ မော်ဝမ်းလေးရွာတို့ကို စစ်ကောင်စီကထိန်းချုပ်ထားပြီး နေအိမ်များကိုလည်းဖျက်ဆီး ဝင်ရောက်နေသည်ဟု သိရသည်။ စစ်ကောင်စီတပ်စစ်ကြောင်းတွင် ဖားကန့်ဒေသအားနယ်မြေကျွမ်းကျင်သည့် ပြည်သူ့စစ်အဖွဲ့များပါလာပြီး ယမန်နှစ်က တိုက်ပွဲအတွင်း စစ်ကောင်စီလက်လွတ်ထားရသည့် လမောင်းကုန်းကို ဦးတည်စစ်ကြောင်းထိုးနေစဉ် KIA၊KPDF ပူးပေါင်းတပ်က ကြားဖြတ်တိုက်ခိုက်နေခြင်းဖြစ်သည်။
KIA၊KPDF ပူးပေါင်းတပ်သည် ဇူလ်ိုင် ၁၀ရက်ကလည်း ဖားကန့်မြို့နယ်၊လဝါးကျေးရွာအုပ်စုရှိ ခွန်စိုင်ယန်ကျေးရွာသင်္ချိုင်းအနီးရှိ စစ်ကောင်စီစခန်းကို တိုက်ခိုက်သိမ်းပိုက်ခဲ့သည်။
