ဇူလိုင်-၁၅၊၂၀၂၅။ရဲခေါင်/People’s Spring
ကရင်နီပြည်နယ် ၊မော်ချီးဒေသကို စစ်ကောင်စီက ယနေ့(ဇူလိုင် ၁၅ ရက်) နံနက် ၁ နာရီခန့်တွင် လေကြောင်းမှ ထပ်မံတိုက်ခိုက်ရာ အရပ်သား ငါးဦးထိခိုက်ဒဏ်ရာရရှိခဲ့သည်။
စစ်ကောင်စီသည် လေကြောင်းတိုက်ခိုက်မှုသည် ၂၄ နာရီအတွင်း မော်ချီးဒေသကို နှစ်ကြိမ်ပြုလုပ်ခဲ့ခြင်းလည်းဖြစ်သည်။
“ဒီမနက်က ထိခိုက်တဲ့အရပ်သားတွေထဲမှာ အမျိုး သမီးလေးဦးနဲ့ အမျိုးသားတစ်ဦး ဖြစ်တယ်။အိမ်တစ်လုံးပျက်စီးတယ်”ဟု ကရင်နီစစ်ရှောင်အရေးကူညီနေသူတစ်ဦးက ပြောသည်။
Public Service Announcement
ယမန်နေ့(ဇူလိုင် ၁၄ ရက်)မွန်းလွဲ ၂ နာရီခန့်ကလည်း မော်ချီးဒေသ တောင်ပေါ်လူနေရပ်ကွက်ကို စစ်ကောင်စီ လေကြောင်းတိုက်ခိုက်မှုကြောင့် အရပ်သား ခြောက်ဦးသေခဲ့ပြီး သုံးဦးဒဏ်ရာရခဲ့သည်။
စစ်တပ်အာဏာသိမ်းပြီးနောက်ပိုင်း ယခုနှစ်မတ်လကစ၍ မော်ချီးဒေသကို လေကြောင်းမှဗုံးကြဲမှုသည် ယနေ့တိုက်ခိုက်မှုအပါအဝင် ကိုးကြိမ်ရှိပြီဟု စစ်ရာဇဝတ်မှုများကို မှတ်တမ်းတင်နေသည့် CTER Karenni က အသိပေးသည်။
“လူမှုဘဝလုပ်ကိုင်စားသောက်လို့မရအောင် အစီ အမံနဲ့ လုပ်နေတယ်ပြောရမယ်။စားနပ်ရိက္ခာလမ်းကြောင်းတွေကို ပိတ်ဆို့တယ်။စစ်ကြောင်း ထိုးတယ်။အခုလည်း စစ်ကြောင်းထိုးမရတော့လေကြောင်းကနေ ဗုံးကြဲတယ်။လူမှုစီးပွားပျက်အောင် လုပ်နေတယ်လို့ ပြောရမယ်”ဟု ကရင်နီပြည် ကြားကာလအုပ်ချုပ်ရေးကောင်စီ၏ တွဲဖက်အတွင်းရေးမှူးဦးဗညားက စစ်ကောင်စီ၏ လေကြောင်းတိုက်ခိုက်မှုအပေါ် သုံးသပ်သည်။
ယခုနှစ်အတွင်း မော်ချီးဒေသကို စစ်ကောင်စီ လေကြောင်းတိုက်ခိုက်မှုများကြောင့် အရပ်သား ၃၀ ထက်မနည်းသေဆုံးခဲ့ရသည်။
ယခုနှစ်အတွင်း ကရင်နီပြည်နယ်၌ ကလေးငယ်များအပါအဝင် ပြည်သူ ၁၀၀နီးပါးကို စစ်ကောင်စီက သတ်ဖြတ်ခဲ့ပြီး လူမျိုးသုန်းသတ်ဖြတ်မှုအထိ ပစ်မှတ်ထားနေကြောင်း ကရင်နီပြည်နယ်ကြားကာလအုပ်ချုပ်ရေးကောင်စီ IEC က ထုတ်ပြန်ထားသည်။
စစ်ရှောင်စခန်း၊စာသင်ကျောင်းနှင့် ဘာသာရေးအဆောက်အဦးများလေကြောင်းတိုက်ခံရမှုမှ ရပ်တန့်ပေးနိုင်ရန် နိုင်ငံတကာအနေဖြင့် စစ်တပ် ၏ လေယာဥ်ဆီရရှိနေသည့် လမ်းကြောင်းများဖြတ်တောက်ပေးရန် ၊အရပ်သားများအတွက် စစ်မဲ့ဇုန် သတ်မှတ်ပေးရန်နှင့် စစ်ရာဇဝတ်မှုကျူး လွန်နေသည်ကိုအရေးယူပေးရန် IECက တောင်းဆိုထားသည်။
