ဩဂုတ်-၄၊ ၂၀၂၅။ ထားမြတ်/People’s Spring
ကချင်လွတ်လပ်ရေးအဖွဲ့(KIO/KIA) ဌာနချုပ် လိုင်ဇာမြို့အနီး မြန်မာ-တရုတ်နယ်စပ်တကြောတွင် ဩဂုတ်၃ရက်ညကစ၍ ရေကြီးမှုဖြစ်နေရာ ရေဘေးကြောင့် စစ်ဘေးရှောင်စခန်းမှ နေအိမ်များပျက်စီးမှုရှိကြောင်း ဒေသသတင်းရင်းမြစ်က ပြောသည်။
ယခင်ကလည်း လိုင်ဇာဒေသ၌ ရေကြီးမှုများ ဖြစ်သော်လည်း ယခုတကြိမ် ရေကြီးမှုအလွန်ပြင်းထန်ကြောင်း သတင်းရင်းမြစ်က ပြောပြသည်။ နေအိမ်အချို့ ရေထဲမျောပါသွားသည့် ဖြစ်စဉ်ကို သတင်းရင်းမြစ်က ပေးပို့သည့် ရုပ်သံ၌ တွေ့ရသည်။
“ထိခိုက်ပျက်စီး ဆုံးရှုံးမှုတော်တော်များမယ်။ စစ်ရှောင်စခန်းအိမ်တွေ အများကြီး ပါသွားနိုင်တယ်။ စာရင်း မသိရသေးဘူး”ဟု ဒေသ သတင်းရင်းမြစ်က ပြောသည်။
Public Service Announcement
KIO ဌာနချုပ် လိုင်ဇာဒေသတွင် ၂၀၁၁က စစ်တပ်နှင့် ဖြစ်ပွားခဲ့သည့် တကျော့ပြန်တိုက်ပွဲကြောင့် ဆယ်စုနှစ်နှင့်ချီ၍ စစ်ရှောင်နေရသည့် စစ်ရှောင် စခန်းအချို့ရှိသည်။ စစ်ရှောင်စခန်းများအနက် ဂျေယန်းစစ်ရှောင်စခန်းလည်း ပါဝင်ပြီး ယခင်ကလည်း ရေကြီးမှု၊ မြေပြိုမှုများကြောင့် လူထိခိုက်သေဆုံးဖြစ်စဉ်အချို့ရှိခဲ့သည်။
ယခု ရေဘေးတွင် လူထိခိုက်သေဆုံး အခြေအနေမကြားမိသေးဟု သတင်းရင်းမြစ်က ပြောပြသည်။
လိုင်ဇာဒေသ ရေဘေးအခြေအနေနှင့် ကယ်ဆယ်ရေး အခြေအနေများ မေးမြန်းရန် KIO/KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူထံ ဆက်သွယ်ထားသည်။
ပဲခူးတိုင်း၊ တောင်ငူခရိုင်တွင်လည်း ဇူလိုင် ၂၅ရက်မှစ၍ ယနေ့ဩဂုတ် ၄ရက်အထိ ရေကြီးရေလျှံမှုများ ရှိနေကြောင်း တောင်ငူခရိုင် တပ်ရင်း(၂)က သတင်းထုတ်ပြန်သည်။
တော်လှန်ရေးအင်အားစုများ၏ စိုးမိုးနယ်မြေများအတွင်း ယခင်နှစ်ကကဲ့သို့ပင် ယခုနှစ်တွင်လည်း ရေကြီး ရေလျှံမှုများ ရှိနေ၍ ပြည်သူများ သတိဖြင့်နေထိုင်ကြရန် တောင်ငူခရိုင် တပ်ရင်း(၂)က တိုက်တွန်းထားသည်။
