ဩဂုတ်−၂၈၊၂၀၂၅။ထားမြတ်/People’s Spring
အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာန၊ ပြည်သူ့ကာကွယ်ရေးတပ်မတော် ၏ တပ်မှူးကြီးများအစည်းအဝေးကို ဩဂုတ် ၂၃ ရက်မှ စတင်ကာ သုံးရက်ကြာ အောင်မြင်စွာကျင်းပပြုလုပ်ခဲ့ကြောင်း ကာကွယ်ရေးဝန်ကြီးဌာနက ယနေ့(ဩဂုတ်၂၈ရက်) ထုတ်ပြန်သည်။
တပ်မှူးကြီးများ အစည်းအဝေးကို စစ်ဦးစီးချုပ် အမှူးပြု၍ ဒုစစ်ဦးစီးချုပ်နှင့် စစ်ရုံးချုပ်တာဝန်ရှိသူများ၊ အမှတ်(၁)စစ်ဒေသ စစ်ဒေသမှူး၊ ပြည်သူ့ကာကွယ်ရေးတပ်မတော် တပ်မှူးကြီးများဖြစ်ကြသည့် တိုင်းစစ်ဌာန (၁၀)ခုမှ တိုင်းကွပ်ကဲရေးမှူး နှင့် ဒုတိယတိုင်းကွပ်ကဲရေးမှူးများ၊ ကာကွယ်ရေးဝန်ကြီးဌာန အကြီးတန်းအရာရှိများ တက်ရောက်ခဲ့ဟု အသိပေးသည်။
အဆိုပါ အစည်းအဝေးကို ပြည်သူ့ခုခံတော်လှန်စစ်၏ စစ်ရေးအောင်ပွဲများ ဆက်လက် ရရှိနေစေရေး၊ ပြည်သူ့ကာကွယ်ရေးတပ်မတော်နှင့် ပြည်သူ့ကာကွယ်ရေးအဖွဲ များကို အမိန့်ပေးကွပ်ကဲမှု ကောင်းမွန်ပြီး ကျင့်ဝတ် လိုက်နာသည့် တပ်မတော်တရပ်အဖြစ် စနစ်တကျ ဆက်လက်တည်ဆောက်ရေး၊ အကြမ်းဖက်စစ်တပ်ကို အပြီးသတ် အနိုင်ယူနိုင်ရေး စသည့် အချက်များအတွက် ကျင်းပခဲ့ခြင်းဖြစ်ကြောင်း ဖော်ပြသည်။
Public Service Announcement
လက်ရှိအချိန်တွင် ပြည်သူ့ကာကွယ်ရေးတပ်မတော် စစ်ရုံးချုပ်၏ ကွပ်ကဲမှုအောက်တွင် တိုင်းစစ်ဌာန ၁၀ခု ဖွဲ့စည်းပြး တပ်ရင်းတပ်ဖွဲ့များ ကို ကွပ်ကဲတိုက်ပွဲဝင်လျက်ရှိသည်ဟု လည်းအသိပေးသည်။
အဆုပါတိုင်းစစ်ဌာနများမှာ စစ်ကိုင်းတိုင်းစစ်ဌာန၊ မန္တလေးတိုင်းစစ်ဌာန၊ မကွေးတိုင်းစစ်ဌာန၊ ရှမ်းတောင်-ကယား(ကရင်နီ) တိုင်းစစ်ဌာန၊ နေပြည်တော်တိုင်းစစ်ဌာန၊ ပဲခူးတိုင်းစစ်ဌာန၊ ရန်ကုန်တိုင်းစစ်ဌာန၊ ဧရာဝတီတိုင်းစစ်ဌာန၊ တနင်္သာရီတိုင်းစစ်ဌာန နှင့် အထူးတိုင်းစစ်ဌာနတို့ဖြစ်သည်။
တပ်မှူးကြီးများအစည်းအဝေးတွင် တိုင်းစစ်ဌာနအလိုက် စစ်ရေးသုံးသပ်ချက် စာတမ်းများ တင်သွင်းခဲ့ကြပြီး လက်ရှိ တော်လှန်ရေးအခြေအနေအပေါ် သုံးသပ်ဆွေးနွေးခဲ့ကြောင်း၊ ထို့ပြင် ပြည်သူ့ကာကွယ်ရေးတပ်မတော်၏ ရှေ့လုပ်ငန်းစဉ်များကို ဖော်ထုတ်ချမှတ်နိုင်ခဲ့ကြောင်း သတင်းထုတ်ပြန်သည်။
NUG ကာကွယ်ရေးဝန်ကြီးဌာန အနေဖြင့် တပ်မှူးကြီးများ အစည်းအဝေးကျင်းပမှုကို ပထမဆုံးအကြိမ်ထုတ်ပြန်ခြင်းဖြစ်သည်။PDF တပ်ရင်းတပ်ဖွဲ့များသည် နိုင်ငံတစ်ဝန်း တိုင်းရင်းသားလက်နက်ကိုင်တပ်ဖွဲ့များ အပါအဝင် တော်လှန်ရေးအင်အားစုများနှင့် ပူးပေါင်း၍ စစ်တပ်ကိုခုခံတိုက်ခိုက်နေသည်။
