'/%3E%3C/svg%3E){kind=small}
စက်တင်ဘာ-၅၊၂၀၂၅။လူအေး/People’s Spring
စစ်ကောင်စီက လေကြောင်းနှင့်လက်နက်ကြီးအပြင်းအထန်တိုက်ခိုက်နေသည့် ဝိုင်းမော်မြို့နယ်၊ လမြန်ရွာတိုက်ပွဲတွင် စစ်တပ်ထိခိုက်သေဆုံးမှုများပြားပြီး ဗိုလ်အပါအဝင်ရှစ်ဦးကို KIA၊KPDF ကအရှင်ဖမ်းမိခဲ့ကြောင်းသတင်းရရှိသည်။
KIA ထိန်းချုပ်ထားသည့် လမြန်ရွာကို စစ်ကောင်စီတပ်က ဩဂုတ်၂၇ရက်မှစတင် ထိုးစစ်ဆင်ခဲ့ပြီး တိုက်ပွဲပြင်းထန်နေသည်။ စက်တင်ဘာလဆန်းပိုင်း၌တိုက်ပွဲအပြင်းထန်ဆုံးဖြစ်ခဲ့ပြီး စစ်ကောင်စီ ထိခိုက်သေဆုံးမှုများပြားခဲ့ခြင်းဖြစ်ကြောင်းဒေသခံစစ်ရေးသတင်းရင်းမြစ်ကပြောသည်။
“သေဆုံးတဲ့ စစ်သားအရေအတွက်အတိအကျမသိဘူး။အရှင်မိထားတာကရှစ်ယောက်ဟုတ်တယ်။ တိုက်ပွဲနောက်ဆုံးအခြေအနေက မြေပြင်မှာထက် လက်နက်ကြီးအဓိကပစ်နေတယ်။ တင့်ကားတွေနဲ့ကော ပစ်နေတာ” ဟု ၎င်းကပြောသည်။
Public Service Announcement
စက်တင်ဘာ ၄ ရက်ညနေ ၆နာရီခန့်အထိ စစ်ကောင်စီက လက်နက်ကြီးများပစ်ခဲ့ပြီး ညပိုင်းတွင်တိုက်ပွဲငြိမ်သက်နေသည်ဟုသိရသည်။
ဩဂုတ်လနှောင်းပိုင်းမှစ၍ တိုက်ပွဲဖြစ်ပွားပြီးနောက်စစ်တပ်က လမြန်ရွာအပါအဝင် ဘေးပတ်ဝန်းကျင်စွာများကို လေကြောင်းမှမကြာခဏ ဗုံးကြဲခဲ့သည်။ဝိုင်းမော်မြို့နယ် ၊နမ့်ဝါရွာကိုဩဂုတ်လ ၃၁ရက်နေ့ ညနေက ဂျက်ဖိုက်တာဖြင့် ဗုံးကြဲခဲ့၍ စစ်ဘေးရှောင်မိသားစုဝင်ငါးဦးဒဏ်ရာရခဲ့ပြီး အသက် ၈ နှစ်အရွယ်ကလေးငယ်တစ်ဦး သေဆုံးခဲ့သည်။
တိုက်ပွဲသည် ဝိုင်းမော်မြို့ပေါ်မှ ဆယ်မိုင်ခန့်အကွာတွင်ဖြစ်နေခြင်းဖြစ်သည်။လမြန်ရွာပတ်ဝန်းကျင်ကို လေကြောင်းအပြင် မြောက်ပိုင်းတိုင်းစစ်ဌာနချုပ်(မပခ)မှနေ၍ လက်နက်ကြီးများနေ့စဉ်ပစ်ခတ်နေသည်။
စစ်ကောင်စီသည် ပြည်သူလူထုကို ပစ်မှတ်ထား၍ လက်နက်ကြီးများအသုံးပြုပြီး ရမ်းသမ်းပစ်ခတ်မှုများ ပိုမို လုပ်ဆောင်နေသည်ဟု Kachin Human Rights Watch – KHRW ကလည်း ထုတ်ပြန်ထားသည်။
ဝိုင်းမော်ဒေသတိုက်ပွဲသတင်းကို KIAက အသေးစိတ်ထုန်ပြန်ခြင်းမရှိသေးသော်လည်းစစ်ကောင်စီက လေကြောင်းနှင့်လက်နက်ကြီး အင်အားသုံးပစ်ခတ်နေ၍ လုံခြုံရေးသတိပြုကြရန် ဒေသံများအား သတိပေးထားသည်။
