စစ်ကိုင်းမှာ နေ့ခင်းကြောင်တောင် ပေါ်တာဆွဲ၊ လူကြီးတွေပါ ဆွဲခံရ

စက်တင်ဘာ-၁၇၊ ၂၀၂၅။ မေ/People’s Spring

စစ်ကိုင်းမြို့မှာ နေ့ခင်းကြောင်တောင် ပေါ်တာဆွဲမှုတွေ ဆက်တိုက်ပြုလုပ်နေပြီး မနေ့က မြို့တွင်းမှာ ပေါ်တာဆွဲခဲ့တာကြောင့် လူငယ်တွေသာမက လူကြီးတွေပါ ပေါ်တာဆွဲခံခဲ့ရတယ်လို့ မြို့ခံတွေဆီက သိရပါတယ်။

စက်တင်ဘာ ၁၆ ရက်‌ မနေ့က နေ့လယ် ၁၂နာရီဝန်းကျင်မှာ စစ်ကိုင်းမြို့တွင်း နေရာတချို့နဲ့ ချင်းစုရပ်၊ အောင်ချမ်းသာ ဘုရားအနီးတို့မှာ ပေါ်တာဆွဲဖမ်းဆီးတာတွေ ပြုလုပ်ခဲ့တယ်လို့ ဆိုပါတယ်။

“‌‌‌‌‌‌‌‌အခုတလော နေ့တိုင်းကိုဆွဲနေတာ။ မနေ့က ဆွဲတော့ အသက် ၄၀ ဝန်းကျင်တွေအထိ ဆွဲတယ်လို့ပြောတယ်။ အခုက စကစတွေ မြင်ရင် လူငယ်တွေက သိပ်အပြင်မထွက်ကြတော့ဘူးလေ။ နောက်ပြီး အခုကပျူတွေကလည်း ကြုံသလိုဆွဲတာ။ ဆွဲပြီး လူရရင် သူတို့က ပိုက်ဆံရတယ်လို့ပြောတယ်”လို့ စစ်ကိုင်းမြို့ခံ လူငယ်တစ်ဦးက ပြောပါတယ်။

Public Service Announcement

အရင်က စစ်ကိုင်းမြို့မှာ စစ်ကောင်စီနဲ့ ပျူစောထီး ပူးပေါင်းပေါ်တာဆွဲပြီး တပ်မ- ၃၃ထဲကို ခေါ်သွားလေ့ရှိပြီး အခုနောက်ပိုင်းမှာတော့ စစ်ကိုင်းရဲစခန်း၊ မြို့ထဲက ပျူစောထီးဘုန်းကြီးရဲ့ ကျောင်းအတွင်းထဲကို ခေါ်သွားကာ ပြန်လည်ရောင်းစားလေ့ရှိတယ်လို့ မြို့ခံလူငယ်က ဆက်ပြောပါတယ်။

စစ်ကောင်စီတပ်က မုံရွာမြို့နဲ့ စစ်ကိုင်းမြို့တို့မှာ ပေါ်တာဆွဲမှုတွေ ပြုလုပ်နေပြီး မနေ့ကလည်း နှစ်မြို့လုံးမှာ ပေါ်တာဆွဲမှု ပြုလုပ်ခဲ့တာလို့ သိရပါတယ်။