စက်တင်ဘာ−၂၁၊ ၂၀၂၅/People’s Spring
ကရင်ပြည်နယ်၊မြဝတီမြို့မရဲစခန်းကနေ နယ်ပြောင်းတဲ့ စစ်တပ်လက်အောက်ခံရဲ၆ ဦးကိုကရင်အမျိုးသားလွတ်မြောက်ရေးတပ်မတော်(KNLA) ရဲဘော်တွေက ဖမ်းဆီးလိုက်တယ်လို့ သတင်းရရှိပါတယ်။
လွန်ခဲ့တဲ့ နှစ်ပတ်က မြဝတီမြို့ကနေ နယ်ပြောင်းဖို့ အရပ်သားကားနဲ့သွားရာမှာ KNLAရဲ့ သရက်တောဂိတ်မှာ ဖမ်းဆီးခံရတာလို့ KNLAနဲ့ နီးစပ်တဲ့ သတင်းရင်းမြစ်က ပြောပါတယ်။
“ခြောက်ယောက်တည်းပါ။ သရက်တောဂိတ်မှာ ဖမ်းမိတယ်။အဲမှာ KNUဂိတ်တခုရှိတယ်လေ။ သူတို့က အရပ်သားကားနဲ့သူတို့ဆင်းသွားတယ်။ အ
Public Service Announcement
ရပ်သားကားနောက်ကလိုက်သွားတာပေါ့။ နယ်ပြောင်းရမယ့် ရဲတွေပါသွားတယ်”လို့ ၎င်းက ပြောပါတယ်။
ဒါအပြင်လက်တလော မြဝတီမြို့နယ်မှာ တိုက်ပွဲတွေဖြစ်နေပါတယ်။
ကော့ကရိတ်ကနေ စစ်ကြောင်းထိုးတဲ့ စစ်ကောင်စီတပ်ဟာ ၁နှစ်ကျော်အကြာ ပြီးခဲ့တဲ့လက မြဝတီမြို့ကိုရောက်ပြီးနောက် မြို့တောင်ဘက်ဒေသတွေကို စစ်ကြောင်းထိုးနေပါတယ်။
လက်ရှိမှာ စစ်ကောင်စီတပ်တွေက မြဝတီကနေ လေးကေ့ကော်မြို့သစ်ဆီကို စစ်ကြောင်း သုံးကြောင်းထိုးနေတယ်လို့ စစ်ရေးသတင်းရင်းမြစ်က ပြောပါတယ်။
“လေးကေ့ကော်ကို စစ်ကြောင်းသုံးကြောင်းထိုးလာနေတယ်။ ညလောက်ဆို တိုက်ပွဲသံတွေကြားရလောက်မယ်”လို့ ၎င်းက ပြောပါတယ်။
စစ်တပ်က နှစ်ပေါင်း ၂၀ ကျော်ကြာ တပ်စွဲ ခြေကုတ်ယူထားတဲ့ လေးကေ့ကော် အမြောက်ကုန်းကို KNLA ဦးဆောင်တဲ့တော်လှန်ရေး တပ်ဖွဲ့တွေက ၂၀၂၄ အောက်တိုဘာ ၁၇ ရက်မှာ သိမ်းပိုက်ခဲ့ပါတယ်။
အခုရက်ပိုင်းအတွင်းမှာ မြဝတီမြို့စောင့်တပ်ဖြစ်တဲ့ ခလရ(၂၇၅)တပ်ရင်းကနေလည်း လက်နက်ကြီးတွေနဲ့ ပစ်ခတ်နေတယ်လို့ မြဝတီမြို့ခံတွေက ပြောပါတယ်။
“မြို့အပြင်မှာ လက်နက်ကြီးတွေနဲ့ နေ့တိုင်းထုနေတာ”လို့ မြဝတီမြို့ခံတဦးက ပြောပါတယ်။
