စက်တင်ဘာ – ၂၃ ၊၂၀၂၅ ၊ ဆိုင်းမင်း /People’s Spring
မန္တလေးအိုးဘိုထောင်က ထောင်သားတစ်ဦး ဆေးရုံကြီးအချုပ်ဆောင်ကနေ ထွက်ပြေးမှုဖြစ်ပွားပြီးနောက် ထောင်ဝင်စာဧည့်တွေ့ပိတ်ထားတယ်လို့ အကျဉ်းသားမိသားစုတွေထံကနေသိရပါတယ်။
ထောင်သားထွက်ပြေးမှုဖြစ်ပွားခဲ့တဲ့ စက်တင်ဘာ၁၉ရက်ကနေ ဒီနေ့ (စက်တင်ဘာလ ၂၃ရက် ) အထိ ဧည့်တွေ့အပြင် ထောင်ဝင်စာ ပါဆယ်ပစ္စည်းအချို့ပါကန့်သတ်လိုက်တာပါ။
“အရင်ကတော့ ပုံမှန်ပို့နေကြပစ္စည်းတွေပို့မရတာတွေဖြစ်လာတယ်၊ရုံးချိန်းဧည့်တွေကိုပါ ပိတ်လိုက်တယ်”လို့ အိုးဘိုထောင်မှာ အကျဉ်ကျခံနေရသူရဲ့ မိခင်ကပြောပါတယ်။
Public Service Announcement
တဆက်တည်းမှာပဲ ထောင်တွင်းတရားရုံးစစ်ဆေးမှုတွေမှာ လိုက်ပါနိုင်တဲ့ သက်သေတွေကိုပါ ကန့်သတ်လိုက်တယ်လို့ သိရပါတယ်။
အိုးဘိုထောင်မှာ မူးယစ်အမှုနဲ့ နှစ်ရှည် ထောင်ကျနေတဲ့ ထောင်သား တစ်ဦး မန္တလေးဆေးရုံကြီး အချုပ်ဆောင်ကနေ စက်တင်ဘာ ၁၉ရက်က ထွက်ပြေးခဲ့တာပါ။
လိပ်ခေါင်းရောဂါကုသဖို့ မန္တလေးဆေးရုံကြီးကို ရောက်ရှိပြီး ခွဲစိတ်ဖို့ ကုသဆောင်ကို ပို့ဆောင်ရာ သံခြေကျင်းဖြုတ်ပေးပြီးနောက် ထွက်ပြေးသွားတာလို့သိရပါတယ်။
ထွက်ပြေးသွားတဲ့ ထောင်သားကို တော့ စက်တင်ဘာ၂၀ရက် မနက်ပိုင်းမှာပဲ ညီဖြစ်သူရဲ့ နေအိမ်မှာ ပြန်လည်ဖမ်းမိခဲ့တယ်လို့ သိရပါတယ်။
