အောက်တိုဘာ ၁၄၊ ၂၀၂၅။ဇော်ဝင်း/People’s Spring
မကွေးတိုင်း၊ပွင့်ဖြူမြို့နယ်ကစစ်ကောင်စီရဲ့မဲဇလီဆည်တော်ကြိုး တံတားစစ်ဆေးရေးဂိတ် တိုက်ခိုက်စဥ် သေဆုံးခဲ့တဲ့ စစ်သားအလောင်းတွေ ထပ်မံတွေ့တယ်လို့ မင်းဘူးခရိုင် တပ်ရင်း(၇)က ထုတ်ပြန်ပါတယ်။
နယ်မြေရှင်းလင်းစဉ်မှာ စစ်ကောင်စီတပ်သားနှစ်ဦးရဲ့ ရုပ်အလောင်း ထပ်တွေ့တာလို့ အသိပေးပါတယ်။
“ ၁၁ ရက်နေ့က တစ်ယောက်၊၁၂ ရက်နေ့က တစ်ယောက် စုစုပေါင်း နှစ်ယောက်တွေ့တာ” လို့ ပွင့်ဖြူမြို့နယ် ကာကွယ်ရေးတပ်ဖွဲ့ဝင်တစ်ဦးက ပြောပါတယ်။
Public Service Announcement
အောက်တိုဘာ ၄ ရက်က ပုသိမ်-မုံရွာလမ်းပိုင်းက စစ်ကောင်စီတပ်အထိုင်ချထားတဲ့ မဲဇလီ ဆည်တော်ကြိုး တံတားစစ်ဆေးရေးဂိတ်ကို ဝင်ရောက်တိုက်ခိုက်ခဲ့တဲ့ ဖြစ်စဥ် နောက်ဆက်တွဲလို့ ဆိုပါတယ်။
တိုက်ခိုက်ခဲ့တဲ့နေ့က စစ်ကောင်စီတပ်သားလေးဦးအလောင်းနဲ့ လက်နက်နဲ့ခဲယမ်းတွေရရှိတယ်လို့ ပွင့်ဖြူ ပကဖက ကနဦး ထုတ်ပြန်ထားပါတယ်။ပွင့်ဖြူပကဖ ၊မင်းဘူးခရိုင် ပကဖ၊မင်းဘူးခရိုင် တပ်ရင်း ၇ နဲ့ တပ်ရင်း ၄ တို့ ပူးပေါင်းပြီး တိုက်ခိုက်ခဲ့တာလို့လည်း အသိပေးပါတယ်။
မဲဇလီဆည်တော်စစ်ဆေးရေးဂိတ်မှာစစ်ကောင်စီတပ်သားတွေအထိုင်ချတပ်စွဲထားတာဖြစ်ပြီး အင်အား ၁၀ ဦးထက်မနည်းရှိခဲ့တယ်လို့ သိရပါတယ်။
လက်ရှိမှာ ပုံသိမ်-မုံရွာလမ်းပိုင်းပေါ်က မဲဇလီ ဆည်တော်ကြိုးတံတားကို အသုံးမပြုဖို့ ပွင့်ဖြူ ပကဖ က တိုက်တွန်းထားပါတယ်။
စစ်ရေးဂိတ်တိုက်ခိုက်ခံရပြီးတဲ့နောက် စစ်ကောင်စီတပ်က ပွင့်ဖြူမြို့နယ်ထဲ လေကြောင်းကနေ ဗုံးကြဲတာ အပြင် မြေပြင်စစ်ကြောင်းတွေနဲ့ ထိုးစစ်ဆင်နေတာ ရှိပါတယ်။
“ အဲဒီအခြေနေအသေးစိတ်ကိုတော့ရှေ့တန်းကသတင်းမပို့လာသေးဘူး” လို့ မင်းဘူးခရိုင်တပ်ရင်း ၇ တာဝန်ရှိသူက ပြောပါတယ်။
ပြီးခဲ့တဲ့ စက်တင်ဘာ ၄ ရက်ကနေ ၆ ရက်အထိ ပွင့်ဖြူမြို့နယ်ထဲမှာ စစ်ကောင်စီတပ်စစ်ကြောင်း ထိုးခဲ့ဖူးပြီး သေဆုံးမှုများတာကြောင့် မင်းဘူး(စကု)ဘက်သို့ တပ်ပြန်ဆုတ်သွားရတယ်လို့ ပွင့်ဖြူ ပကဖ က ထုတ်ပြန်ထားပါတယ်။
