အောက်တိုဘာ-၂၁၊ ၂၀၂၅။မိုမို/People’s Spring
စစ်ကိုင်းတိုင်း၊ တန့်ဆည်မြို့နယ်ကတိုက်ပွဲမှာ စစ်ကောင်စီတပ်အထိနာခဲ့တယ်လို့ရေဦးမြို့နယ်ပြည်သူ့ကာကွယ်အဖွဲ့(ပကဖ)ကဒီနေ့(အောက်တို ဘာ ၂၁ရက်)မှာ ထုတ်ပြန်ပါတယ်။
မနေ့က(အောက်တိုဘာ ၂၀ ရက်) မနက် ၉ နာရီခွဲခန့်မှာ တန့်ဆည်မြို့နယ်က အက်တော၊သဲကုန်းရွာကနေ ကန့်ဘလူမြို့နယ် ကာဘိုးရွာဘက်ကို စစ်ကြောင်းထွက်လာတဲ့ စစ်ကောင်စီတပ်နဲ့ ပျူစောထီး စုစုပေါင်း ၄၀ ခန့်ကို တော်လှန်ရေးတပ်တွေက ကြားဖြတ်တိုက်ခိုက်ခဲ့တာလို့ ဆိုပါတယ်။
“တိုက်ပွဲက နာရီဝက်လောက်ဖြစ်ခဲ့တယ်။စစ်အုပ်စုဘက်က ၁၁ ယောက်သေတယ်။ခြောက်ဦးဒဏ်ရာရတယ်လို့ သိရတယ်”လို့ ရေဦး ပကဖ တာဝန်ရှိသူက လူထုနွေဦးကို ပြောပါတယ်။
Public Service Announcement
တိုက်ပွဲအတွင်းမှာ ရဲဘော်တစ်ဦး ဒဏ်ရာရရှိပြီး မစိုးရိမ်ရဘူးလို့ ၎င်းက အသိပေးပါတယ်။
စစ်အုပ်စုဘက်က သေဆုံးထိခိုက်မှုနဲ့ ပတ်သက်လို့ လူထုနွေဦးအနေနဲ့ သီးခြားအတည်မပြုနိုင်သေးပါဘူး။
စစ်ကောင်စီတပ်ကို ကြားဖြတ်တိုက်ခိုက်မှုမှာ တန့်ဆည်မြို့နယ်ပြည်သူ့ကာကွယ်ရေးအဖွဲ့(ပကဖ) ပေါ်ဦးစစ်ကြောင်း၊ ရေဦးမြို့နယ်ပြည်သူ့ကာကွယ်ရေးအဖွဲ့ နဲ့ ရေဦး ပကဖ လက်ရုံးတပ်ဖွဲ့ တို့ပါဝင်ခဲ့တယ်လို့ သိရပါတယ်။
စစ်ကောင်စီတပ်က ကန့်ဘလူမြို့နယ်ကနေ တန့်ဆည်နယ်အရှေ့ခြမ်း အက်တော၊ သဲကုန်းကျေးရွာဘက်ကို စက်တင်ဘာနောက်ဆုံးပတ်ကစပြီး စစ်ကောင်စီတပ်သားတွေ ဖြည့်တင်းနေတယ်လို့ စစ်ကိုင်းအထက်ပိုင်း စစ်ရေးသတင်းရင်းမြစ်တစ်ဦးက ဆိုပါတယ်။
“ကာဘိုးဘက်ကနေ အက်တောကို အင်အားဖြည့်နေတာပေါ့။၂၅၀ လောက် ရှိတယ်။တန့်ဆည်-ရေဦးလမ်းပိုင်းကို ပြန်ထိန်းချုပ်ချင်နေတာ”လို့ ၎င်းက ပြောပါတယ်။
အခုအောက်တိုဘာ ၁ ရက်ကလည်း စစ်ကိုင်းတိုင်း၊တန့်ဆည်-ရေဦးလမ်းပိုင်း ထိုးစစ်ဆင်လာတဲ့ စစ်ကောင်စီတပ်စစ်ကြောင်း အထိနာပြီး ပြန်ဆုတ်သွားရတယ်လို့ သိရပါတယ်။
အဲဒီ စစ်ကောင်စီတပ်စစ်ကြောင်းမှာ အမှတ်(၃၆၁)ခြေမြန်တပ်ရင်း (ခမရ-၃၆၁)နဲ့ ပျူစောထီး အင်အား ၂၀၀ ဝန်းကျင်ပါတယ်လို့ ပေါ်ဦးစစ်ကြောင်းက အသိပေးထားပါတယ်။
