အောက်တိုဘာ-၃၀၊ ၂၀၂၅။ဟာနာဆန်/People’s Spring
မကွေးတိုင်း၊ ရေစကြိုမြို့နယ်က မအူပေါ်တော်မူသာသနာ့နယ်မြေကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ အဆောက်အဦးတချို့ ပျက်စီးသွားခဲ့ပါတယ်။
အောက်တိုဘာ၂၈ ရက်၊ညနေ ၄နာရီခွဲခန့်ကရေစကြိုမြို့နယ်၊ အနောက် မြောက်ပိုင်းက မအူကျေးရွာအနီးမှာရှိတဲ့ ပေါ်တော်မူသာသနာ့နယ်မြေအတွင်းကို အကြောင်းမဲ့ လေကြောင်းကနေ ဗုံးကြဲတိုက်ခိုက်ခဲ့ရာ သာသနိကအဆောက်အဦးအချို့ထိမှန်ပျက်စီးခဲ့ကြောင်း ရေစကြို သတင်းအချက်အလက် ကော်မတီက အသိပေးပါတယ်။
“ဘုရားကျောင်းဆောင်တွေတော့ ပျက်စီးတာရှိတယ်။ လူသေဆုံးတာတော့မရှိဘူး”လို့ ဒေသခံတဦးက ပြောပါတယ်။
Public Service Announcement
ထိခိုက်တဲ့အဆောက်အဦးတွေရဲ့ အသေးစိတ်ပျက်စီးမှုအခြေအနေကိုတော့ မသိရသေးပါဘူး။
စစ်ကောင်စီတပ်ဟာ တိုက်ပွဲဖြစ်ပွားခြင်းမရှိတဲ့ သာသနာ့နယ်မြေကို အကြောင်းမဲ့ ဗုံးကြဲခဲ့တာဖြစ်ကြောင်း ဒေသခံတွေက ပြောပါတယ်။
စစ်ကောင်စီတပ်ဟာ အာဏာသိမ်းပြီးကာလတလျှောက် တော်လှန်ရေးအားကောင်းတဲ့ဒေသတွေမှာရှိတဲ့ ဗုဒ္ဓဘာသာတွေရဲ့ ဘုရားစေတီပုထိုးများ၊ ဘုန်းကြီးကျောင်းများအပြင် ခရစ်ယာန်ဘာသာဝင်တွေရဲ့ဘုရားကျောင်းတွေကိုပါ လေကြောင်းတိုက်ခိုက်မှုတွေ မကြာခဏ ပြုလုပ်နေပါတယ်။
