နိုဝင်ဘာ-၅၊ ၂၀၂၅။ ထားမြတ်/People’s Spring
ပဲခူးတိုင်း၊ နတ်တလင်းမြိုနယ်၊ မင်းဘူးကျွန်းအောက်စု ပျူစောထီးစခန်းကို ဒရုန်းနဲ့တိုက်ခိုက်ခဲ့သလို တောင်ညိုရဲကင်းစခန်းက ကင်းလှည့်ထွက်လာတဲ့ စစ်ကောင်စီတပ်ဖွဲ့တွေကိုလည်း မိုင်းဆွဲတိုက်ခိုက်ခဲ့တယ်လို့ သာယာ၀တီခရိုင် အမှတ်(၁) တပ်ရင်းက ထုတ်ပြန်ပါတယ်။
နိုဝင်ဘာ ၃ရက်မနက်မှာ မင်းဘူးကျွန်းအောက်စု ပျူစောထီးစခန်းကို ပဲခူးတိုင်းစစ်ဌာန၊ အမှတ်(၂၂)ဗျူဟာ၊ သာယာဝတီခရိုင် တပ်ရင်း(၁)တပ်ရင်း Drone တပ်ဖွဲ့ ရဲဘော်တွေနဲ့တပ်ခွဲ(၂) ရဲဘော်တွေက ဒရုန်းနဲ့တိုက်ခိုက်ခဲ့တယ်လို့ ဖော်ပြပါတယ်။
ဒါ့အပြင် ကံစုတာဂွ စခန်းမှူးနေအိမ်နဲ့ စစ်ကောင်စီကင်းပုန်းဝပ်တဲ့ ဗိုလ်တဲစခန်းကိုလည်း မီးရှို့ဖျက်ဆီးခဲ့ကြောင်း အသိပေးထားပေမယ့် စစ်ဆင်ရေး အသေးစိတ်အခြေအနေတွေ ဖော်ပြမထားပါဘူး။
Public Service Announcement
ဒါ့အပြင် တောင်ညိုရဲကင်းစခန်းက ထွက်လာတဲ့ စစ်ကောင်စီတပ်ဖွဲ့နဲ့ ရဲတွေကိုလည်း နိုဝင်ဘာ ၃ရက်မနက်မှာ မိုင်းဆွဲတိုက်ခိုက်ခဲ့ရာ စစ်ကောင်စီဘက်က ၁ဦးသေဆုံးကာ ဒဏ်ရာရသူတွေရှိတယ်လို့ ထုတ်ပြန်ပါတယ်။
စစ်ဆင်ရေးအတွင်းမှာ တော်လှန်ရေးရဲဘော်တွေ အထိအခိုက်မရှိ အောင်မြင်စွာ ဆုတ်ခွာနိုင်ခဲ့တယ်လို့လည်း အသိပေးထားပါတယ်။
အဲဒီစစ်ဆင်ရေးတွေနဲ့ဒေသတွင်း စစ်ရေးအခြေအနေတွေကို မေးမြန်းဖို့ သာယာ၀တီခရိုင် အမှတ်(၁) တပ်ရင်းကို ဆက်သွယ်ထားဆဲဖြစ်ပါတယ်။
သာယာ၀တီခရိုင်တပ်ရင်း(၁)ဟာ ဒေသတွင်း စစ်ကောင်စီ ထောက်တိုင်တွေကို တိုက်ခိုက်တာ၊ စစ်ကောင်စီအုပ်ချုပ်ရေး ယန္တရားလည်ပတ်နိုင်ရေးအတွက် လုပ်ဆောင်နေသူတွေကို သတိပေးတာလုပ်ဆောင်ခဲ့တဲ့ တပ်ရင်းဖြစ်ပါတယ်။
ဒါ့အပြင် စစ်ကောင်စီတပ်က အလင်းဝင်လာသူတွေကို ကြိုဆိုလက်ခံပြီး လက်နက်ပါလာသူတွေကို ဆုငွေပေးတာတွေလည်း ပြုလုပ်ခဲ့ပါတယ်။
စစ်ကောင်စီတပ်က အတင်းအဓမ္မစစ်သားစုဆောင်းထားတဲ့ လူငယ်တွေအနေနဲ့ အခွင့်အရေးရရင် တပ်ရင်းကိုဆက်သွယ် အလင်းဝင်ကြဖို့၊ စစ်အာဏာရှင်တွေရဲ့ အကျိုးစီးပွားအတွက်အသုံးချခံ မဖြစ်ကြစေဖို့လည်း သာယာ၀တီခရိုင်တပ်ရင်း(၁)အနေနဲ့တိုက်တွန်း နှိုးဆော်ထားပါတယ်။
