နိုဝင်ဘာ – ၁၇ ၊၂၀၂၅ ၊ ဆိုင်းမင်း/People’s Spring
စစ်အာဏာသိမ်းမှုကိုဆန့်ကျင်တဲ့လှုပ်ရှားမှုတွေကို တော်လှန်ရေး လို့ ပြောဆိုမဲဆွယ်တဲ့ ပြည်သူ့ပါတီက ကိုယ်စားလှယ်လောင်းရဲ့ ပြောဆိုချက်ဟာ ရွေးကောက်ပွဲဥပဒေ နဲ့ ငြိစွန်းမှု ရှိ မရှိ စစ်ဆေးမယ်လို့ စစ်ကောင်စီရဲ့ ရွေးကောက်ပွဲကော်မရှင်က ထုတ်ပြန်ပါတယ်။
ပြည်သူ့ပါတီကို ကိုယ်စားပြုပြီး ရန်ကုန်တိုင်း ၊ သင်္ဃန်းကျွန်းမြို့နယ်၊ ပြည်သူ့လွှတ်တော် မဲဆန္ဒနယ်ကနေဝင်ပြိုင်မယ့် ဦးလွင်မြင့်ဟာ ၂၀၂၁ ခုနှစ် စစ်အာဏာသိမ်းတဲ့အပေါ် ဆန့်ကျင်လှုပ်ရှားမှုတွေကို “တော်လှန်ရေး” လို့ ပြောဆို မဲဆွယ်တာကြောင့် အကြမ်းဖက်အားပေးဖြစ်ပြီး ကိုယ်စား လှယ်လောင်း အရည်အချင်း နဲ့ ကိုက်ညီမှု မရှိဘူးလို့ စစ်တပ်ဝါဒဖြန့် တယ်လီဂရမ်အချို့က လှုံ့ဆော်ပါတယ်။
အဲဒီနောက် အမျိုးသားရေးလှုပ်ရှားသူလည်းဖြစ် ၊ စစ်အာဏာသိမ်းမှုကိုထောက်ခံသူလည်းဖြစ်တဲ့ နောင်တော်လေး ထူထောင်ထားတဲ့ ဝါဒဖြန့် မီဒီယာ Myanmar National Post က ဦးလွင်မြင့် ရဲ့ပြောဆိုချက်ကို စစ်ဆေးပေးဖို့ စစ်ကောင်စီရဲ့ရွေးကောက်ပွဲကော်မရှင် ကိုမေးခွန်းထုတ်တာပါ။
Public Service Announcement
စစ်ကောင်စီရဲ့ ရွေးကောက်ပွဲကော်မရှင်ကလည်း နောင်တော်လေးရဲ့ တင်ပြချက် မှန်ကန်ရင် ဦးလွင်မြင့်ကို အရေးယူမှာဖြစ်တယ်လို့ တုံ့ပြန်ထားပါတယ်။
ပြည်သူ့ပါတီရဲ့ Tiktok အကောင့်ခ်မှာ ဦးလွင်မြင်က ရုပ်သံ နဲ့ မဲဆွယ်ရာမှာ သူရဲ့ အဖေ ၊ သူ့ကိုယ်တိုင်နဲ့ သူ့ရဲ့သား အပါအဝင် မျိုးဆက် သုံး ဆက် ဟာ နိုင်ငံရေးအကျဉ်းသားတွေဖြစ်ပြီး ပြည်သူ့အတွက် ထောင်ပဲကျကျ လုပ်ကိုင်ဆောင်ရွက်သူတွေဖြစ်တာကြောင့် ယုံကြည်စိတ်ချရမယ်လို့ ပြောထားတာပါ။
သူ့ရဲ့ ဖခင်ဟာ တစ်ပါတီ အာဏာရှင်စနစ်ဖြစ်တဲ့ မြန်မာ့ဆိုရှယ်လစ်လမ်းစဉ်ပါတီ ကို ဆန့်ကျင်လို့ကိုကိုးကျွန်းမှာ အကျဉ်းကျခဲ့သူဖြစ်တယ်လို့ ဦးလွင်မြင့်ပြောပါတယ်။
သူ့ကိုယ်တိုင်ကတော့ ၈၈ မျိုးဆက်ကျောင်းသားခေါင်းဆောင်တွေနဲ့အတူ အင်းစိန်ထောင် ၊ သရက်အကျဉ်းထောင်တွေမှာ ကျခံခဲ့ရသလို ၊ သားဖြစ်သူကလည်း ၂၀၂၁ တော်လှန်ရေးမှာ ထောင်ကျပြီး ပြီးခဲ့တဲ့ လပိုင်းကမှ ပြန်လွတ်လာတာလို့ ဦးလွင်မြင့်က ဆိုထားပါတယ်။
ဦးလွင်မြင့် ကိုယ်စားပြု တဲ့ ပြည်သူ့ပါတီဟာ ၈၈ မျိုးဆက်ကျောင်းသားခေါင်းဆောင် တစ်ဦးဖြစ်တဲ့ ဦးကိုကိုကြီး ဦးဆောင်တဲ့ ပါတီပါ။
ပြီးခဲ့တဲ့ အောက်တိုဘာလကုန်ပိုင်းကလည်း ရန်ကုန်တိုင်း ၊ အမျိုးသားလွှတ်တော် မဲဆန္ဒနယ် အမှတ် (၁) ကနေ စစ်ကောင်စီရဲ့ ရွေးကောက်ပွဲကို ဝင်ပြိုင်မယ့် လေဘာပါတီ (Labour Party ) ရဲ့ လွှတ်တော်ကိုယ်စားလှယ်လောင်း ဦးကျော်သူရ ဟာ CDM လှုပ်ရှားမှု ထောက်ခံတဲ့ ပုံကိုဖေ့ဘွတ်ခ်မှာ တင်ထားခဲ့တဲ့ မှတ်တမ်း တွေ့ ရတာကြောင့် အကြမ်းဖက်အားပေးဖြစ်တဲ့အတွက် စိစစ်သင့်တယ်လို့ စစ်တပ်ဝါဒဖြန့် တယ်လီဂရမ်ချန်နယ်တွေက လှုံ့ဆော်ခဲ့ဖူးပါတယ်။
