နိုဝင်ဘာ-၂၀၊၂၀၂၅။မိုမို/People’s Spring
စစ်ကောင်စီရဲ့တပ်မ(၇၇)လက်အောက်ခံအမှတ်(၁၀၇)ခြေမြန်တပ်ရင်း(ခမရ-၁၀၇)က စစ်မှုထမ်းတပ်သားသစ် လေးဦး လက်နက်တွေနဲ့ အလင်းဝင်လာတယ်လို့ မကွေးတိုင်း ပကဖ ရွေ့လျားစစ်ကြောင်း(Yenanthar Column)တာဝန်ရှိသူက လူထုနွေဦးကို ပြောပါတယ်။
စစ်ကိုင်းတိုင်းအတွင်းစစ်ကြောင်းဝင်နေတဲ့ ခမရ(၁၀၇)တပ်ရင်းကနေ အခု နိုဝင်ဘာ ၁၁ ရက်က သွားရောက် ခေါ်ဆောင်ခဲ့ရတာလို့ ဆိုပါတယ်။
“ ပေါ်တာဆွဲခံရပြီး ရှေ့တန်းပါလာတဲ့ စစ်မှုထမ်းတပ်သားတွေပါ။နှစ်ယောက်က အလုပ်သွားရင်း ဆွဲခံရပြီး။နောက်နှစ်ယောက်က အိမ်ပေါ်အထိ တက်ပြီး ပေါ်တာဆွဲခံရတဲ့သူတွေ” လို့ အထက်ပါတာဝန်ရှိသူကပြောပါတယ်။
Public Service Announcement
တပ်သားသစ် လေးဦးက သေနတ်နှစ်လက် (MA-1 ၊MA-3)နဲ့ ကျည်တွေ ယူဆောင်လာခဲ့တယ်လို့ အသိပေးပါတယ်။
အဲဒီစစ်မှုထမ်းတပ်သားတွေက Yenanthar Columnနဲ့အတူစစ်ကောင်စီတပ်ကိုပြန်တိုက်မယ်လို့လည်းထွက်ဆိုထားတယ်လို့သိရပါတယ်။
အခုနှစ် ဇန်နဝါရီကနေ အောက်တိုဘာနောက်ဆုံးပတ်အထိ စစ်ကောင်စီတပ်သားတွေ အလင်းဝင်ပူးပေါင်းတာ၊ လက်နက်ချ စစ်သုံ့ပန်းအရေအတွက် ၂,၂၄၆ ဦးရှိတယ်လို့ ပြည်သူ့ပန်းတိုင်က ထုတ်ပြန်ထားပါတယ်။
၂၀၂၄ ခုနှစ်၊ဖေဖော်ဝါရီမှာ စစ်တပ်က စစ်မှုထမ်းဥပဒေကို အသက်သွင်းခဲ့ပြီး အပတ်စဥ်တစ်ခုမှာ အသက်(၁၈)နှစ်ကနေ (၃၅)နှစ်ကြား အမျိုးသားလူငယ် ငါးထောင်ကို စုဆောင်းခဲ့ပါတယ်။အခုဆိုရင် အပတ်စဥ်(၁၉)ကိုအထိရောက်နေပြီဖြစ်ပါတယ်။
