နိုဝင်ဘာ-၂၆၊၂၀၂၅။People’s Spring
အာဏာသိမ်း စစ်တပ်က ဦးဆောင်ပြီး ပြုလုပ်မယ့် ရွေးကောက်ပွဲ ပြီးဆုံးသွားရင်တောင်မှ အရှေ့တောင်အာရှ နိုင်ငံများ အစည်းအရုံး (အာဆီယံ) အနေနဲ့ မြန်မာနဲ့ ပြန်လည် ထိတွေ့ ဆက်ဆံမှုတွေ စတင်ဖို့ ခက်ခဲလိမ့်မယ်လို့ ထိုင်းနိုင်ငံခြားရေး ဝန်ကြီးက မှတ်ချက်ပေးခဲ့ပါတယ်။
ဝန်ကြီး ဆီဟာဆက်ခ် ဖူအန်းကက်ကောင်က ရွေးကောက်ပွဲအလွန် အာဆီယံ-မြန်မာဆက်ဆံရေးနဲ့ ပတ်သက်လို့ သူ့အမြင်ကို နိုဝင်ဘာ ၂၅ ရက် ညနေပိုင်းတုန်းက ထုတ်ပြောခဲ့တာဖြစ်ပြီး ဖမ်းဆီး အကျဉ်းချ ခံထားရသူ မြန်မာအစိုးရ ခေါင်းဆောင် ဒေါ်အောင်ဆန်းစုကြည် ပြန်လည်လွတ်မြောက်ရေးအတွက်လည်း တောင်းဆိုခဲ့ပါတယ်။
အာဏာသိမ်းစစ်တပ်ဟာ ရွေးကောက်ပွဲကို အပိုင်းတွေခွဲပြီး ကျင်းပမယ်လို့ ကြေညာထားပြီး အပိုင်း ၁ မဲပေးမှုတွေကိုတော့ ဒီဇင်ဘာ ၂၈ ရက်နေ့မှာ လျာထားပါတယ်။ တစ်ဖက်မှာတော့ အာဏာသိမ်း စစ်တပ်ကို အစိုးရအဖြစ် လက်ခံ အသိအမှတ်ပြုဖို့ ပြည်သူတွေက ဖီဆန်နေကြဆဲ ဖြစ်သလို စစ်တပ်က ဦးစီးမယ့် ရွေးကောက်ပွဲဟာ စစ်မှန်မှု၊ တရားမျှတမှု မရှိနိုင်ကြောင်း လူ့အခွင့်အရေး၊ ဒီမိုကရေစီရေး အင်အားစုတွေက ဝေဖန်ထားပါတယ်။
Public Service Announcement
လက်ရှိ အခြေအနေကို ကြည့်မယ်ဆိုရင် မြန်မာဟာ တကယ်တမ်းလိုအပ်နေတဲ့အစုအဖွဲ့ပေါင်းစုံ ပါဝင်တဲ့နိုင်ငံရေးဆွေးနွေးမှုတွေကိုလုပ်ဆောင်မယ့်အစား ရွေးကောက်ပွဲကိုပဲ စီစဉ်ခဲ့ကြောင်း၊ ဒီအခြေအနေမျိုးမှာ အာဆီယံဟာ မြန်မာနဲ့ ပြန်လည် ထိတွေ့ ဆက်ဆံမှုတွေ စတင်ဖို့ ခက်ခဲမှာ သေချာကြောင်း ဆီဟာဆက်ခ်က ဆိုပါတယ်။
မြန်မာနိုင်ငံမှာ ရွေးကောက်ပွဲ မတိုင်ခင် ထိရောက်တဲ့ နိုင်ငံရေးဆွေးနွေးမှုတွေအရင်စတင်သင့်တယ်ဆိုတဲ့ သဘောထားနဲ့ ပတ်သက်လို့ အာဆီယံက ဆက်ပြီး ညီညီညွတ်ညွတ် လက်ခံထားမယ်လို့ မျှော်လင့်ကြောင်း သူက ပြောပါတယ်။
မြန်မာနိုင်ငံမှာ ကျင်းပတဲ့ ရွေးကောက်ပွဲဟာ လွတ်လပ်ပြီး ယုံကြည်ရတဲ့ အခြေအနေ ဖြစ်စေချင်ကြောင်း၊ ဒါပေမဲ့ လက်ရှိမှာတော့ ဒါမျိုးမဟုတ်မှန်း သူတို့အနေနဲ့ သိထားပြီးသားဖြစ်ကြောင်း ထိုင်းနိုင်ငံခြားရေး ဝန်ကြီးက ဆိုပါတယ်။ လက်ရှိ အခြေအနေတွေအရ ထိုင်းရဲ့ ရပ်တည်မှုဟာ ရွေးကောက်ပွဲကို အသိအမှတ်ပြုမယ့် သဘောထားမျိုး မဖြစ်နိုင်လောက်ဘူးလို့လည်း ဆီဟာဆက်ခ်က ပြောကြားသွားပါတယ်။
ဒါပေမဲ့ လက်ရှိ ရွေးကောက်ပွဲကပြီးပြည့်စုံမှု မရှိဘူး ဆိုရင်တောင်မှ နောက်ထပ်ကြုံလာမယ့် မဲပေးမှုတွေအတွက် အခြေခံ အုတ်မြစ်ကောင်း ဖြစ်လာနိုင်တာမျိုးကိုတော့ မျှော်လင့်တယ်လို့ ဆီဟာဆက်ခ်က ဆိုပါတယ်။
သူက၂၀၁၀ရွေးကောက်ပွဲဟာလည်းပြီးပြည့်စုံတာမျိုး မဟုတ်ခဲ့ပေမယ့် အဲဒီနောက် ကျင်းပတဲ့ ရွေးကောက်ပွဲမှာ ဒေါ်အောင်ဆန်းစုကြည် ဦးဆောင်တဲ့အမျိုးသားဒီမိုကရေစီအဖွဲ့ချုပ် (NLD)ပါတီက အနိုင်ရခဲ့တာကို ဥပမာ အနေနဲ့ ထောက်ပြခဲ့ပါတယ်။
ဝန်ကြီးက လက်ရှိမှာတော့ ဒေါ်အောင်ဆန်းစုကြည်ကို ပြန်လွှတ်ပေးဖို့ အချိန်အခါ သင့်နေပြီလို့လည်း ဆက်ပြောပါတယ်။တစ်ခါတလေပြောသင့်ပြောထိုက်တာကိုဘာမှငဲ့မနေဘဲပြောကြရမှာဖြစ်တယ်လို့ ဆီဟာဆက်ခ်က ဆိုပါတယ်။ သူကဒေါ်အောင်ဆန်းစုကြည်ဟာ ချုပ်နှောင်ခံထားရတာ အရမ်းကြာနေပြီဖြစ်ကြောင်း၊ ဒေါ်အောင်ဆန်းစုကြည်က အသက်လည်း ရနေပြီဖြစ်ပြီး သူ့ရဲ့ ကျန်းမာရေး အခြေအနေကိုလည်း တိတိကျကျ ဘာမှ မသိရကြောင်း၊ ဒီတော့ သူ့ကို ပြန်လွှတ်ပေးဖို့ ဆိုတာက အရင်ဆုံး ဒါမှမဟုတ် ချက်ချင်းလုပ်သင့်တဲ့ ကိစ္စဖြစ်ကြောင်း ဆီဟာဆက်ခ်က ပြောကြားသွားပါတယ်။
ကိုးကား- Reuters၊ AFP
