နိုဝင်ဘာ-၂၆၊ ၂၀၂၅။ဇေအောင်/People’s Spring
မဲရုံသင်တန်းပေးနေတဲ့ မုံရွာမြို့ပေါ်မှာ ဗုံးပေါက်ကွဲမှုနဲ့ ပစ်ခတ်မှုတွေ ဖြစ်ပွားခဲ့ကြောင်း ဒေသခံများက ပြောပါတယ်။
ဒီကနေ့ နိုဝင်ဘာ ၂၆ရက် မနက် ၆ နာရီခန့်က မုံရွာမြို့ပေါ်က ကြံ့ဖွံ့ပါတီရုံးရှေ့မှာ ဗုံးပေါက်ကွဲမှုဖြစ်ပွားခဲ့ပြီး ထိခိုက်ပျက်စီးမှုမရှိဘူးလို့ ဒေသခံတွေက ပြောပါတယ်။
“မနေ့ညကတည်းက ပေါက်ကွဲသံတွေရော၊ သေနတ်ပစ်သံတွေကော ကြားနေရတာ။ ဒီမနက်လည်း ကြံ့ဖွံ့ရုံးရှေ့ ပစ်သွားတာပြောတယ်။ လူထိခိုက်သံတော့ မကြားဘူး”လို့ မုံရွာမြို့ခံ အမျိုးသားတစ်ဦးက ပြောပါတယ်။
Public Service Announcement
မနေ့ညကဖြစ်စဥ်နဲ့ ပတ်သတ်လို့ အခြားဒေသခံတဦးကကလည်း “မြို့ပေါ်သေနတ်သံတချို့ကြားရတယ်။ ၁၀ ချက်ကျော်တယ်”လို့ ပြောပါတယ်။ မနေ့ညက ပစ်ခတ်မှုဖြစ်စဥ်နဲ့ပတ်သက်ပြီး အတိအကျ မသိရသေးပါဘူး။
ဒီကနေ့ မနက်ပိုင်းက ပေါက်ကွဲမှုဖြစ်ပွားပြီးနောက် စစ်တပ်က မုံရွာမြို့ပေါ်မှာ ကင်းပတ်ပြီး စစ်ဆေးနေတယ်လို့ မြို့ခံတွေက ပြောပါတယ်။
စစ်ကောင်စီဟာ မုံရွာမြို့ပေါ်မှာ မုံရွာခရိုင်အတွင်းက Non CDM ဝန်ထမ်းတွေကို ခေါ်ယူပြီး မဲရုံနဲ့ပတ်သက်တဲ့သင်တန်းတွေ ပေးနေတယ်လို့ မြို့ခံတွေက ပြောပါတယ်။
စစ်ကောင်စီလုပ်မယ့်ရွေးကောက်ပွဲကို လက်မခံကြောင်းနဲ့ ပြည်သူလူထုအနေနဲ့ ဆန့်ကျင်ကြဖို့ တော်လှန်ရေး အင်အားစုတွေက သတိပေးထားပါတယ်။
