ဒီဇင်ဘာ-၄၊၂၀၂၅။ ဆန်အောင်/People’s Spring
အာဏာသိမ်းစစ်တပ်ရဲ့ အတုအယောင်ရွေးကောက်ပွဲကို ရှမ်းပြည်သူလူထုတွေ ပူးပေါင်းဆောင်ရွက်ခြင်းမပြုဖို့ သျှမ်း(ရှမ်း)လူငယ်အရပ်ဘက်အဖွဲ့အစည်းတွေက ကြေညာချက်ထုတ်ပြန်တိုက်တွန်းလိုက်ပါတယ်။
စစ်တပ်လုပ်မယ့် အတုအယောင်ရွေးကောက်ပွဲနဲ့ဆိုင်တဲ့ ထုတ်ပြန်ချက်ကို ရှမ်းလူငယ်အဖွဲ့တွေက ဒီဇင်ဘာ ၃ရက်မှာ ထုတ်ပြန်ခဲ့တာဖြစ်ပြီး စစ်ကောင်စီရဲ့ အတုအယောင်ရွေးကောက်ပွဲကိုလည်းတက်နိုင်တဲ့နည်းနဲ့တိုက်ဖျက်မယ်လို့ အသိပေးထားပါတယ်။
“စစ်ကောင်စီက အခုသူတို့လုပ်မယ့်အတုအယောင်ရွေးကောက်ပွဲကနေတရားဝင်မှုကို ရှာနေတာဖြစ်ပါတယ်။ တကယ်လို့ ကျမတို့ ဒီပြည်သူတွေအားလုံးကနေ စစ်ကောင်စီကိုတရားဝင်မှုမပေးဖို့အားလုံးညီညွတ်ကြဖို့ ညီညီညွတ်ညွတ် ဆန့်ကျင်ကြဖို့လိုအပ်တယ်လို့ပြောချင်ပါတယ်”လို့ ကြေညာချက်ပြောရေးဆိုခွင့်ရှိတဲ့ ရှမ်းလူငယ်တက်ကြွလှုပ်ရှားသူ ဗန်ဒါကပြောပါတယ်။
Public Service Announcement
ဒါ့အပြင် ရှမ်းလက်နက်ကိုင်တပ်ဖွဲ့တွေအနေနဲ့လည်းစစ်ကောင်စီကိုတရားဝင်မှုဖြစ်စေမယ့် ရွေးကောက်ပွဲတွေမှာ ပူးပေါင်းဆောင်ရွက်မှု မလုပ်ဖို့ တိုက်တွန်းခဲ့ပါတယ်။
“သူတို့(ရှမ်းတပ်ဖွဲ့တွေ)အနေနဲ့ ဒီဟာတွေကိုတိုက်ရိုက်မဆန့်ကျင်နိုင်ဘူးဆိုရင်တောင်မှ ပါဝင်ပတ်သက်ပြီးမကူညီကြဖို့အနည်းဆုံးတော့ ဒီလောက်တော့လုပ်ပေးကြဖို့တိုက်တွန်းတောင်းဆိုချင်ပါတယ်” လို့ ဗန်ဒါက ပြောပါတယ်။
ရှမ်းတော်လှန်ရေးအဖွဲ့အစည်းတွေလို့ အမည်ခံထားတဲ့ ရှမ်းပြည်ပြန်လည်ထူထောင်ရေးကောင်စီ(RCSS)နဲ့ ရှမ်းပြည်တိုးတက်ရေးပါတီ(SSPP)တို့ဟာ အာဏာသိမ်းစစ်တပ်နဲ့ ထိတွေ့ဆက်ဆံနေသလို အာဏာသိမ်းစစ်တပ်ကိုထိထိရောက်ရောက်တိုက်ခိုက်တာမရှိဘဲ တိုက်ပွဲဖြစ်ပွားမှုမရှိသလောက်နည်းပါးပါတယ်။
ဒီမိုကရေစီနိုင်ငံတခုရဲ့ အခြေခံအကျဆုံး အင်္ဂါရပ်တခုမှာ လွတ်လပ်ပြီးတရားမျှတသော ရွေးကောက်ပွဲဖြစ်ပြီး လွတ်လပ်ပြီးတရားမျှတတဲ့ ရွေးကောက်ပွဲဆိုတာဟာလည်း အရပ်သား ပြည်သူတွေကလက်ခံပြီး ပါဝင်သင့်ပါဝင်ထိုက်သူတွေ ပါဝင်တဲ့ အကြမ်းဖက်မှု ကင်းစင်တဲ့ ရေခံမြေခံမှာသာ ပြုလုပ်နိုင်တာလို့လည်း ရှမ်းလူငယ်အဖွဲ့တွေရဲ့ ထုတ်ပြန်ချက်မှာ ဖော်ပြပါတယ်။
လက်ရှိ စစ်ကောင်စီဟာ ၂၀၂၁ တိုင်းပြည်ရဲ့ အာဏာကို အဓမ္မသိမ်းယူချိန်က စလို့ အခုထိ ရှမ်းပြည်နဲ့တကွ နိုင်ငံတစ်ဝှမ်းလုံးရှိ ရဟန်းရှင်လူ ပြည်သူလူထုတို့ကို ဖမ်းဆီးသတ်ဖြတ်ခြင်း၊ လေကြောင်းဗုံးကြဲခြင်း၊ ကျေးရွာများ၊အိုးအိမ်များကို မီးရှို့ဖျက်ဆီးခြင်း စတာတွေကို နေ့စဉ် လုပ်ဆောင်နေကြောင်း ရှမ်းလူငယ်အဖွဲ့တွေက ထောက်ပြထားပါတယ်။
ပြည်သူလူထုကို နေ့စဉ်အကြမ်းဖက်နေတဲ့ စစ်ကောင်စီ ပြုလုပ်မယ့် ရွေးကောက်ပွဲ ဆိုတာဟာလည်း နိုင်ငံတကာ မျက်နှာစာမှာ စစ်တပ်ရဲ့ တရားဝင်မှုနဲ့ စစ်တပ်ကျူးလွန်တဲ့ ရာဇဝတ်မှုတွေကို ဖုံးကွယ်ဖို့သာဖြစ်ကြောင်းလည်း ရှမ်းလူငယ်အဖွဲ့တွေက ထုတ်ပြန်ပါတယ်။
“ကျွန်ုပ်တို့သျှမ်းပြည်သူလူထုနှင့် သျှမ်းလူငယ်များလိုလားသည်မှာ မိမိတို့ကံကြမ္မာကို မိမိတို့ ဖန်တီးခွင့်ရှိသော ဖက်ဒရယ်ဒီမိုကရေစီဖြစ်ပါသည်။ စစ်ကောင်စီ၏ အတုအယောင်ရွေးကောက်ပွဲ မှာ ၂ဝဝ၈ ဖွဲ့စည်းပုံအခြေခံဥပဒေကိုပြန်လည် အသက်သွင်းမည်ဖြစ်ရာ ဖက်ဒရယ်ဒီမိုကရေစီနှင့် ပိုမို ဝေးကွာသွားစေမည်သာဖြစ်ပါသည်” လို့လည်း ကြေညာချက်မှာရေးသားထားပါတယ်။
ဒါ့အပြင် သျှမ်းပြည်အတွင်းမှ ရွေးကောက်ပွဲမှာ ပါဝင်သင့် ပါဝင်ထိုက်တဲ့သူတွေ ရွေးကောက်ပွဲမှာ မပါဝင်တာ ပြည်သူလူထု အသိပင်ဖြစ်တယ်လို့လည်း ဖော်ပြပါတယ်။ ရှမ်းလူထုထောက်ခံမှုရှိပြီး ပြီးခဲ့တဲ့ ရွေးကောက်ပွဲတွေမှာ ရှမ်းပြည်တွင်း နေရာများစွာ အနိုင်ရခဲ့တဲ့ SNLDပါတီဟာ စစ်တပ်ရွေးကောက်ပွဲမှာ ပါဝင်ခြင်းမရှိသလို စစ်တပ်ဆီမှာပါတီမှတ်ပုံတင်တာကိုပါ ပြုလုပ် ခြင်းမရှိခဲ့ပါဘူး။
