ဒီဇင်ဘာ-၁၇၊၂၀၂၅ ၊ မိုမို/People’s Spring
စစ်ကိုင်းတိုင်း၊ ရေဦးမြို့ရဲ့စစ်ကောင်စီတပ်စစ်ဆေးရေးဂိတ်မှာ တာဝန်ကျနေတဲ့ တပ်သားတစ်ဦး သေနတ် ၂လက်ယူလာပြီး အလင်းဝင်လာတယ်လို့ ရေဦးမြို့နယ်ပြည်သူ့ကာကွယ်ရေးအဖွဲ့(ပကဖ) တာဝန်ရှိသူက ပြောပါတယ်။
ဒီကနေ့ (ဒီဇင်ဘာ ၁၇ ရက်) မနက် ၈နာရီဝန်းကျင်က ရေဦးမြို့ ကြာဖူးအဝိုင်း စစ်ကောင်စီစစ်ဆေးရေးဂိတ်မှာ တာဝန်ကျနေတဲ့ တပ်သားတစ်ဦးက MA1 တစ်လက်နဲ့ G-3တစ်လက် ယူလာခဲ့တယ်လို့ ဆိုပါတယ်။
အလင်းဝင်လာတဲ့ ရွှေဘိုမြို့နယ်အခြေစိုက်ထောက်ပို့တပ်က တပ်သား ကျော်မျိုးသူ အလင်းဝင်လာရတဲ့အကြောင်းအရင်းကို မေးမြန်းနေဆဲဖြစ်တယ်လို့ အသိပေးပါတယ်။
Public Service Announcement
“ ဒီနေ့တော့ မှတ်တမ်းမယူနိုင်သေးဘူး” လို့ ရေဦးပကဖ တာဝန်ရှိသူက အလင်းဝင်တပ်သားနဲ့ပတ်သက်ပြီး လူထုနွေဦးကို ပြောပါတယ်။
အခုတပ်သားအပြင် စစ်တပ်အာဏာသိမ်းပြီးနောက် စစ်ကောင်စီတပ် ဗိုလ်ကြီးတစ်ဦးအပါအဝင် ရဲနဲ့ စစ်သားရှစ်ဦးဟာ ရေဦးပကဖထံ အလင်းဝင်လာပါတယ်။
ရေဦးမြို့ပေါ်မှာ စစ်ကောင်စီတပ်က ကြာဖူးအဝိုင်း၊တိုင်းရင်းဆေးရုံ၊ ရဲစခန်း ၊ ရွှေကျီးမင်းဂိတ် နဲ့ မြို့မြောက်ဘက်ဂိတ်ဆိုပြီး စစ်ဆေးရေးဂိတ်စခန်းတွေမှာ အင်အား ၃၀၀ဝန်းကျင် နဲ့တပ်စွဲထားတာဖြစ်ပါတယ်။
ဒါ့အပြင် ရေဦးမြို့နယ်မှာ စစ်ကောင်စီတပ်က မြို့ပေါ်မှာသာ တပ်စွဲထားနိုင်ပြီး ကျေးရွာ ၁၉၁ ရွာအနက် အောင်သာယာကျေးရွာကလွဲရင် ကျန်ကျေးရွာတွေကို ပြည်သူ့ကာကွယ်ရေးအဖွဲ့တွေက နယ်မြေစိုးမှုရရှိထားတယ်လို့ သိရပါတယ်။
