ဒီဇင်ဘာ-၁၉၊ ၂၀၂၅ ဟာနာဆန်/ People’s Spring
မန္တလေးတိုင်း၊ ကျောက်ဆည်မြို့ကနေ ပုပ္ပါးဒေသကို အလည်သွားရင်း ပျောက်ဆုံးသွားတဲ့ မိသားစု ၂ စုက မိသားစုဝင် ၆ ဦးဟာ တစ်လခွဲကျော်အကြာမှာ ပြန်လည်ရောက်ရှိလာကြောင်း နီးစပ်သူတွေက ပြောပါတယ်။
ပြီးခဲ့တဲ့ နိုဝင်ဘာ ၂ ရက်က မန္တလေးတိုင်း၊ ကျောက်ဆည်မြို့ကနေ ပုပ္ပါးကို အလည်သွားတဲ့ မိသားစု ၂စုဟာ ပုပ္ပါးမှာ ရောက်ရှိနေချိန် အဆက်အသွယ်ပြတ်တောက်သွားခဲ့ပါတယ်။
ဆွေမျိုးသားချင်းတွေဟာ လိုက်လံရှာဖွေခဲ့ကြပေမဲ့ မတွေ့ခဲ့ကြဘဲ လူမှုကွန်ရက်ကနေတဆင့် သတင်းပေးကြဖို့ မေတ္တာရပ်ခံခဲ့ပါတယ်။
Public Service Announcement
အဲဒီနောက် သတင်းအစအနမရတော့ဘဲ တစ်လခွဲကျော်အကြာ မနေ့က ဒီဇင်ဘာ ၁၈ ရက်မှာတော့ ကျောက်ဆည်မြို့က နေအိမ်ကို ၆ ဦးလုံး ပြန်လည်ရောက်ရှိလာကြောင်း နီးစပ်သူတွေက ပြောပါတယ်။
“ အားလုံး ကျန်းကျန်းမာမာပဲ ပြန်လည် ရောက်ရှိလာပါတယ်” လို့ နီးစပ်သူတစ်ဦးက ပြောပါတယ်။
ပျောက်ဆုံးခဲ့သူတွေဟာ ကျောက်ဆည်မြို့က ဖိနပ်ဆိုင်ပိုင်ရှင် ဇနီးမောင်နှံ၊ ၎င်းတို့၏ သားငယ်၊ မိတ်ဆွေ အမျိုးသမီး ၂ဦးနဲ့ ကလေးတစ်ဦးတို့ ဖြစ်ပါတယ်။
ပြန်တွေ့တာနဲ့ပတ်သက်ပြီး ၎င်းတို့ရဲ့မိသားစုဝင်တွေဆီ ဆက်သွယ်မေးမြန်းပေမဲ့ ဖုန်းလက်ခံဖြေကြားတာ မရှိပါဘူး။ “ အခုချိန်မှာ အလုံးစုံ ဖြေပေးလို့ မရသေးလို့ နားလည်ပေးပါ” လို့ မိသားစုနဲ့ နီးစပ်သူက ပြောပါတယ်။
ပြီးခဲ့တဲ့လပိုင်းအတွင်းကလည်း ပုပ္ပါးဒေသမှာ စစ်တပ်လက်အောက်ခံသစ်တောဝန်ထမ်းတွေနဲ့ အတူ သစ်ပင်လာစိုက်တယ်လို့ဆိုတဲ့ ရေနံ့သာဒင်းဂါးပါအဖွဲ့ကို လက်နက်ကိုင်အဖွဲ့တစ်ဖွဲ့က ယာယီထိန်းသိမ်းပြီး ပြန်လွှတ်ပေးခဲ့ဖူးပါတယ်။
