'/%3E%3C/svg%3E){kind=small}
ဒီဇင်ဘာ-၂၆၊၂၀၂၅။ဇော်ရမ်း/People’s Spring
ကချင်ပြည်နယ်၊ မြစ်ကြီးနားမြို့၊ မြောက်ပိုင်းတိုင်းစစ်ဌာနချုပ်(မပခ) လေတပ်ဝင်းအတွင်းမှာ ဒီနေ့(ဒီဇင်ဘာ ၂၆ရက်) မနက်ပိုင်းမှာ ပေါက်ကွဲသံတွေဆက်လက်ထွက်ပေါ်နေပြီး လက်နက်ကြီးပစ်ခတ်သံတွေလည်း ကြားနေရတယ်လို့ မြို့ခံတွေက ပြောပါတယ်။
” ဒီနေ့လည်း မနက် ၇နာရီကတည်းက ဆူပွက်နေတာပဲ။ ပေါက်ကွဲသံတွေကြားနေရတယ်။ မြစ်( ဧရာဝတီမြစ်) အရှေ့ဘက်ကမ်းကရော၊ အနောက်ဖက်ကမ်းကရောကြားရတာ”လို့ မြစ်ကြီးနားမြို့ခံတစ်ဦးက ပြောပါတယ်။
မြစ်ကြီးနားမြို့၊ မော်ဖောင်းရပ်ကွက်၊ နမ့်ပေါင်ကျေးရွာမှာရှိတဲ့ လေတပ်ဝင်းဟာ ဒီဇင်ဘာ ၂၅ရက် မနက် ၉နာရီခန့်မှာ တိုက်ခိုက်ခံရပြီး ဒီနေ့မနက်မှာလည်း ပေါက်ကွဲသံတွေ ဆက်လက်ထွက်ပေါ်နေတာဖြစ်ပါတယ်။
Public Service Announcement
” နမ့်ပေါင်ထဲကနေ လက်နက်ကြီးနဲ့ ပြန်ပစ်သံလည်းကြားတယ်။ ဆယ်မိနစ်တစ်ခါလောက် ကြားနေရတယ်။ စစ်ရေးကတော့ ဘာမှန်း ကျနော်တို့ပြောမတတ်ဘူး”လို့ မော်ဖောင်းရပ်ကွက်မှာ နေသူတစ်ဦးကပြောပါတယ်။
မနေ့က ဖြစ်စဉ်ဟာ နမ့်ပေါင်လေတပ်ထဲကို ရှော့တိုက်ဒုန်းနဲ့ တိုက်ခိုက်ခံရတာဖြစ်ပြီး တိုက်လေယာဉ်တစ်စီးနဲ့နဲ့ ဟတ်စကီးတစ်စီးကို ထိခိုက်ပျက်စီးမှုရှိခဲ့တယ်လို့ သတင်းတွေ ထွက်ခဲ့ပါတယ်။မြောက်ပိုင်းတိုင်းစစ်ဌာနချုပ် လေတပ်ဝင်း တိုက်ခိုက်ခံရမှုနဲ့ ဒီနေ့ထွက်ပေါ်နေတဲ့ပေါက်ကွဲသံတွေနဲ့ပတ်သက်ပြီးအသေးစိတ်အခြေအနေကို မသိရှိရသေးပါဘူး။
လေတပ်ဝင်းတိုက်ခိုက်ခံရပြီးတဲ့နောက် စစ်ကောင်စီတပ်က ကချင်လွတ်လပ်ရေးတပ်မတော်(KIA) ထိန်းချုပ်ဒေသ လိုင်ဇာကို လေကြောင်းကနေ ဗုံးကြဲခဲ့ပါတယ်။ လက်ရှိမှာ KIAဟာ ဗန်းမော်မြို့သိမ်းတိုက်ပွဲကိုအရှိန်မြှင့်နေပြီး တိုက်ပွဲတွေအပြင်းအထန်ဖြစ်နေတယ်လို့ သတင်းရရှိပါတယ်။
