ဒီဇင်ဘာ-၃၁၊၂၀၂၅။အိမ်သွင်/People’s Spring
ရှမ်းပြည်နယ်ရဲ့မြို့တော် တောင်ကြီးမြို့မှာ အိမ်ကနေ ပြင်ပထွက်ရာက ပျောက်ဆုံးနေတဲ့ ၉ တန်းကျောင်းသားကို ၆ရက်အကြာမှာ သေဆုံးလျက်ပြန်တွေ့ခဲ့ရပြီး အမှုကို ဖော်ထုတ်ပေးဖို့ မြို့ခံတွေက တောင်းဆိုနေကြပါတယ်။
တောင်ကြီးမြို့၊ဘုရားဖြူရပ်ကွက်ကအသက် ၁၆နှစ်အရွယ်မောင်အနဂ္ဂရဲထက်ဟာဒီဇင်ဘာလ ၂၄ရက်နေ့ညနေကအိမ်ကနေ ဆိုင်ကယ်နဲ့ထွက်သွားပြီး ပြန်မရောက်လာဘဲ ပျောက်ဆုံးခဲ့တာဖြစ်ပါတယ်။
မောင်အနဂ္ဂရဲထက်ဟာ တောင်ကြီးမြို့၊အထက(၄)က ၉တန်းကျောင်းသားဖြစ်ပါတယ်။ ဒီဇင်ဘာလ ၃၀ရက်နေ့မှာတော့ တောင်ကြီးမြို့၊ အထက(၂)အနီးက ရေကန်ထဲမှာ သေဆုံးလျက်ပြန်တွေ့ရတာပါ။
Public Service Announcement
“ အသတ်ခံရတာလို့ ပြောကြတယ်။ရေကန်ထဲမှာ အဝတ်အစားတွေဝတ်လျက်ပြန်ပေါ်လာတာပါ။ရေဆင်းကူးတာမဟုတ်ဘူး။အခုက ဘာမှန်းမသိရဘဲ တရားခံကပျောက်နေတယ်” လို့ ဘုရားဖြူရပ်ကွက်က ဒေသခံတစ်ဦးကပြောပါတယ်။
မောင်အနဂ္ဂရဲထက်ရဲ့ နာရေးကို ဒီဇင်ဘာလ ၃၁ရက် နေ့လယ်ပိုင်းမှာ တောင်ကြီးမြို့၊ သင်္ခါရသုသာန်မှာ ပြုလုပ်မယ်လို့ မိသားစုဝင်တွေက အသိပေးထားပါတယ်။
တောင်ကြီးမြို့ဟာစစ်တပ်အာဏာသိမ်းပြီးနောက်ပိုင်း တရားဥပဒေစိုးမိုးမှုကင်းမဲ့နေတဲ့တခြားမြို့တွေလိုပဲခိုးမှုတွေ၊လုယက်မှုတွေမကြာခဏဖြစ်နေပါတယ်။ မောင်အနဂ္ဂရဲထက်ပျောက်ဆုံးမှုနဲ့ သေဆုံးမှုအတွက် ဖြစ်စဉ်အမှန်ကို သိရှိလိုကြောင်းနဲ့ တရားခံကို ဝိုင်းဝန်းဖော်ထုတ်ကြဖို့ ဒေသခံတွေက လူမှုကွန်ရက်ကနေ တောင်းဆိုနေကြပါတယ်။
“ ကျောင်းသားတစ်ယောက် ပျောက်ပြီးသေဆုံးတာ သွေးရိုးသားရိုးအမှုတစ်ခုလို ပြီးသွားလို့မရဘူး။ ပုဂ္ဂိုလ်ရေးလား၊လူသတ်မှုလားရှင်းရှင်းလင်းလင်းသိဖို့လိုတယ်” လို့တောင်ကြီးမြို့ခံတစ်ဦးကပြောပါတယ်။
တောင်ကြီးမြို့ဟာရှမ်းပြည်နယ်ရဲ့မြို့တော်ဖြစ်ပြီး စစ်တပ်ကအင်အားအများအပြားနဲ့ ထိန်းချုပ်ထားတဲ့မြို့ဖြစ်ပါတယ်။ကချင်ပြည်နယ်ရဲ့မြို့တော်မြစ်
ကြီးနားမြို့မှာလည်း ခရစ်စမတ်ညက အမျိုးသမီးတစ်ဦးကိုလူတစ်စုကအုပ်စုဖွဲ့အဓမ္မပြုကျင့်ပြီး အမှိုက်ပုံမှာ စွန့်ပစ်ထားခဲ့သလို လူငယ်တစ်ဦးနဲ့ကားတစ်စီးပြန်ပေးဆွဲခဲ့တဲ့ ဖြစ်စဉ်ဖြစ်ပွားခဲ့ပါတယ်။ အဲ့ဒီအမှုလည်း တရားခံဖော်ထုတ်နိုင်ခြင်းမရှိသေးပါဘူး။
