ဇန်နဝါရီ-၂၅၊ ၂၀၂၆။ ထားမြတ်/People’s Spring
အာဏာသိမ်းစစ်တပ် လုပ်ဆောင်နေတဲ့ ရွေးကောက်ပွဲဟာ လူထုတွေကို တဖက်လှည့်နဲ့ မျက်လှည့်ပြပြီး အာဏာသိမ်းမှုထပ်မံ ကျူးလွန်တာဖြစ်ကြောင်း ကရင်လူငယ်အစည်းအရုံး(KYO) ပြောရေးဆိုခွင့်ရှိသူ စောအယ်ထီးကော်က ပြောကြားပါတယ်။
ကရင်လူငယ်အစည်းအရုံး(KYO)ဟာကရင်အမျိုးသားအစည်းအရုံး (KNU) အုပ်ချုပ်နယ်မြေတွေမှာ ဒေသခံ ပြည်သူတွေနဲ့ လက်တွဲပြီး စစ်ကောင်စီ ရွေးကောက်ပွဲ ဆန့်ကျင်တဲ့ ဆန္ဒထုတ်ဖော်မှုတွေ ဆက်လက် ပြုလုပ်နေတဲ့ အခြေအနေနဲ့ပတ်သက်ပြီး အခုလို ပြောကြားလာတာဖြစ်ပါတယ်။
“ဒီရွေးကောက်ပွဲကို လုံး၀ လက်မခံကြောင်းကို အဆုံးအစွန်ထိ ကျနော်တို့ဆန္ဒကို ကျနော်တို့ ထုတ်ဖော်ပြသခြင်းဖြစ်တယ်။ ဒီအကြမ်းဖက်စစ်တပ်ကလုပ်တဲ့အတုအယောင်ရွေးကောက်ပွဲကိုဘယ်အပိုင်းမှာပဲဆက်လုပ်ဆက်လုပ်နေပါစေ၊ကျနော်တို့ကဆန့်ကျင်ကန့်ကွက်သွားမယ်ဆိုတာ သတင်းစကားပေးချင်တာ တခုပေါ့” လို့ စောအယ်ထီးကော်က စစ်တပ် ရွေးကောက်ပွဲ ဆန့်ကျင်မှုတွေ ဆက်လက်လုပ်ဆောင်နေတဲ့အပေါ် ပြောပါတယ်။
Public Service Announcement
မြန်မာနိုင်ငံမှာ စစ်အာဏာရှင်တွေဟာ အာဏာသိမ်းမှုကို အကြိမ်ကြိမ် ကျူးလွန်ခဲ့ကြောင်း၊ အာဏာသိမ်းစစ်တပ်က ကျင်းပမနေတဲ့ ၂၀၂၅- ၂၀၂၆ အတုအယောင် ရွေးကောက်ပွဲ ဟာလည်း အာဏာသိမ်းမှုထပ်မံ ကျူးလွန်ခြင်းပင်ဖြစ်ကြောင်း စောအယ်ထီးကော်က ပြောပါတယ်။
“ဒါတွေသည် တဖက်လှည့်နဲ့လူထုဆီက အနုကြမ်းစီးပြီးမှာ ဒါက အာဏာသိမ်းမှုတရပ်လို့ ရှုမြင်တယ်။ လက်ရှိ စစ်တပ်သည် သူတို့ နိုင်ငံရေးထွက်ပေါက်အတွက် မျက်လှည့်ပြပြီး တဖက်လှည့်နဲ့ အာဏာသိမ်းမှုကို ကျူးလွန်တယ်လို့ မှတ်ချက်ပြုချင်တယ်” လို့ စောအယ်ထီးကော်က ပြောပါတယ်။
KYOနဲ့ KNU ခရိုင် အသီးသီးက ဒေသခံတွေဟာ စစ်တပ် ရွေးကောက်ပွဲ ဆန့်ကျင်တဲ့ ဆန္ဒထုတ်ဖော်မှုတွေ ဆက်လက် လုပ်ဆောင်ခဲ့ကြောင်း KYOကဒီနေ့ ဇန်နဝါရီ ၂၅ရက်မှာ ထုတ်ပြန်ခဲ့ပါတယ်။
KNU ညောင်လေးပင်ခရိုင်ဆောထိမြို့နယ်(ရွှေကျင်မြို့နယ်)၊ လယ်ဒိုမြို့နယ်(ကျောက်ကြီးမြို့နယ်)နဲ့ မူး(မုန်း)မြို့နယ်တွေမှာ လူထုတွေ ပါဝင်တဲ့ အတုအယောင်ရွေးကောက်ပွဲ ဆန့်ကျင်ကြောင်း လှုပ်ရှားမှု မှတ်တမ်းတွေကို ဖော်ပြထားပါတယ်။
အလားတူ KNU ဖားအံခရိုင်မှာ ပြုလုပ်ခဲ့တဲ့ စစ်တပ်ရွေးကောက်ပွဲ ဆန့်ကျင်ရေး လှုပ်ရှားမှု ဓာတ်ပုံတွေလည်း ဖော်ပြပါတယ်။ ဒီလှုပ်ရှားမှုတွေဟာ မနေ့က ဇန်နဝါရီ ၂၄ရက် အပါအဝင် ပြီးခဲ့တဲ့ ရက်ပိုင်းအတွင်းက ပြုလုပ်ခဲ့တဲ့ လှုပ်ရှားမှုတွေ ဖြစ်တယ်လို့ စောအယ်ထီးကော်က ပြောပြပါတယ်။
KNU ဖားအံခရိုင်မှာ ပြုလုပ်ခဲ့တဲ့ စစ်တပ်ရွေးကောက်ပွဲ လှုပ်ရှားမှုမှာ သမိုင်းတရားခံ မဖြစ်ဖို့ အတုအယောင် ရွေးကောက်ပွဲကို ဆန့်ကျင်စို့၊ စစ်တပ်သည် ရွေးကောက်ပွဲ ကျင်းပရန် အခွင့်အာဏာမရှိ၊ တရားမဝင် အတုအယောင် ရွေးကောက်ပွဲကို လူထုအားနဲ့ တိုက်ဖျက်ကြ၊ No Votes for Violence၊ No Seat for Soldiers၊ တရားမဝင် အတုအယောင်ရွေးကောက်ပွဲကို သပိတ်မှောက် ဖက်ဒရယ်လမ်းကို ရဲရဲလျှောက် စတဲ့ကြွေးကြော်သံတွေကိုင်စွဲခဲ့ကြပါတယ်။
စစ်တပ် ရွေးကောက်ပွဲ ဆန့်ကျင်တဲ့ လှုပ်ရှားမှုတွေကို KNU နယ်မြေတွေမှာ လူအင်အား ထောင်ချီပါဝင် လုပ်ဆောင်နေတာဖြစ်ပါတယ်။
ဓာတ်ပုံ – KYO)
