ဇန်နဝါရီ-၂၈၊ ၂၀၂၆။ ဒလပန်း/People’s Spring
ကရင်ပြည်နယ် ၊ မြဝတီမြို့တောင်ဘက် ဖလူးကြီးကျေးရွာအနီးကို စစ်ကောင်စီက ဒီကနေ့(ဇန်နဝါရီ ၂၈ရက်) မနက်ပိုင်းမှာ လေကြောင်းကနေ လေးကြိမ် လာရောက်ဗုံးကြဲတိုက်ခိုက်ခဲ့တယ်လို့ မြေပြင်သတင်းရင်းမြစ်တွေထံက သိရပါတယ်။
လေကြောင်းနဲ့တိုက်ခိုက်နေတဲ့အပြင် စစ်ကောင်စီတပ်ဖွဲ့ဝင်တွေဟာ လေးကေ့ကော်ဒေသအနီး ရသေ့ဂူဘက်ကလည်း စစ်ကြောင်းထိုးနေတာလည်းဖြစ်ပါတယ်။
“မနက်အစောပိုင်းထဲက စစ်ကြောင်းတိုးနေတာ။ လက်နက်ကြီးတွေကလည်း ၁၂၀ တွေပစ်နေတာ၊လေယာဉ်ကတော့ လေးကြိမ်ရှိပြီကြဲတာ ” လို့ တော်လှန်ရေးတပ်ဖွဲ့ဝင်တစ်ဦးက ပြောပါတယ်။
Public Service Announcement
စစ်ကောင်စီတပ်ဟာ မြဝတီမြို့တောင်ဘက် လက်လွတ်ခဲ့ရတဲ့ တပ်စခန်းတွေကို ပြန်ရဖို့ ပြီးခဲ့တဲ့နှစ် အောက်တိုဘာအတွင်းက စစ်ကြောင်း သုံးကြောင်းနဲ့ စစ်ရေးလှုပ်ရှားနေတာလည်းဖြစ်ပါတယ်။
စစ်ကြောင်းသုံးကြောင်းနဲ့ စစ်ကြောင်းထိုးနေပေမယ့်လည်း ကာကွယ်ရေးတပ်ဖွဲ့တွေ ပိတ်ဆို့တိုက်ခိုက်မှုတွေကြောင့် စစ်ကောင်စီတပ်တွေဟာ မင်းလက်ပံကျေးရွာအနီးကနေ ရှေ့မတိုးနိုင်သေးပါဘူး။
မင်းလက်ပံကျေးရွာကို ကာကွယ်ရေးတပ်ဖွဲ့တွေ ထိန်းချုပ်ထားပြီး စစ်တပ်က စစ်ကြောင်းထိုးနေတာဖြစ်ပါတယ်။မင်းလက်ပံကျေးရွာဟာ မြဝတီမြို့တောင်ပိုင်းဒေသအတွက် အဓိက ခံစစ်စည်းတစ်ခု ဖြစ်ပါတယ်။
