ဇန်နဝါရီ – ၂၉ ၊၂၀၂၆
မြန်မာနိုင်ငံမှာ အခြေစိုက်ပြီး အွန်လိုင်းကနေ ငွေကြေးလိမ်လည်ခဲ့တဲ့ ကျားဖြန့် ဂိုဏ်းခေါင်းဆောင်တွေ အပါအဝင် ၁၁ ဦးကို သေဒဏ်စီရင် ကွပ်မျက်လိုက်ပြီလို့ တရုတ် အစိုးရ မီဒီယာက ဖော်ပြခဲ့ပါတယ်။
ဆင်ဟွာရဲ့ သတင်းမှာတော့ ကျားဖြန့် ခေါင်းဆောင်တွေ အပါအဝင် ရာဇဝတ်သား ၁၁ ဦးကို ဇန်နဝါရီ ၂၉ ရက်နေ့မှာ ကွပ်မျက်ခဲ့တယ်လို့ ရေးသားထားခဲ့ပါတယ်။
သေဒဏ်စီရင် ခံလိုက်ရသူတွေ ဘယ်သူဘယ်ဝါ ဆိုတာကို ဆင်ဟွာက ဖော်ပြမထားခဲ့ဘဲ ၂၀၂၅ ခုနှစ်၊ စက်တင်ဘာလတုန်းက သေဒဏ်အမိန့် ချမှတ် ခံခဲ့ရတဲ့ မြန်မာနိုင်ငံမြောက်ပိုင်း အခြေစိုက် ဒုစရိုက်တရားခံတွေလို့သာ သုံးနှုန်းထားခဲ့ပါတယ်။
Public Service Announcement
စက်တင်ဘာ ၂၉ ရက်နေ့တုန်းက တရုတ်နိုင်ငံ ဝမ်ကျူး အလတ်တန်း ပြည်သူ့ တရားရုံးက မြီမိသားစုဝင်တွေ ဦးဆောင်တဲ့ ဒုစရိုက်ဂိုဏ်းသား ၁၁ ဦးကို သေဒဏ် စီရင်ချက် ချခဲ့တယ်လို့ ထုတ်ပြန်ခဲ့တာကြောင့် အခု ကွပ်မျက်ခံရသူတွေဟာ အဲဒီ ၁၁ ဦးလို့ ယူဆရပါတယ်။
အဲဒီ ၁၁ ဦးမှာ မြန်မာနိုင်ငံ ကိုးကန့်ဒေသမှာ သြဇာကြီးမားတဲ့ မိသားစု လေးစုထဲက မြီမိသားစုတွေလည်း ပါဝင်ပါတယ်။
မြီမိသားစုဟာ မြန်မာနိုင်ငံထဲက ကိုးကန့်ဒေသကို ချုပ်ကိုင်လွှမ်းမိုးထားခဲ့ပြီး လက်နက်ကိုင် အဖွဲ့အစည်းတွေရဲ့ အကာအကွယ်အောက်မှာ ကျားဖြန့်နဲ့ ဒုစရိုက်လုပ်ငန်းတွေကိုထူထောင်ခဲ့ကြောင်းတရုတ်တရားရုံးက ကြေညာခဲ့ပါတယ်။
အဲဒီ မိသားစု ဒုစရိုက် စီးပွားရေး လုပ်ငန်းဟာ တခြားမိတ်ဖက် ရင်းနှီးမြှုပ်နှံသူတွေကိုလည်း ဆွဲဆောင်နိုင်ခဲ့ပြီး ယွမ်ငွေ ၁၀ ဘီလီယံ၊ တနည်းအားဖြင့် ဒေါ်လာ ၁.၄ ဘီလီယံဖိုးလောက်ထိ ကျယ်ပြန့် ကြီးထွားခဲ့တယ်လို့လည်း သိရပါတယ်။
တရုတ်အစိုးရက အပူတပြင်း အလိုရှိနေတဲ့ မြီမိသားစုဝင်တွေကို ၂၀၂၃ ခုနှစ်၊ နိုဝင်ဘာ ၁၆ ရက်နေ့မှာ အာဏာသိမ်း မြန်မာစစ်တပ်က တရုတ်ဆီ လက်လွှဲပေးခဲ့တာ ဖြစ်ပါတယ်။
မြီမိသားစုကိုဝင်ဖမ်းချိန်မှာမိသားစုရဲ့ ဦးစီးဖြစ်သူမြီရှောက်ချန်းက ကိုယ့်ကိုယ်ကိုယ်ပစ္စတိုနဲ့ ပစ်ပြီးသတ်သေသွားတယ်လို့ စစ်ကောင်စီက သတင်းထုတ်ပြန်ခဲ့ပါတယ်။
မြီရှောက်ချန်းဟာ စစ်အစိုးရ က ကျင်းပခဲ့တဲ့ ၂၀၁၀ ရွေးကောက်ပွဲမှာ ကိုးကန့်ဒေသမြို့တော် လောက်ကိုင်မြို့ ရဲ့ပြည်နယ်လွှတ်တော်ကိုယ်စားလှယ်ဖြစ်ခဲ့ပြီး စစ်အစိုးရ ဖွဲ့ပေးတဲ့ ကိုးကန့် ကိုယ်ပိုင်အုပ်ချုပ်ခွင့်ရဒေသ ဦးစီးအဖွဲ့ဝင်လည်းဖြစ်ပါတယ်။
တချိန်က လက်တွဲဖော် မဟာမိတ်တွေဖြစ်ပေမယ့် ကျားဖြန့်အကြောင်းပြကာတရုတ်ကအလိုရှိလာချိန်မှာ မြန်မာစစ်ခေါင်းဆောင်တွေဟာ ကိုးကန့် မိသားစုဝင်တွေကို ဖမ်းဆီးပြီး တရုတ်ဆီလွှဲပေးခဲ့တာပါ။
တရုတ်လက်အပ်ခံရသူတွေဟာ တရုတ်မှာ တရားစွဲဆိုမှုတွေနဲ့ ရင်ဆိုင်ခဲ့ရပါတယ်။
မြီမိသားစုကို တရုတ်ဟာ စီရင်ချက် ချအပြီး လေး လလောက် အကြာမှာပဲ လက်တွေ့ ကွပ်မျက်မှုကို လုပ်ဆောင်ခဲ့တဲ့ သဘောပါ။
ကွပ်မျက်မှုကိုတော့တရားရုံးချုပ်ဆီကခွင့်ပြုချက် ရပြီးတဲ့နောက် တရုတ်နိုင်ငံ အရှေ့ပိုင်း ကျိကျန်းပြည်နယ်ထဲက ဝမ်ကျူးမြို့က တရားရုံး တစ်ခုရဲ့ ကွပ်ကဲမှုနဲ့ ဆောင်ရွက်ခဲ့တယ်လို့ ဆင်ဟွာက ဖော်ပြထားခဲ့ပါတယ်။
ကိုးကား – Xinhua
