“ငါတို့မဲမပေးခဲ့” ကမ်ပိန်းနဲ့ စစ်တပ်ရွေးကောက်ပွဲဆန့်ကျင်ကြောင်း စစ်ကိုင်းတိုင်းက ပြည်သူတွေ ဆန္ဒပြ

ဇန်နဝါရီ ၂၉၊၂၀၂၆။ သုည/People’s Spring

စစ်ကိုင်းတိုင်းအတွင်းက သပိတ်အဖွဲ့တွေ၊ ဒေသခံပြည်သူတွေဟာ “ငါတို့မဲမပေးခဲ့” ကမ်ပိန်းနဲ့ စစ်တပ်ရွေးကောက်ပွဲကို ဆန့်ကျင်ကြောင်း ဆန္ဒပြသပိတ်လှုပ်ရှားမှုတွေကို ဒီကနေ့ (ဇန်နဝါရီ ၂၉) မှာ ပြုလုပ်ခဲ့ပါတယ်။

စစ်ကိုင်းတိုင်း ဆားလင်းကြီးမြို့နယ်မှာ ချင်းတွင်းမြစ်ကမ်းဘေးကျေးရွာများသပိတ်ကော်မတီနဲ့ ၅/လက်ပံတောင်းသပိတ်စစ်ကြောင်းတို့မှ “ငါတို့မဲမပေးခဲ့” စာသား ကိုင်ဆောင်ပြီး စစ်တပ်ရွေးကောက်ပွဲကိုဆန့်ကျင်တဲ့ လူထုလှုပ်ရှားမှုတွေ လုပ်ဆောင်ခဲ့ပါတယ်။

ဝက်လက်မြို့နယ် တနေရာမှာလည်း လူထုသပိတ်တိုက်ပွဲဦးဆောင်ကော်မတီက စစ်တပ်လုပ်နေတဲ့ ရွေးကောက်ပွဲကို ဆန့်ကျင်ကန့်ကွက်ကာ မဲမပေးကြောင်း ပြသတဲ့အနေနဲ့ “ငါတို့မဲမပေးခဲ့” Hand Banner တွေ ကိုင်ဆောင်ပြီး ဓာတ်ပုံကမ်ပိန်း ပြုလုပ်ခဲ့ပါတယ်။

Public Service Announcement

ယင်းမာပင်မြို့နယ်မြောက်ခြမ်းမှာလည်း ကျေးရွာများသပိတ်ကော်မတီက စစ်တပ်ထုတ်ကုန်ပစ္စည်းတွေကို မသုံးစွဲဖို့နဲ့ စစ်အာဏာရှင်စနစ်ကို ဆန့်ကျင်ဖို့ “ဘူးသပိတ်ဆင်နွှဲ ဖက်ဆစ်ထောက်တိုင်ဖြိုလှဲ” လက်ကမ်းစာစောင်တွေ ဝေမျှခဲ့ကြပါတယ်။

ဓာတ်ပုံ – ရွာပေါင်းစုံသပိတ်၊ စစ်ကိုင်းဒေသသပိတ်အင်အားစု၊ ဝက်လက်သပိတ်