ဖေဖော်ဝါရီ – ၄ ၊၂၀၂၆ ၊ နိုင်ပကောင်း/People’s Spring
အာဏာသိမ်းစစ်ကောင်စီကနိုင်ငံတော်လုံခြုံရေးနဲ့ကာကွယ်ရေးခေါင်းစဉ် အောက်ကနေ မည်သူ့ကိုမဆိုဝင်ရောက် ရှာဖွေဖမ်းဆီးရာမှာသက်သေမပါဘဲ ဖမ်းနိုင်ဖို့အတွက်နိုင်လွတ်လုံလို့အသိများတဲ့ နိုင်ငံသားတွေရဲ့ ပုဂ္ဂိုလ်ဆိုင်ရာလွတ်လပ်မှုနဲ့ ပုဂ္ဂိုလ်ဆိုင်ရာလုံခြုံမှု ကာကွယ်ပေးရေးဥပဒေကို ဖေဖော်ဝါရီလ ၃ ရက်က ပြင်ဆင်ဖြည့်စွက်လိုက်ပါတယ်။
ယခင်ပြဌာန်းချက်အရနိုင်လွတ်လုံဥပဒေပုဒ်မ ၅ မှာလူတစ်ဦးတစ်ယောက်ရဲ့ နေအိမ်၊ဒါမှမဟုတ်နေထိုင်တဲ့အဆောက်အဦး၊ရုံးခန်း၊ပရဝဏ်ကိုဝင်ရောက်ရှာဖွေတာ၊ဖမ်းဆီးရာမှာ သက်ဆိုင်ရာရပ်ကွက်၊ကျေးရွာ အုပ်ချုပ်ရေးမှုး ၊ ရာအိမ်မှုး ၊ဆယ်အိမ်မှုး တစ်ဦးဦး နဲ့ အနည်းဆုံးသက်သေ နှစ်ဦးပါရမယ်လို့ ပြဌာန်းထားတာပါ။
အဲဒီပြဌာန်းချက်မှာ စစ်ကောင်စီခေါင်းဆောင် “ နိုင်ငံတော်ကာကွယ်ရေး၊ လုံခြုံရေးနှင့် အများပြည်သူ အေးချမ်းသာယာရေးအတွက်အရေးကြီးလိုအပ်ချက်မှတစ်ပါး” ဆိုတဲ့စာသားကို ဖြည့်စွက်လိုက်တာလည်းဖြစ်ပါတယ်။
Public Service Announcement
အဓိပ္ပါယ်ကတော့ နိုင်ငံကာကွယ်ရေး၊လုံခြုံရေးနဲ့အများပြည်သူ အေးချမ်းသာယာရေးဆိုတဲ့ အကြောင်းပြပြီး သက်သေမလိုဘဲ စစ်ကောင်စီတပ်ဖွဲ့ဝင်တွေ ၊ စစ်ကောင်စီလက်အောက်ခံ ရဲ နဲ့ ပျုစောထီး ခေါ် ပြည်သူ့ စစ်တွေ က ဖမ်းဆီးလိုတဲ့လူနေထိုင်ရာနေအိမ်ကို ဝင်ရောက်ဖမ်းဆီးခွင့်ရသွားတာပါ။
အခုလို ဖြည့်စွက်တာမျိုးမလုပ်ခင် အာဏာသိမ်းစ ရက်ပိုင်းကတည်းက စစ်ကောင်စီခေါင်းဆောင်ဟာ နိုင်လွတ်လုံမှာပါတဲ့ ပုဒ်မ ၅ ၊ ပုဒ်မ ၇ နဲ့ ပုဒ်မ ၈ တို့ကို ရပ်ဆိုင်းလိုက်တယ်လို့ လက်မှတ်ရေးထိုးထုတ်ပြန်ထားခဲ့ပါတယ်။
ပုဒ်မ ၅ က လူတစ်ဦးတစ်ယောက်ကို ဝင်ရောက်ရှာဖွေ ဖမ်းဆီးရင် သက်သေပါရမယ်ဆိုတဲ့ပြဌာန်းချက်ဖြစ်ပြီး ၊ပုဒ်မ ၇ မှာတော့တရားရုံးရဲ့ ခွင့်ပြုချက်မရဘဲ ဘယ်သူ့ကိုမှ ၂၄ နာရီထက်ကျော်လွန်ပြီး ဖမ်းဆီးထားလို့မရဘူးဆိုတဲ့ အချက် ပြဌာန်းထားတာပါ။
ပုဒ်မ ၈ မှာ လူတစ်ဦးတစ်ယောက်ရဲ့နောက်ကို နောက်ယောင်ခံ လိုက် ထောက်လှမ်းတာ၊တယ်လီဖုန်းလိုင်းတွေကို ကြားဖြတ် ဖမ်းဆီးနားထောင်တာ၊ဆက်သွယ်ရေးအော်ပရေတာတွေဆီကလူပုဂ္ဂိုလ်တစ်ဦးဦးရဲ့ အချက် အလက်တွေကိုတောင်းယူတာ ၊ လူပုဂ္ဂိုလ်တစ်ဦးဦးရဲ့ပိုင်ဆိုင်မှုပစ္စည်းတွေကို မတရားသိမ်းယူတာ ၊ ဖျက်ဆီးတာမျိုးမလုပ်ရဘူးဆိုတဲ့ တားမြစ်ချက်တွေ ပါဝင်ပါတယ်။
နိုင်လွတ်လုံမှာ ပါဝင်တဲ့ အဲဒီ ပုဒ်မ ၅ ၊၇ ၊ ၈ သုံးခုလုံးရဲ့အသက်ဝင်မှုကို ရပ်ဆိုင်းလိုက်တယ်ဆိုတာကို အာဏာသိမ်းပြီး ရက်ပိုင်းအတွင်း စစ်ကောင်စီခေါင်းဆောင်က လက်မှတ်ထိုးကြေညာခဲ့တာပါ။
အဲဒီနောက်မှာတော့ တရားမဲ့ဖမ်းဆီးမှုတွေ ၊ ဆက်သွယ်ရေးအော်ပရေတာတွေဆီက အချက်အလက်တောင်းယူတာတွေ ၊ နေအိမ်ချိတ်ပိတ်တာတွေကို စစ်ကောင်စီက လုပ်ဆောင်ခဲ့ပါတယ်။
နိုင်လွတ်လုံဥပဒေကိုအရပ်သားရွေးကောက်ခံ NLD အစိုးရသမ္မတဦးထင်ကျော်လက်ထက်၂၀၁၇ မှာပြဌာန်းခဲ့တာဖြစ်ပြီးဥပဒေကိုလွှတ်တော်မှာ ဆွေးနွေးချိန်ကတည်းက စစ်တပ် လွှတ်တော်ကိုယ်စားလှယ်တွေက ကန့်ကွက်ခဲ့ကြပါတယ်။
နိုင်လွတ်လုံ ဥပဒေဟာနိုင်ငံအတွက် လုံခြုံရေးစည်းကျိုးပေါက်တယ်လို့ စစ်တပ် ထောက်ခံသူတွေက ပြင်းပြင်းထန်ထန် ဝေဖန်ခဲ့ကြတာရှိပါတယ်။
