မတ်-၁၊ ၂၀၂၆။ ဟန်နွေ/People’s Spring
ရှမ်းမြောက် ကွတ်ခိုင်မြို့မှာဖြစ်ပွားခဲ့တဲ့ တအာင်းတပ်မတော်(TNLA)နဲ့ ကိုးကန့် တပ်မတော် (MNDAA)တို့အကြား ပြဿနာဟာ နှစ်ဖက်ဖြေရှင်း ပြေလည်ခြင်းမရှိသေးဘဲ တင်းမာမှုတွေ ဆက်ရှိနေသေးကြောင်းဒေသ သတင်းရင်းမြစ်က ပြောပါတယ်။
ဖေဖော်ဝါရီ ၁၃ရက်က ကွတ်ခိုင်မြို့မှာ MNDAA က CCTV တပ်ဆင်တဲ့ကိစ္စနဲ့ပတ်သက်ပြီး MNDAA တပ်ဖွဲ့ဝင်တွေကို TNLAက စီးနင်းဖမ်းဆီးမှု စတင်ခဲ့ရာမှဒေသတွင်းမှာ နှစ်ဖက်တပ်တွေ အပြန်အလှန် ဖမ်းဆီးမှုတွေ ရှိခဲ့တာလို့ ဆိုပါတယ်။
ပြဿနာပြေလည်စေဖို့ MNDAAနဲ့ TNLAတို့ နှစ်ကြိမ်ထက်မနည်း တွေ့ဆုံဆွေးနွေးခဲ့သော်လည်း အပြန်အလှန်တောင်းဆိုမှုတွေကို နှစ်ဖက်က လက်မခံလို့ပြေလည်မှု မရသေးတာလို့ ဆိုပါတယ်။
Public Service Announcement
” မြေပြင်မှာ သူတို့ လောလောဆယ် ချမယ်ဆိုတဲ့ အဖွဲ့တွေက ရှိသေးတယ်။ တောက်လျှောက်တယောက်နဲ့ တယောက်ဖိအားပေးနေကြတယ်”လို့ ဒေသ သတင်းရင်းမြစ်က TNLAနဲ့ MNDAA တပ်ဖွဲ့ဝင် တွေအကြား အပြန်အလှန် ဖမ်းဆီးတာ၊ အချင်းများပြီး ရိုက်နှက်မှုတွေ ဖြစ်ပေါ်နေဆဲ အခြေအနေကို ပြောပါတယ်။
နှစ်ဖက်အဖွဲ့အစည်းက တရားဝင်ထုတ်ပြန်တာမရှိပေမယ့် MNDAAနဲ့ TNLA ကိုယ်စားလှယ်တွေဟာ ၀ဒေသ ပန်ဆန်းမှာ ၁ကြိမ်၊ ကိုးကန့်ဒေသ လောက်ကိုင်မှာ တစ်ကြိမ်ဆွေးနွေးမှု ရှိခဲ့တယ်လို့ ဆိုပါတယ်။
” ကျနော်ကြားရသလောက်တော့ MNDAA ဘက်က တောင်းဆိုတာတွေကို TNLA ကလက်မခံဘူး။ TNLA တောင်းဆိုတာကို MNDAA လည်းလက်မခံဘူး။ အဲဒီတော့ နှစ်ဖက်စလုံးညှိလို့မရဘူး။ ပြောမယ်ဆိုရင်တော့ အဖြေမထွက်ဘူး” လို့ ဒေသ သတင်းရင်းမြစ်က ပြောပါတယ်။
TNLAက ကွတ်ခိုင်မြို့အတွင်း MNDAA ရဲ့ အုပ်ချုပ်ရေးရုံးတွေကို ပိတ်သိမ်းစေခဲ့ တဲ့ အခြေအနေမှာ MNDAAက ကွတ်ခိုင်ကို အထူးဒေသ နယ်မြေမှာ ထည့်သွင်းပြီးပူးတွဲအုပ်ချုပ်ရေး ဖော်ဆောင်ဖို့လိုလားနေတာပါ။
MNDAAနဲ့ TNLA တို့ဟာ ညီနောင်မဟာမိတ်တွေဖြစ်သလို ၀တပ်ဖွဲ့ ဦးဆောင်တဲ့ ပြည်ထောင်စုနိုင်ငံရေးဆွေးနွေးညှိနှိုင်းရေးကော်မတီ (FPNCC) အဖွဲ့ဝင်တွေလည်းဖြစ်ပါတယ်။ ၁၀၂၇ စစ်ဆင်ရေးကို အတူတကွ ဖော်ဆောင်ခဲ့ကြပြီး စစ်ကောင်စီတပ်စခန်းရာချီနဲ့ မြို့တွေသိမ်းပိုက်ခဲ့ပေမယ့် တရုတ် အစိုးရရဲ့ ဖိအား၊ကြားဝင်စေ့စပ်မှုကြောင့် ၂၀၂၅မှာ စစ်ကောင်စီနဲ့ ပြန်လည်အပစ်ရပ်စဲရေး လုပ်ဆောင်ခဲ့ကြတဲ့ အဖွဲ့အစည်းတွေလည်းဖြစ်ပါတယ်။
