မတ်-၄၊ ၂၀၂၆။ဇေအောင်/People’s Spring
မန္တလေးမြို့မှာ စက်သုံးဆီကို ပြန်လည်တန်းစီဝယ်ယူနေရပြီး နာရီပိုင်းကြာအထိ စောင့်ဆိုင်းနေရကြောင်း မြို့ခံတွေက ပြောပါတယ်။
မနေ့က မတ်လ ၄ ရက်ကစပြီး စက်သုံးဆီတွေ ပြန်လည်တန်းစီဝယ်ယူနေရတဲ့ မန္တလေးမြို့မှာ ဒီကနေ့မနက်ပိုင်းမှာတော့ ဆီဆိုင်အားလုံး တန်းစီကာ ဝယ်ယူနေရပြီဖြစ်ကြောင်း မြို့ခံတွေက ပြောပါတယ်။
” မနက် ၅ခွဲထတန်းစီတာကို ကားတန်းကြီးက အရှည်ကြီးပဲ။တချို့က ညထဲကတန်းကြတာ” လို့ မန္တလေးမြို့၊ အောင်မြေသာဇံမြို့နယ်မှာ နေထိုင်သူတစ်ဦးက ပြောပါတယ်။
Public Service Announcement
ဆိုင်ကယ်ရော ကားပါ အစီးရေရာချီ ရှိနေပြီး နာရီနဲ့ချီကာ စောင့်ဆိုင်းနေရတယ်လို့ မြို့ခံတွေက ပြောပါတယ်။ ဒါပေမယ့် ဆီစျေးကတော့ သိသိသာသာမြင့်တက်သွားတာမျိုး မရှိသေးဘဲ 92 တစ်လီတာ ၂၅၃၀ ဝန်းကျင်နဲ့ 95 တစ်လီတာ ၂၅၉၀ ဝန်းကျင်ရှိနေကြောင်း မြို့ခံတွေက ပြောပါတယ်။
စက်သုံးဆီရောင်းအားမြင့်တက်လာတဲ့အခြေအနေတွေကြောင့် မန္တလေး-ပြင်ဦးလွင်လမ်းပေါ်က စက်သုံးဆီဆိုင်အချို့ ပိတ်သိမ်းထားကြောင်း ဒေသခံတွေဆီက သိရပါတယ်။
အာဏာသိမ်းစစ်ကောင်စီကတော့ စက်သုံးဆီအခက်အခဲရှိနေလို့ ချွေတာတဲ့အနေနဲ့ ယာဥ်တွေ ရက်အလိုက် စုံရက်၊ မရက်ခွဲပြီး ကိုယ့်ယာဥ်နံပါတ်ပေါ်မူတည်ကာ သွားလာကြဖို့ ထုတ်ပြန်ထားပါတယ်။
