မတ် ၁၂၊ ၂၀၂၆။ဟာနာဆန်/People’s Spring
မန္တလေးတိုင်း၊ တံတားဦးမြို့နယ်မှာ ပေါ်တာအဆွဲခံလိုက်ရတဲ့ အမျိုးသားတစ်ဦး ၆လအကြာမှာ စစ်တပ်ထံက ထွက်ပြေးလွတ်မြောက်လာခဲ့ပါတယ်။
ပြီးခဲ့တဲ့ ၂၀၂၅ စက်တင်ဘာ ၁ရက်က တံတားဦးမြို့ကနေ မန္တလေးမြို့ကိုသွားတဲ့ လူငယ်တစ်ဦးဟာ စစ်တပ်ရဲ့ အတင်းအဓမ္မဖမ်းဆီးခံရပြီး စစ်သားစုဆောင်းခံခဲ့ရပါတယ်။
ဖမ်းဆီးခံရပြီးနောက် ၂၀၂၅ စက်တင်ဘာလ ၁၅ ရက်မှာ ရှမ်းပြည်နယ်၊ ဟိုပုံးမြို့ရှိ ပြည်သူစစ်သင်တန်းအပတ်စဉ် (၁၇) တက်ရောက်ခဲ့ရပြီး သင်တန်းဆင်းပြီးနောက် မန္တလေးတောင်ခြေရှိ BE တပ်သို့ ပြန်လည်ပို့ဆောင်ချိန် လျှပ်စီးတပ်ခွဲနဲ့ ချိတ်ဆက်ပြီး ထွက်ပြေးလာတာဖြစ်ကြောင်း အဆိုပါတပ်ခွဲရဲ့တာဝန်ရှိသူက ပြောပါတယ်။
Public Service Announcement
“ BE တပ်ထဲကနေ ထွက်ပြေးလွတ်မြောက်လာတာ။” လို့ မုံရွာခရိုင် အမှတ် (၁၂)တပ်ရင်း ၊ တပ်ခွဲ(၃)၊ လျှပ်စီးတပ်ခွဲရဲ့တာဝန်ရှိသူက ပြောပါတယ်။
ကျန်ရှိနေတဲ့ စစ်မှုထမ်းတပ်သားတွေလည်း အခြေအနေပေးတာနဲ့ ပြည်သူ့ဘက်သို့ ကူးပြောင်း အလင်းဝင်ကြဖို့ လျှပ်စီးတပ်ခွဲက တိုက်တွန်းထားပါတယ်။
စစ်ကိုင်းတိုင်း၊ ကန့်ဘလူမြို့နယ်မှာ စစ်တပ်ရဲ့ အတင်းအဓမ္မ ဖမ်းဆီးခြင်းခံခဲ့ရတဲ့ လူငယ်တစ်ဦးလည်း စစ်သင်တန်းဆင်းပြီးနောက် တပ်ရင်းသို့ ပို့ဆောင်ချိန် လျှပ်စီးတပ်ခွဲနဲ့ပဲ ချိတ်ဆက်ပြီး လွတ်မြောက်လာခဲ့ပါသေးတယ်။
