မတ်-၂၇၊၂၀၂၆။/People’s Spring
တအာင်းတပ်မတော်(TNLA) နဲ့ ကိုးကန့်တပ်မတော်(MNDAA)တို့ဖြစ်ပွားနေတဲ့ တိုက်ပွဲသုံးရက်အတွင်း TNLA တပ်ဖွဲ့ဝင် ၁၀၀ကျော်ဖမ်းဆီးခံထားရတယ်လို့ TNLAပြောရေးဆိုခွင့်ရှိသူ လွေးယေဦးက လူထုနွေဦးကို ပြောပါတယ်။
မတ်လ ၁၆ရက်မှာလည်း ကွတ်ခိုင်မြို့အပြင်ဘက်နဲ့ နန့်ခမ်းမြို့ (၁၂)ကြားမှာလည်း တိုက်ပွဲတွေဆက်ပြင်းထန်နေတယ်လို့လည်း လွေးယေဦးက ပြောပါတယ်။
“ လောလောဆယ်ဆိုရင် တိုက်ပွဲကာလဖြစ်တဲ့အလျောက် ကျွန်မတို့ဘက်က ထိခိုက်ကျဆုံးမှုကတော့ နှစ်ဖက်မှာရှိပါတယ်။ အတိအကျကျွန်မတို့ကလည်းမသိရသေးဘူး။ ဒီ ၁၄ရက်ကနေ ယနေ့အထိဆိုရင်တော့ မူဆယ်(၁၀၅)မိုင်မှာရှိတဲ့ စခန်းတွေရော ကွတ်ခိုင်မှာရှိတဲ့စခန်းတွေရောအားလုံးပေါင်းဆိုရင် တပ်သားဖမ်းဆီးခံရတာ ၁၀၀ ကျော်ရှိပါတယ်။ စခန်းတွေသိမ်းတာတော့ရှိပါတယ်။၁၄ ရက်နေ့စစချင်းမှာတော့ ကျွန်မတို့က ပြန်လည်ပစ်ခတ်တာမျိုးတွေ မရှိတဲ့အတွက်ကြောင့် သူတို့ဘက်ကတော့ လူတွေဖမ်းသွားတာ စခန်းတွေဖယ်ရှားတာ လက်နက်တွေသိမ်းသွားတာမျိုးတွေရှိပါတယ်” လို့ လွေးယေဦးက ပြောပါတယ်။
Public Service Announcement
TNLAနဲ့ MNDAAတိုက်ပွဲတွေအတွင်း နှစ်ဖက်ထိခိုက်ကျဆုံးမှုတွေရှိတယ်လို့ သူက ဆက်ပြောပါတယ်။
မြောက်ပိုင်းမဟာမိတ်သုံးဖွဲ့ထဲမှာပါဝင်တဲ့ TNLAနဲ့ MNDAAက ကွတ်ခိုင်မြို့မှာ မတ်လ၁၄ရက်ကစပြီး တိုက်ပွဲဖြစ်ခဲ့တာပါ။ MNDAAတပ်တွေဟာဒရုန်းအစီး ရေရာချီအသုံးပြုပြီး အင်အားအများအပြားနဲ့ ကွတ်ခိုင်မြို့နယ်မှာ TNLA တပ်စွဲထားတဲ့နေရာအများစုကို ထိုးစစ်ဆင်တိုက်ခိုက်ခဲ့တာပါ။
ကွတ်ခိုင်မြို့နယ်အပြင် နမ့်ခမ်းမြို့နယ်နဲ့ နမ့်ဖက်ကာကြားက TNLAစခန်းတွေကိုလည်း တိုက်ခိုက်ခဲ့ပါတယ်။မတ် ၁၆ ရက်မနက်ပိုင်းမှာတော့ ပေါက်ကွဲသံတွေကို နမ့်ခမ်းမြို့နယ်ဘက်ကနေ ကြားနေရတယ်လို့ ဒေသခံတွေက ပြောပါတယ်။
MNDAAနဲ့ TNLAတိုက်ပွဲဟာဒေသခံပြည်သူလူထုကို လုံခြုံရေးအရခြိမ်းခြောက်နေပြီးအပစ်ရပ်ကြဖို့နဲ့ တွေ့ဆုံဆွေးနွေးကြဖို့ အရပ်ဖက်အဖွဲ့အစည်းတွေက တိုက်တွန်းနေကြပါတယ်။
တအာင်းအရပ်ဘက်အဖွဲ့အစည်းများကွန်ရက်၊ ကျန်းမာရေးအင်အားစု မန္တလေး၊ ကျန်းမာရေးအင်အားစုတအာင်းပြည်နဲ့ကျန်းမာရေးအင်အားစုအထူးဒေသ(၁)၊ ကလည်း TNLAနဲ့ MNDAAအပစ်ရပ်ကြဖို့ တိုက်တွန်းချက်ထုတ်ပြန်ထားပါတယ်။
အမျိုးသားညီညွတ်ရေးအတိုင်ပင်ခံကောင်စီ(NUCC)က TNLA နဲ့ MNDAA မဟာမိတ်တပ်တွေကြား တိုက်ပွဲ ချက်ချင်းရပ်တန့်ဖို့နဲ့ နိုင်ငံရေးအရ ငြိမ်းချမ်းစွာ တွေ့ဆုံဆွေးနွေးဖြေရှင်းကြဖို့မေတ္တာရပ်ခံထားပါတယ်။
၁၀၂၇ စစ်ဆင်ရေးအောင်မြင်မှုတွေကြောင့် နွေဦးတော်လှန်ရေးတပ်ဖွဲ့တိုင်းက လေးစားအားကျ အတုယူနေကြရတဲ့ TNLAနဲ့ MNDAA အနေနဲ့ လက်ရှိဖြစ်ပွားနေတဲ့ စစ်ရေးပဋိပက္ခတွေဟာ စစ်အာဏာရှင်တော်လှန်ရေးကို အကျိုးသက်ရောက်စေတဲ့အတွက်တွေ့ဆုံဆွေးနွေး အဖြေရှာဖို့ နွေဦးတော်လှန်ရေးမဟာမိတ်တပ်ပေါင်းစု(SRA)ဦးဆောင်ကော်မတီကလည်း မေတ္တာရပ်ခံတိုက်တွန်းကြောင်းထုတ်ပြန်ထားပါတယ်။
