မတ်-၁၇၊ ၂၀၂၆။မေရီ/People’s Spring
မန္တလေးမြို့မှာ သုံးဘီးယာဥ်တွေ တရက်ခြား ဆီ ၄ လီတာသာ ဝယ်ခွင့်ရလို့ အခက်အခဲရှိနေကြောင်း ယာဥ်မောင်းအချို့က ပြောပါတယ်။
မန္တလေးမြို့မှာ မီနီအိုးဝေလို့ အလွယ်ခေါ်ကြတဲ့ သုံးဘီးအငှားယာဥ်တွေကို စစ်ကောင်စီက တစ်ရက်ခြား ဆီ ၄လီတာသာ ဝယ်ယူခွင့်ကန့်သတ်ထားတာကြောင့် ပြေးဆွဲဖို့ အခက်အခဲရှိနေကြောင်း သုံးဘီးယာဥ်မောင်းအချို့က ပြောပါတယ်။
“တစ်ရက်ခြား ၄ လီတာ၊ တစ်ရက် ၂ လီတာက ဘယ်လိုမှ မလောက်ဘူး။ ကျောက်ဆည်တို့ စသဖြင့် အဝေးဆို လိုက်တောင်မလိုက်တော့ဘူး။”လို့ သုံးဘီးယာဥ်မောင်းတစ်ဦးက ပြောပါတယ်။
Public Service Announcement
ဒါ့အပြင် ဆီဆိုင်အချို့ကလည်း ၄ လီတာအပြည့်ရောင်းမပေးဘဲ တစ်သောင်းဝန်းကျင်ဖိုးသာ ရောင်းပေးတာတွေ၊ ဆီထုတ်ဖို့ QR လုပ်လို့မရတဲ့ပြဿနာတွေလည်း ဖြစ်ပွားနေကြောင်း သုံးဘီးယာဥ်မောင်းအချို့က ပြောပါတယ်။
ဒါပေမယ့်စက်သုံးဆီဆိုင်အချို့မှာတော့ သုံးဘီးယာဥ်တွေကို တစ်ရက်ခြားမဟုတ်ဘဲ နေ့စဥ် လေးလီတာအပြည့် ရောင်းချပေးနေပြီး ဆိုင်ပေါ်မူတည်ကာ ရောင်းချမှုစနစ် ကွာခြားနေတာဖြစ်ကြောင်း ယာဥ်မောင်းအချို့က ပြောပါတယ်။
အလားတူ စစ်ကိုင်းမြို့ဘက်ကလာတဲ့ သုံးဘီးအပါအဝင် ယာဥ်အမျိုးမျိုးကိုလည်း မန္တလေးမြို့က စက်သုံးဆီရောင်းချမပေးလို့ အခက်အခဲတွေရှိနေကြောင်း စစ်ကိုင်းမြို့ဒေသခံအချို့က ပြောပါတယ်။
ပုဂ္ဂလိက ယာဥ်လိုင်းစနစ်မရှိတဲ့ မန္တလေးမြို့မှာ သုံးဘီးအငှားယာဥ်တွေကို အများဆုံး အသုံးပြုနေကြတာဖြစ်ပါတယ်။
စစ်ကောင်စီဟာ ယာဥ်အမျိုးအစားအလိုက် တစ်ကြိမ်ဝယ်ရင် ဆိုင်ကယ် ၂ လီတာ၊ သုံးဘီးနဲ့ အိုးဝေ ၄လီတာ၊ အိမ်စီးကားများ ၁၂ လီတာ၊ Light Truck (အိမ်စီးကားအမျိုးအစား)၂၀ လီတာ၊ ခရီးသည်တင်ယာဉ်နဲ့ ကုန်ကားကြီးများ ၅၀ လီတာသာ တစ်ရက်ခြား ဝယ်ယူခွင့် ကန့်သတ်ထားပါတယ်။
