ဧပြီ−၆၊ ၂၀၂၆။ ထားမြတ်/People’s Spring
ကရင်အမျိုးသားအစည်းအရုံး(KNU) ညောင်လေးပင်ခရိုင် လယ်ဒို(ကျောက်ကြီး)နဲ့ မူး(မုန်း)မြို့နယ်အတွင်း စစ်တပ်က လေကြောင်းနဲ့ လက်နက်ကြီး တိုက်ခိုက်မှုတွေ ဆက်လုပ်ခဲ့ကြောင်း KNUဗဟိုက သတင်းထုတ်ပြန်ပါတယ်။
မတ်လ ၃၀ရက်နဲ့ ၃၁ရက်က စစ်တပ်ရဲ့ တိုက်ခိုက်မှုကြောင့် ကလေးငယ် တစ်ဦးအပါအဝင် အရပ်သား ပြည်သူ အချို့ ထိခိုက်ကာ နေအိမ်ပျက်စီးမှုတွေရှိခဲ့တဲ့ အခြေအနေကို အသိပေးထားတာဖြစ်ပါတယ်။
မတ်လ ၃၁ရက်က လယ်ဒိုမြို့နယ် ကြိတ်ကင်းကျေးရွာကို စစ်ကောင်စီက လက်နက်ကြီးနဲ့ ပစ်ခတ်ခဲ့လို့ ပြည်သူလူထုနေအိမ် ၃လုံးပျက်စီးခဲ့ပြီး ကော်သာစေးရွာခံ အမျိုးသားတစ်ဦးလည်း စစ်တပ် ထောင်ထားတဲ့ မြေမြှုပ်မိုင်းကြောင့် ဒဏ်ရာရခဲ့တယ်လို့ ဖော်ပြထားပါတယ်။
Public Service Announcement
မတ်လ ၃၀ရက်မှာ တောင်ငူလေတပ်က တိုက်လေယာဉ်နဲ့ လေကြောင်းကနေ ဗုံးကြဲခဲ့လို့ (၄)နှစ်ကလေး အပါအဝင် ပြည်သူ ၂ဦး ဒဏ်ရာရခဲ့ပြီး နေအိမ်ပျက်စီးမှု ရှိခဲ့တယ်လို့ ဆိုပါတယ်။
စစ်တပ်ဟာ KNU ညောင်လေးပင်ခရိုင်အတွင်း နေထိုင်တဲ့ အရပ်သားပြည်သူတွေကို ပစ်မှတ်ထားပြီး လက်နက်ကြီး၊ ဒရုန်း၊ လေယာဉ်တို့နဲ့ တိုက်ခိုက်မှုတွေ လုပ်ဆောင်နေလို့ ပြည်သူလူထု အသက်အိုးအိမ်စည်းစိမ်များ ထိခိုက်ပျက်စီးဆုံးရှုံးနေရကြောင်း ဖော်ပြကာ ဒေသခံတွေ စိုးရိမ်ထိတ်လန့်မှုတွေနဲ့ အသက်ရှင်နေထိုင်နေကြရတယ်လို့ ဖော်ပြပါတယ်။
စစ်တပ်ဟာ KNU နယ်မြေတွေ အပါအဝင် နိုင်ငံတဝန်း အရပ်သား ပြည်သူတွေကို ပစ်မှတ်ထား တိုက်ခိုက်မှုတွေ ပိုမိုတိုးမြှင့်လုပ်ဆောင်လာပြီး စစ်တပ်ရဲ့ လေကြောင်းဗုံးကြဲတိုက်ခိုက်မှုတွေကြောင့် ပြည်သူလူထု အစုလိုက်အပြုံလိုက် သေဆုံးထိခိုက်ခဲ့ရတဲ့ ဖြစ်စဉ်တွေ မကြာခဏ ဖြစ်ပေါ်လျက်ရှိပါတယ်။
