ဧပြီ ၇၊ ၂၀၂၆။ ထားမြတ်/People’s Spring
ပြည်သူ့ကာကွယ်ရေးတပ်မတော်(PDF) နည်းဗျူဟာ(၃၃)ကွပ်ကဲမှုအောက်ရှိ ရေးပြောက်ကျားတပ် (YGF)-အမှတ်(၈၀၀၁)တပ်ရင်းထံ အခု ၂၀၂၆ ၄လနီးပါးအတွင်း အလင်းဝင်လာတဲ့ စစ်ကောင်စီ တပ်သား ၁၁ဦး ရှိပြီး လက်နက်နဲ့ အလင်းဝင်လာကြဖို့ ထောက်ပံ့ငွေ ချီးမြှင့်နိုင်ရေး ပြည်သူတွေ ပါဝင်ပေးကြဖို့ YGF တပ်ရင်းမှူး ဗိုလ်ကျန်ရစ်က တိုက်တွန်းထားပါတယ်။
ဧပြီ ၄ရက်မှာ ရေးမြို့နယ် ခလရ(၃၄၃) တပ်ရင်းက စစ်ကောင်စီတပ်သား ၂ဦး လက်နက် ယူလာပြီး ရေးပြောက်ကျားတပ်ဖွဲ့ထံ အလင်းဝင်ရောက်လာပြီးနောက် ဗိုလ်ကျန်ရစ်က ဧပြီ ၆ရက်မှာ တော်လှန်လူထုတွေကို အခုလိုတိုက်တွန်းခဲ့တာပါ။
“တော်လှန်ပြည်သူများ အားလုံးကိုတစ်ခုလောက် တောင်းဆိုချင်ပါတယ်။နည်းဗျူဟာ (၃၃) ကွပ်ကဲမှုအောက်ရှိကျနော်တို့ YGF (အမှတ်−၈၀၀၁) တပ်ရင်းကို( 2026)နှစ်အစကနေ စပြီးတော့ ၄ လအတွင်းလက်နက်ခဲယမ်းနှင့်တကွ အလင်းဝင်လာတဲ့ ပစ စစ်မှုထမ်း ( ၁၁) ဦးရှိပါတယ်။ အလင်းဝင်စစ်မှုထမ်းများကို ထောက်ပံ့ငွေများနဲ့ ဂုဏ်ပြုချီးမြှင့်ချင်ပါတယ်ဗျာ။” လို့ ဗိုလ်ကျန်ရစ်က သူ့ရဲ့ ဖေ့စ်ဘွတ်ခ်မှာ ရေးသားပြီး ပြည်သူတွေ တက်နိုင်သလောက် ပါဝင်ကူညီပေးဖို့ မေတ္တာရပ်ခံထားပါတယ်။
Public Service Announcement
“ပြည်သူတွေခက်ခဲနေတာသိပေမဲ့လည်း ကျနော်တို့မှာပြည်သူတွေပဲရှိတာမလို့ အပူကပ်နေရတာပါ၊ဒါကြောင့်တတ်နိုင်တဲ့ပြည်သူတွေအနေနဲ့ ဝိုင်းဝန်းကူညီပေးကြဖို့ပြောချင်ပါတယ်။”လို့ ရေးပျောက်ကြားတပ် သတင်းပြန်ကြားရေး တာဝန်ခံက ပြောပါတယ်။
အခု နှစ်အတွင်း အလင်းဝင်ရောက်သူ များအပါအဝင် YGF ထံ အလင်းဝင်လာသူ စုစုပေါင်းမှာ ၂၀ဦးထက်မနည်းရှိခဲ့ပါတယ်။
အလင်းဝင်ရောက်လာသူတွေကို နွေးထွေးစွာကြိုဆိုဂုဏ်ယူကြောင်း ရေးပြောက်ကျားတပ်ဖွဲက ထုတ်ပြန်ထားပြီး စစ်ကောင်စီတပ်ရဲ့ အတင်းအဓမ္မစစ်မှုထမ်းခံမယ့်အစား ပြည်သူ့ကာကွယ်ရေးတပ်မတော်ထဲကိုဝင်ပြီး တော်လှန်ရေးအမြန်ပြီးဆုံးအောင် ဝိုင်းဝန်းတွန်းလှန်ကြဖိုလည်း တပ်ရင်းမှူး ဗိုလ်ကျန်ရစ်က ယခင်ကတည်းက တိုက်တွန်းထားပါတယ်။
ဒါ့အပြင် စစ်ကောင်စီတပ်သားတွေအနေနဲ့ နီးစပ်ရာတော်လှန်ရေးအဖွဲ့တွေနဲ့ချိတ်ဆက်ပြီး အမြန်ဆုံး အလင်းဝင်ကြဖို့လည်း ရေးပြောက်ကျားတပ်ဖွဲက ထုတ်ပြန်ထားပါတယ်။
