ဧပြီ ၁၈၊ ၂၀၂၆။ ထားမြတ်/People’s Spring
ကရင်အမျိုးသားအစည်းအရုံး(KNU) လယ်ဒိုမြို့နယ်(ကျောက်ကြီးမြို့နယ်) အတွင်းကို အာဏာသိမ်းစစ်တပ်က လေကြောင်း တိုက်ခိုက်ကနေဗုံးကြဲခဲ့လို့ ကျေးရွာ ၄ရွာက လူဦးရေ ၆၀၀ကျော် ဘေးလွတ်ရာ တိမ်းရှောင်နေရကြောင်း KNU က သတင်းထုတ်ပြန်ပါတယ်။
စစ်ကောင်စီလေတပ်က လယ်ဒိုမြို့နယ် ဝါကေဒဲရွာနဲ့ လယ်ဆူခိုရွာ အနီးဝန်းကျင်ကို ဗုံးကြဲတိုက်ခိုက်မှုတွေ ကျူးလွန်လျက်ရှိလို့ အနီးဝန်းကျင်က ကျေးရွာတွေက ပြည်သူတွေပါ ဘေးလွတ်ရာ တိမ်းရှောင်နေကြရတာလို့ KNUက ဧပြီ ၁၇ရက်မှာထုတ်ပြန်ခဲ့တာပါ။
ဝါကေဒဲရွာ၊ လယ်ဆူခိုရွာ၊ ကိုထာရွာ၊ ကဒူးမူဒဲရွာ စတဲ့ ရွာလေးရွာက အိမ်ထောင်စု ၈၄ ခုက လူဦးရေ ၆၀၀ ကျော် တိမ်းရှောင်နေကြရပြီး အရပ်သားပြည်သူတွေ အနေနဲ့ စိုးရိမ်ကြောက်ရွံ့မှုတွေနဲ့ ရှင်သန်နေကြရတယ်လို့ ဖော်ပြထားပါတယ်။
Public Service Announcement
ဒါ့အပြင် အရေးပေါ်လူသားခြင်းစာနာထောက်ထားမှု ဆိုင်ရာအကူအညီများ ဖြစ်တဲ့ အခြေခံစားနပ်ရိက္ခာ နဲ့ ဆေးဝါးအကူအညီများ လိုအပ်လျက်ရှိဟုလည်း အသိပေးထားပါတယ်။
စစ်ကောင်စီတပ်ဟာ KNU တပ်မဟာ(၁)နယ်မြေ သထုံခရိုင် ဘီးလင်းနဲ့ ဘားအံ(ဖားအံ)မြို့နယ်တွေကိုလည်း အခု ဧပြီလအတွင်းမှာ လေကြောင်းဗုံးကြဲတိုက်ခိုက်ခဲ့လို့ အရပ်သား ပြည်သူ ထောင်ချီ ဘေးလွတ်ရာ တိမ်းရှောင်နေကြရပါတယ်။လေကြောင်း တိုက်ခိုက်ခံရလို့ ပြည်သူသေဆုံးထိခိုက်မှုတွေ အိုးအိမ်ပျက်စီးမှုတွေလည်းရှိခဲ့ပါတယ်။
စစ်ကောင်စီတပ်ဟာ အခု သင်္ကြန်ကာလ အတွင်းမှာလည်း KNU တပ်မဟာ(၅) နယ်မြေ ဖာပွန်ခရိုင်ကို နေ့စဉ် လေကြောင်းဗုံးကြဲခဲ့လို့ အရပ်သား ပြည်သူ ၆ဦးထက်မနည်းသေဆုံးကာ ၁၃ဦး ဒဏ်ရာရခဲ့တယ်လို့ KNU တပ်မဟာ(၅) ပြောရေးဆိုခွင့်ရှိသူ ဒုဗိုလ်မှူးကြီးစောကလယ်ဒိုက ပြောပါတယ်။
