လေပြင်းတိုက်လို့ ဒီးမော့ဆိုစစ်ရှောင်တွေရဲ့ နေအိမ် ၅၀ကျော် ပျက်စီး

ဧပြီ-၂၄၊၂၀၂၆။မိုမို/People’s Spring

ကရင်နီပြည်နယ်၊ ဒီးမော့ဆိုမြို့နယ်မှာ လေပြင်းတိုက်ခတ်တာကြောင့် စစ်ရှောင်ပြည်သူတွေရဲ့ နေအိမ် ၅၀ ကျော် ပျက်စီးခဲ့ရတယ်လို့ အရေးပေါ်ကယ်ဆယ်ရေးအဖွဲ့ CTER-Karenni က ဒီကနေ့ ဧပြီ ၂၄ရက်မှာ ထုတ်ပြန်ပါတယ်။

ဧပြီ ၂၁ရက်က လေပြင်းတိုက်ခတ်မှုကြောင့် ဒီမော့ဆိုအရှေ့ခြမ်းက ဒေသတစ်ခုမှာ လေးနှစ်ကျော်ကြာစစ်ရှောင်နေရတဲ့ ပြည်သူတွေရဲ့နေအိမ်တွေ ထိခိုက်ပျက်စီးခဲ့တာလို့ ဆိုပါတယ်။

” ခန့်မှန်းခြေအရတော့ ၅၀ကျော်လောက်ပျက်စီးတယ်။အခက်အခဲတော့ အများကြီးပါ။တဲအိမ်ကိုပြန်ပြင်ဖို့ အမိုးအကာတွေ ရှိလားမသိဘူး”လို့ CTER-Karenni အဖွဲ့ဝင်တစ်ဦးက ပြောပါတယ်။

Public Service Announcement

စစ်ဘေးရှောင်စခန်းတွေက နေအိမ်တွေအများစုဟာ ဝါးတိုင်၊ ဝါးထရံနဲ့ မိုးကာစတွေနဲ့သာ ဆောက်လုပ်ထားတဲ့ ယာယီအဆောက်အအုံဖြစ်တာကြောင့် အခုလို ဆိုးရွားတဲ့ ရာသီဥတုဒဏ်ကို အလွယ်တကူ ခံစားခဲ့ရတာလို့ အသိပေးပါတယ်။

ဒါ့အပြင် မိုးသည်းထန်စွာရွာသွန်းမှုပါရှိခဲ့ပြီး သီးနှံနဲ့မျိုးစေ့တချို့ ပျက်စီးခဲ့ရသလို လေပြင်းတိုက်ခတ်မှုကြောင့် သစ်ပင်တွေလဲကျပြီး လမ်းပိတ်ဆို့တာရှိခဲ့တယ်လို့ သိရပါတယ်။

“ဒီမော့ဆိုအရှေ့ဘက်ခြမ်းမှာပါ။စစ်ရှောင်တွေက နှစ်ကျော်ရှိပါပြီ။ဘောလခဲ၊လွိုင်ကော်၊ ဒီမော့ဆိုအရှေ့ခြမ်းဘက်ကစစ်ရှောင်တွေပါ။စစ်ရှောင်တဲအိမ်က ၃၀၀ နီးပါရှိတယ်”လို့ လေပြင်းတိုက်ခတ်ခံရတာကို သွား​ရောက်ကူညီခဲ့တဲ့ စေတနာ့ဝန်ထမ်းတစ်ဦးက ပြောပါတယ်။

လက်ရှိမှာ လေပြင်းတိုက်ခံရတဲ့ စစ်ရှောင်တွေအတွက် မိုးကာ၊ဆန်နဲ့ အခြေခံရိက္ခါတွေ အရေးပေါ် လိုအပ်တယ်လို့ ဆိုပါတယ်။

အပူချိန်မြင့်နေတာနဲ့ နွေရာသီနဲ့ မိုးကြိုကာလတွေမဇာ မိုးတိမ်တောင်တွေ ဖြစ်ပေါ်ပြီး မြန်မာနိုင်ငံတစ်ဝန်း လေပြင်းတိုက်ခတ်မှုတွေ မကြာခဏ ဖြစ်ပွားလေ့ရှိပါတယ်။

အခုလ တတိယပတ် က ပဲခူးတိုင်း၊ကြို့ပင် ကောက်မြို့နယ်၊ ချောင်းဝရွာ၊ မြို့ကိုင်ရွာနဲ့ ကွပ်သစ်ရွာတွေမှာ လေပြင်းတိုက်ခတ်လို့ နေအိမ် ၃၀၀ နီးပါးပျက်စီးခဲ့ရပါတယ်။

ဧပြီ ၂၂ ရက်ကလည်း စစ်ကိုင်းတိုင်း၊ရေဦးမြို့နယ်မီးမောင်းကုန်းကျေးရွာက အသက် ၈၀ ကျော် အဖွားအို တစ်ဦး လေပြင်းတိုက်လို့ ထွက်ပြေးချိန် သစ်ပင်ပိသေဆုံးခဲ့ရပါတယ်။