ဧပြီ ၂၇၊ ၂၀၂၆။ ထားမြတ်/People’s Spring
ကရင်အမျိုးသားအစည်းအရုံး(KNU) တပ်မဟာ(၅) ဖာပွန်(မူတြော်)ခရိုင်ရှိ ကဘောတူစစ်ကောင်စီတပ်စခန်း ကို ဧပြီ ၂၅ရက်မှာ သိမ်းပိုက်နိုင်ခဲ့သလို စစ်ကောင်စီတပ်ဖွဲ့ဝင်တွေ သေဆုံးတာ၊ လက်နက်ကြီးလက်နက်ငယ်နဲ့ ကျည်ခဲယမ်းတွေ သိမ်းရတာ ရှိခဲ့ကြောင်း ကရင်သတင်းရင်းမြစ်က ပြောပါတယ်။
စစ်တပ်ထံက သိမ်းရတဲ့ မှတ်တမ်းဓာတ်ပုံနဲ့ သိမ်းပိုက်ရရှိတဲ့ တပ်စခန်းကို ရှင်းလင်းရေးလုပ်ဆောင်နေတဲ့ ရုပ်သံအရ လက်နက် မျိုးစုံ ၁၈လက်ထက်မနည်း ရရှိခဲ့သလို စစ်ကောင်စီတပ်သားအချို့ရဲ့ အလောင်းတွေကိုလည်းတွေ့ရပါတယ်။
ဒါအပြင် စစ်သားအချို့ စခန်းကနေထွက်ပြေးသွားတယ်လို့ ကရင်သတင်းရင်းမြစ်က ပြောပါတယ်။
Public Service Announcement
အဲဒီ ကဘောတူတပ်စခန်းသိမ်းပိုက်နိုင်မှုကို KNU တပ်မဟာ(၅) ပြောရေးဆိုခွင့်ရှိသူ ဒုဗိုလ်မှူးကြီးစောကလယ်ဒိုက အတည်ပြုထားပါတယ်။
ကဘောတူတပ်စခန်းဟာ KNU တပ်မဟာ(၃)နဲ့ တပ်မဟာ(၅) နယ်စပ် မူတော်ခရိုင်လူသောနဲ့ ကျောက်ကြီးမြို့နယ်အစပ်မှာ တည်ရှိတယ်လို့ ဆိုပါတယ်။
KNU တပ်မဟာ(၅)နဲ့ တော်လှန်ရေးပူးပေါင်းတပ်တွေဟာ အာဏာသိမ်းပြီးနောက် စစ်ကောင်စီ တပ်စခန်း တခုပြီးတခု သိမ်းပိုက်ခဲ့ရာ ၅နှစ်တာအတွင်းတပ်စခန်း ၇၀နီးပါးသိမ်းရခဲ့ပြီး လက်ရှိ တပ်မဟာ (၅)နယ်မြေ ဖာပွန်ခရိုင်မှာ စစ်ကောင်စီတပ်စခန်း ၁၀ခုသာကျန်တော့တာ ဖြစ်ပါတယ်။
