မေ-၂၊ ၂၀၂၆။ထားမြတ်/People’s Spring
ချင်းပြည်နယ်၊ ဖလမ်းမြို့နဲ့ ရိဒ်ခေါ်ဒါမြို့ကြားက ခေါပွီချိပ်ကျေးရွာကို အာဏာသိမ်းစစ်တပ်က မေလ ၁ရက်မှာ လေကြောင်းကနေ ဗုံးကြဲတိုက်ခိုက်ခဲ့ရာ သေဆုံးသူ ၇ဦးအထိရှိလာပြီး ကလေးငယ် ၆ဦး ပါဝင်တယ်လို့ ချင်းဒေသခံ သတင်းရင်းမြစ်က ပြောပါတယ်။
စစ်တပ်ဟာ တိုက်ပွဲဖြစ်ပွားမှုမရှိတဲ့ ခေါပွီချိပ်ကျေးရွာကို မနေ့က မွန်းလွဲပိုင်းမှာ လေကြောင်းဗုံးကြဲတိုက်ခိုက်ခဲ့တာပါ။
စစ်တပ်က တိုက်လေယာဉ် ၁စီးနဲ့ ဗုံးကြဲခဲ့လို့ ကလေးငယ် ၆ဦးအပါအဝင် ၇ဦးသေဆုံးကာ ၈ဦး ဒဏ်ရာရခဲ့ပြီး နေအိမ် ၁၀လုံး ပျက်စီးခဲ့တယ်လို့ သတင်းရင်းမြစ်က ခေါပွီချိပ်ရွာ ဗုံးကြဲခံရမှုအတွင်း ထိခိုက်သေဆုံး နောက်ဆုံးအခြေအနေတွေကို ပြောပါတယ်။
Public Service Announcement
ချင်းပြည်နယ်၊ ဖလမ်းမြို့နဲ့ ရိဒ်ခေါ်ဒါမြို့ကြားက ခေါပွီချိပ်ကျေးရွာကို အာဏာသိမ်းစစ်တပ်က မေလ ၁ရက်မှာ လေကြောင်းကနေ ဗုံးကြဲတိုက်ခိုက်အပြီး တွေ့ရစဉ်။ ဓာတ်ပုံ – VOC 
ချင်းပြည်နယ်၊ ဖလမ်းမြို့နဲ့ ရိဒ်ခေါ်ဒါမြို့ကြားက ခေါပွီချိပ်ကျေးရွာကို အာဏာသိမ်းစစ်တပ်က မေလ ၁ရက်မှာ လေကြောင်းကနေ ဗုံးကြဲတိုက်ခိုက်အပြီး တွေ့ရစဉ်။ ဓာတ်ပုံ – VOC 
ချင်းပြည်နယ်၊ ဖလမ်းမြို့နဲ့ ရိဒ်ခေါ်ဒါမြို့ကြားက ခေါပွီချိပ်ကျေးရွာကို အာဏာသိမ်းစစ်တပ်က မေလ ၁ရက်မှာ လေကြောင်းကနေ ဗုံးကြဲတိုက်ခိုက်အပြီး တွေ့ရစဉ်။ ဓာတ်ပုံ – VOC
” ဒီဟာကတော့ သူတို့ စစ်ရှုံးနေတဲ့အချိန်မှာ လက်တုန့်ပြန်တဲ့ပုံစံ၊ လက်စားချေတဲ့ ပုံစံနဲ့ ပြည်သူနေထိုင်တဲ့နေရာ စစ်ရေးပစ်မှတ် မဟုတ်တဲ့နေရာ ကျေးရွာတွေကို သူတို့ လက်စားချေ လက်တုံ့ပြန် လုပ်တာပဲဖြစ်ပါတယ်။ ဒီဟာကတော့ နိုင်ငံတကာ စံချိန် စံနှုန်းအရ War crime (စစ်ရာဇဝတ်မှု)ပေါ့နော် Crime against humanity (လူသားမျိုးနွယ်အပေါ် ကျူးလွန်သော ရာဇဝတ်မှု)ဆိုတဲ့ နိုင်ငံတကာ ဥပဒေကိုလည်း ချိုးဖောက်ရာရောက်ပါတယ်” လို့ ချင်းဒေသခံသတင်းရင်းမြစ်က ပြောပါတယ်။
စစ်တပ်ဟာ ဖလမ်းမြို့ ပြန်ရဖို့ထိုးစစ်ဆင်နေချိန် ၂၀၂၅ နှစ်ကုန်ပိုင်းကတည်းက ဖလမ်းမြို့နယ်က ကျေးရွာတွေကို မကြာခဏ လေကြောင်း တိုက်ခိုက်ခဲ့သလို ၂၀၂၆ ဧပြီနောက်ဆုံးပတ် ဖလမ်းမြို့ ပြန်လည်ထိန်းချုပ်အပြီးမှာလည်း လေကြောင်း တိုက်ခိုက်မှုတွေ ဆက်လက်လုပ်ဆောင်နေပါတယ်။
ဒါ့အပြင် ဖလမ်းကနေ ဟားခါးမြို့ဘက်ကို ဆက်လက်ထိုးစစ်ဆင်နေလို့ ချင်းတော်လှန်ရေးတပ်တွေနဲ့ တိုက်ပွဲဆက်လက်ဖြစ်ပွားနေပြီး ဧပြီ ၃၀ရက် ဖလမ်း-ဟားခါးကြားတိုက်ပွဲမှာ စစ်တပ် အထိနာပြီး တပ်ပြန်ဆုတ်သွားတယ်လို့ ချင်းပြည်ကောင်စီ အဖွဲ့ဝင် ချင်းအမျိုးသားတပ်မတော်(CNF/CNA) ပြောရေးဆိုခွင့်ရှိသူ ဆလိုင်းထက်နီက ပြောပါတယ်။
