အင်း‌တော်စစ်မြေပြင်မှာ ​တော်လှန်​ရေးတပ်တွေအသာစီးရနေ

​မေ-၁၈၊၂၀၂၅။ရွှေပြည်စိုး/People’s Spring

အင်းတော်မြို့အနီးမှာ တိုက်ပွဲဆက်ပြင်းထန်နေပြီး ယမန်နေ့ကဖြစ်ပွားတဲ့တိုက်ပွဲမှာ စစ်သားလေးဦးသေဆုံးပြီး ရုပ်အလောင်းနဲ့လက်နက်တွေသိမ်းဆည်းနိုင်ခဲ့တယ်လို့ စစ်​ရေးသတင်းရင်းမြစ်အချို့က​ပြောပါတယ်။

အင်းတော်မြို့နဲ့ မဲဇာရွာကြားမှာရှိတဲ့ ပေပင်၊ နတ်မဟုတ်ကြီးနဲ့ နတ်မဟုတ်လေးရွာဘက်မှာ တိုက်ပွဲတွေဖြစ်နေပြီး မေလ ၁၇ရက်မှာ ပေပင်ရွာနဲ့ နတ်မဟုတ်လေးရွာအနီးမှာ စစ်ရေးအတင်းမာဆုံးဖြစ်ခဲ့တယ်လို့ဒေသခံသတင်းရင်းမြစ်တွေကပြောပါတယ်။

“စစ်ရေးအဓိကနေရာကိုကိုယ်တပြန်သူတပြန်သိမ်းနေတဲ့ အနေအထားပါ။ မ‌နေ့ကတော့ အလောင်းလေးလောင်းနဲ့ လက်နက်တချို့ရတယ်။ စစ်တပ်က လေယာဉ်နှစ်စီးလာကြဲတယ်”လို့ အထက်ပါ သတင်း ရင်းမြစ်ကပြောပါတယ်။

Public Service Announcement

အင်းတော်မြို့ကို ကချင်လွတ်လပ်ရေးတပ်မ‌တော်(KIA)၊ ကျောင်းသားတပ်မ‌တော်(ABSDF)နဲ့ PDF ပူးပေါင်းတပ်တွေက ၂၀၂၅ ဧပြီလ၇ရက်နေ့မှာသိမ်းယူခဲ့တာပါ။မြို့သိမ်းတိုက်ပွဲမှာတပ်မ(၇၇)တပ်မမှူး ဗိုလ်မှူးချုပ်အောင်သက်ဦးကိုတော်လှန်ရေးတပ်တွေကဖမ်းဆီးနိုင်ခဲ့ပါတယ်။

ပြီးခဲ့တဲ့ ဧပြီလမှာ စစ်တပ်က အင်အားအများအပြားနဲ့တန်ပြန်ထိုးစစ်ဆင်လာပြီးမြို့ပေါ်ကိုပြန်လည်ထိန်းချုပ်ခဲ့ပါတယ် ။မြို့ကိုထိန်းချုပ်ပြီးတဲ့နောက်ဘေးပတ်ဝန်းကျင်ရွာတွေကို စစ်ကြောင်းထိုးဖို့ကြိုးစားနေပြီး PDF ​တွေအပါအဝင်​တော်လှန်​ရေးပူးပေါင်းတပ်တွေကပိတ်ဆို့တိုက်ခိုက်နေတာဖြစ်ပါတယ်။

စစ်တပ်စစ်ကြောင်းတွေဟာ မေလ ၁၃ရက်ညကတည်းက ပေပင်ရွာကနေထွက်လာတာဖြစ်ပြီး ​မေ ၁၈ ရက်နေ့အထိ တိုက်ပွဲတွေပြင်းထန်နေတယ်လို့သိရပါတယ်။

မေလ ၁၃ရက်ညက ပေပင်ရွာဘက်ကနေ မဲဇာရွာဘက်ကို ထွက်လာတဲ့ စစ်ကြောင်းကို ပြည်သူ့ကာကွယ်ရေးပူးပေါင်းတပ်တွေက ပိတ်ဆို့တိုက်ခိုက်ခဲ့လို့ အထိနာပြီး ‌လေကြောင်းကနေ ဗုံးကြဲပြီး ပြန်လည်ဆုတ်ခွာခဲ့ပါတယ်။နောက်နေ့မနက်မေလ၁၄ရက်နေ့မှာလည်း လေကြောင်းကနေဗုံးထပ်ကြဲခဲ့ပါတယ်။

မန္တလေး- မြစ်ကြီးနားကားလမ်းအတိုင်းရှိနေတဲ့ တကောင်း၊ ထီးချိုင့်၊ အင်းတော်နဲ့ ကသာမြို့နယ်တွေမှာ စစ်တပ်စစ်ကြောင်းတွေကို ပြည်သူ့ကာကွယ်ရေးတပ်မ​​တော်နဲ့ ပူး​ပေါင်းတပ်တွေကတိုက်ခိုက်နေပါတယ်။ အဲ့ဒီ စစ်ဆင်ရေးနယ်မြေတွေအတွင်း ဝင်ရောက်လာတဲ့ စစ်တပ်ကို FPV ဒရုန်းတွေနဲ့ တိုက်ခိုက်ချေမှုန်းခဲ့တယ်လို့ အမျိုးသားညီညွတ်ရေးအစိုးရ(NUG)၊ ကာကွယ်ရေးဝန်ကြီးဌာန၊ပြည်သူ့ကာကွယ်ရေးတပ်မတော်(PDF)က မေလ ၁၆ရက်မှာ ထုတ်ပြန်ပါတယ်။

စစ်မှုထမ်းဥပဒေကို အသုံးပြုပြီး စစ်တပ်က အဓမ္မစစ်မှုထမ်းခိုင်းထားတဲ့ ပြည်သူ့စစ်မှုထမ်း(ပစ)တွေကို ​ရှေ့ကတက်ခိုင်းပြီး စစ်မျက်နှာဖွင့်နေပေမယ့် ကာကွယ်ရေးတပ်တွေက တုံ့ပြန်တိုက်ခိုက်မှုတွေကြောင့် စစ်တပ်အင်အား အဆမတန် ပြုန်းတီးထိခိုက်နေတယ်လို့ အသိပေးထားပါတယ်။ ပြည်သူတွေ ယုံကြည်အားကိုးရပြီး ကျစ်လျစ်ခိုင်မာတဲ့တပ်မတော်တရပ်ဖြစ်လာစေဖို့ မဆုတ်မနစ် ကြိုးပမ်းတည်ဆောက်နေတယ်လို့လည်း ထုတ်ပြန်ချက်မှာ ဖော်ပြထားပါတယ်။