စစ်တပ် လိုသလော​က် ပေါ်တာဆွဲပေးမယ်လို့ ပေါက်ကိုယ်တော် ပြော

မေ ၂၀၊ ၂၀၂၆။မေရီ/People’s Spring

အာဏာသိမ်းစစ်တပ်အတွက် စစ်မှုထမ်းပေါ်တာဆွဲတဲ့အလုပ်ကို သူ့လွှဲပေးဖို့နဲ့ စစ်တပ်အလိုရှိသလော​က် ပေါ်တာဆွဲပေးမယ်လို့ ပေါက်ကိုယ်တော်က ပြောဆိုလိုက်ပါတယ်။

အာဏာသိမ်းစစ်တပ်ကို ထောက်ခံပြီး လက်နက်ကိုင်ဆောင်ထားတဲ့ သင်္ကန်းဝတ်ပျူခေါင်းဆောင် ပေါက်ကိုယ်တော်ဟာ စစ်မှုထမ်းပေါ်တာဆွဲတာတွေနဲ့ပတ်သက်ပြီး လူမှုကွန်ရက်ကနေ စစ်တပ်ကို ဝေဖန်ခဲ့ရာမှာ ပေါ်တာဆွဲတဲ့အလုပ်ကို သူ့ကိုတာဝန်ပေးဖို့ တောင်းဆိုလိုက်တာပါ။

“ပေါက်ကိုယ်တော်လွှဲပေးလိုက်။ ပေါ်တာဆွဲပေးမယ်။ ကြိုက်သလောက်ဆွဲပေးမယ်။ ဘုန်းကြီး ပေါ်တာဆွဲတာ ကြိုက်သလောက်ပြောပလေ့စေ။ သေအောင်ပြောပလေ့စေ။”လို့ ပေါက်ကိုယ်တော်က ပြောပါတယ်။

Public Service Announcement

ပေါ်တာဆွဲရာမှာ မမျှတမှုတွေဖြစ်ပေါ်နေတယ်လို့သူကဆိုပြီး ဇာတ်မင်းသားတွေကအစ စစ်မှုထမ်းဖို့ ပေါက်ကိုယ်တော်က ပြော​ပါတယ်။ “အောင်ဇမ္ဗူလည်း စစ်မှုထမ်းရမှာပဲ။ စမ်းရေမိုးလည်း စစ်မှုထမ်းရမှာပဲ။….မကြာခင် စမ်းရေမိုးဇာတ်လာလိမ့်မယ်။ အောင်ဇမ္ဗူဇာတ်လာလိမ့်မယ်။ ကနေတာဗျာ။ ပုထိုးတော်ကြီးတွေမှာ။ ဖိုးချစ်ဇာတ်လာလိမ့်မယ်။ ဆွဲပြမယ်။ ခင်ဗျားတို့သာ တရားဝင်သာခွင့်ပြုလိုက်။ အဲထဲမှာ ဗလကောင်းကောင်းအင်အားကောင်းကောင်းတွေ အကုန်လုံးက။”လို့ ပေါက်ကိုယ်တော်က ပြောပါတယ်။

ဒါ့အပြင် မြန်မာပြည်ဖွား တရုတ်နိုင်ငံသားတွေ၊ မွတ်စလင်တွေပါ စစ်မှုထမ်းဖို့ ပေါက်ကိုယ်တော်က ပြောပါတယ်။

စစ်မှုထမ်းပေါ်တာဆွဲတဲ့အခါမှာလည်း မွတ်စလင်နည်းတယ်။ မပါသလောက်ပါပဲ။ ဦးဇင်းတို့က စစ်မှုထမ်းပေါ်တာဆွဲတာနဲ့ပတ်သက်ပြီး မပြောပါဘူး။ ဟိုးတလောက ရဲမွန်တောင်မှာ တရုတ်တစ်ယောက် စစ်မှုထမ်း အဆွဲခံရတယ်။ ဦးဇင်းကို အကူအညီတောင်းတယ်။ ကျုပ်ကမေးလိုက်တယ်။ အဲတရုတ် မြန်မာနိုင်ငံသားလား။ မြန်မာနိုင်ငံသားပါဘုရား။ မြန်မာပြည်မှာမွေးတာပါဘုရားဆိုတော့ မြန်မာနိုင်ငံသားဆို နိုင်ငံတာဝန်ထမ်းဆောင်ရမှာပေါ့။”လို့ ပေါက်ကိုယ်တော်က ပြောပါတယ်။

ဒါ့အပြင် စစ်ကိုင်းတိုင်းသားတွေလုပ်ကိုင်နေတဲ့ စင်တင်ဆိုင်တွေကိုလည်း စစ်မှုထမ်း ပေါ်တာဝင်ဆွဲဖို့ ပေါက်ကိုယ်တော်က တိုက်တွန်းထားပါတယ်။

အလားတူ စစ်မှုထမ်းပေါ်တာဆွဲခံရသူတွေကို လိုက်လံကူညီနေတဲ့ ငြိမ်းချမ်းရေးဆရာတော်ဆိုသူကိုလည်း စစ်တပ်သိက္ခာကျအောင်မလုပ်ဖို့နဲ့ တကယ်ငြိမ်းချမ်းတဲ့နေရာရောက်သွားမယ်လို့ ပေါက်ကိုယ်တော်က ခြိမ်းခြောက်ထားပါသေးတယ်။