မေ-၂၄၊၂၀၂၆။ထားမြတ်/People’s Spring
စစ်ကိုင်းတိုင်း ကသာခရိုင် ကသာ-နဘားလမ်းပိုင်းကြားမှာ စစ်တပ်ယာဉ်တန်းကို ကချင်လွတ်လပ်ရေးတပ်မတော်(KIA)နဲ့ PDF ပူးပေါင်းတပ်က တိုက်ခိုက်ခဲ့ရာ စစ်တပ်သေဆုံးမှုများရှိခဲ့ပြီး လက်နက်ခဲယမ်းတွေ သိမ်းရခဲ့တယ်ဟု ကချင်စစ်ရေး သတင်းရင်းမြစ်က ပြောပါတယ်။
မေလ၂၄ရက်မနက်မှာ ကသာနဲ့ နဘားလမ်းပိုင်းကြားရှိ ပင်းမလွတ်ရွာနားမှာ တိုက်ပွဲဖြစ်ခဲ့တာလို့ ဆိုပါတယ်။
“ကသာဘက်က တက်လာတဲ့ စခ ကား ၃စီးကို တပ်ပေါင်းစုက ကြားဖြတ်တိုက်ခိုက်တာ စခ ၁၃ယောက်သေ၊ လက်နက်နဲ့ခဲယမ်းများ စစ်အသုံးအဆောင်ပစ္စည်း အများအပြား သိမ်းဆည်းရရှိထားတယ်” လို့ စစ်ရေး သတင်းရင်းမြစ်က ပြောပါတယ်။
Public Service Announcement
လတ်တလောမှာ ကသာခရိုင်းအတွင်း တိုက်ပွဲတွေ ပြင်းထန်နေလို့ တိုက်ပွဲဖြစ်တဲ့ ဒေသက လမ်းပိုင်းတွေ ကို အရပ်သားပြည်သူတွေ အသုံးမပြုဖို့ ကသာခရိုင် ကွပ်ကဲရေးရုံးက မေလ ၂၄ရက်မှာ သတိပေးချက် ထုတ်ပြန်ထားပါတယ်။
စစ်တပ်က အရပ်သားကားတွေ ချောဆွဲတာ၊ အရပ်သားကားများကိုပုံမှားရိုက်ပြီးစစ်လက်နက်ခဲယမ်းပို့ဆောင်နေတာတွေလုပ်နေလို့ထီးချိုင့် ၊ ကသာ ၊ အင်းတော်-နဘား ၊ မော်လူး ၊ နန့်စီးအောင်လမ်းပိုင်းအသုံးပြုနေသော ခရီးသွားပြည်သူများအနေနဲ့မေလ ၂၄ရက်ကစပြီးလမ်းပိုင်းအားအသုံးမပြုကြဖို့ သတိပေးထားတာပါ။
“စစ်ကောင်စီက သွားလာနေတဲ့ ယာဉ်ယန္တရားတွေကို ချောဆွဲ၊ပေါ်တာဆွဲပြီးတော့ အသုံးပြုခြင်း၊ လက်နက်ခဲယမ်းများသယ်ခြင်းပေါ့နော် အဲဒါမျိုးတွေက ဒီဘက်မှာလည်း သတင်းရှိလာလို့ ပစ်ခတ်တဲ့အခါမျိုးရှိလာလို့ရှိရင် ပြည်သူတွေရဲ့ အသက်အိုးအိမ်နဲ့ သူတို့ပိုင်ဆိုင်တဲ့ ယာဉ်ယန္တရားတွေ ဆုံးရှုံးမှာ စိုးရိမ်လို့ပါ” လို့ ကသာမြို့နယ်ကတော်လှန်ရေးတပ်ဖွဲ့ဝင်တဦးကပြောပါတယ်။
အဲဒီဒေသမှာတိုက်ပွဲကနေ့တိုင်းပြင်းထန်နေတယ်လို့သတင်းရင်းမြစ်တဦးကပြောပါတယ်။
အများပြည်သူများထိခိုက်နစ်နာမှာစိုးရိမ်လို့ အခုလို သတိပေးတာဖြစ်ပြီး ပြည်သူများအနေဖြင့်လည်း ဒေသန္တရထုတ်ပြန်ချက်များကို သိရှိပြီး လေးစာလိုက်နာပေးကြဖို့ ပန်ကြားထားပါတယ်။မလိုက်နာလို့ ဖြစ်လာတဲ့ ပြဿနာတွေကို တာဝန်ယူဖြေရှင်းပေးမှာမဟုတ်လို့ အသိပေးထားပြီး လမ်းပိုင်း ပြန်ဖွင့်မယ့်ရက်ကို ပြန်ထုတ်ပြန်မယ်လို့ ဖော်ပြထားပါတယ်။
