မေ-၃၁၊၂၀၂၆။ဇော်ရမ်း/People’s Spring
TNLA ထိန်းချုပ်ထားတဲ့နမ့်ခမ်းမြို့နယ် ၊ကောင်းတပ်ရွာမှာ ဒီကကနေ့ ပြင်းထန်တဲ့ ပေါက်ကွဲမှုဖြစ်ခဲ့ပြီး သေဆုံးဒဏ်ရာရသူတွေများတယ်လို့ ဒေသခံတွေက ပြောပါတယ်။
မေလ ၃၁ ရက်၊နေ့လယ် ၁၂ ခွဲခန့်မှာ ပေါက်ကွဲတာဖြစ်ပြီး နမ့်ခမ်းတမြို့လုံးအပြင်တရုတ်နိူင်ငံ၊ ရွှေလီမြို့ဘက်ခြမ်းကပါကျယ်ကျယ်လောင်လောင် ကြားရတယ်လို့ ဒေသခံအချို့ကပြောပါတယ်။
ပေါက်ကွဲမှုကြောင့်သေဆုံးသူ သုံးဆယ်ကျော်နဲ့ ထိခိုက်သူ တစ်ရာနီးပါးရှိလာပြီလို့လူမှုကူညီကယ်ဆယ်ရေးအဖွဲ့တွေကို ကိုးကားပြီး ဒေသခံအချို့ကပြောပါတယ်။ သေဆုံးဒဏ်ရာရသူအရေအတွက်တွေထပ်မံတိုးနေပြီး နမ့်ခမ်းဆေးရုံမှာ လူနာတွေများနေပြီး သွေးလိုအပ်နေတယ်လို့လည်း အကူအညီတောင်းထားကြပါတယ်။ သေဆုံး ဒဏ်ရာရသူအရေအတွက်ကို လူထုနွေဦးကသီးခြားအတည်မပြုနိုင်သေးပါဘူး။
Public Service Announcement
ပေါက်ကွဲမှုကြောင့်သေဆုံးသူတွေရဲ့ရုပ်အလောင်းတွေကိုသယ်ယူဖို့ပြင်ဆင်နေစဥ် ။ဓါတ်ပုံ-ဒေသခံ ပေါက်ကွဲမှုကြောင့်သေဆုံးသူတွေရဲ့ရုပ်အလောင်းတွေကိုသယ်ယူဖို့ပြင်ဆင်နေစဥ် ။ဓါတ်ပုံ-ဒေသခံ ပေါက်ကွဲမှုဖြစ်ပွားနေစဥ် ။ ဓါတ်ပုံ-ဒေသခံ ပေါက်ကွဲမှုကြောင့်သေဆုံးသူတွေရဲ့ရုပ်အလောင်းတွေကိုသယ်ယူဖို့ပြင်ဆင်နေစဥ် ။ဓါတ်ပုံ-ဒေသခံ
TNLA ကလည်းကောင်တပ်ရွာအနီးပေါက်ကွဲမှုဖြစ်ပွားတာကိုအတည်ပြုပြီး ပေါက်ကွဲရတဲ့ အကြောင်းအရင်း၊ ထိခိုက်ပျက်စီးမှုအခြေအနေနဲ့ အခြားဆက်စပ်အချက်အလက်များကို သက်ဆိုင်ရာတာဝန်ရှိသူတွေကစုံစမ်းစစ်ဆေးလျက်ရှိပြီး အသေးစိတ်အချက်အလက်များကို ဆက်လက်အတည်ပြုနေဆဲဖြစ်တယ်လို့ ထုတ်ပြန်ပါတယ် ။
ဒေသခံပြည်သူတွေအနေနဲ့ မလိုအပ်ဘဲ စိုးရိမ်ထိတ်လန့်မှု မဖြစ်ဖို့နဲ့ လူမှုကွန်ရက်ပေါ်ရှိ အတည်မပြုနိုင်သေးတဲ့ သတင်းအချက်အလက်တွေကို မျှဝေခြင်း မပြုကြဘဲတာဝန်ရှိသူတွေရဲ့ တရားဝင်ထုတ်ပြန်ချက်ကို စောင့်ကြည့်ကြဖို့ အသိပေးထားပါတယ်။ ရှမ်းပြည်နယ်မြောက်ပိုင်းမှာရှိတဲ့နမ့်ခမ်းမြို့နဲ့ နမ့်ခမ်းမြိို့နယ်ကို TNLA နဲ့မဟာမိတ်တွေက ၁၀၂၇ စစ်ဆင်ရေးမှာသိမ်းပိုက်ထိန်းချုပ်ထားတဲ့မြို့ဖြစ်ပါတယ်။
ဒေသတွင်း စီးပွားရေးလုပ်ငန်းရှင်တဦးကတော့ ပေါက်ကွဲတဲ့နေရာဟာ တရုတ်လုပ်ငန်းရှင်တွေလာရောက်ရင်းနှီးမြုပ်နှံထားတဲ့ သတ္တုတူးဖော်ရေးလုပ်ငန်းသုံး ယမ်းချက်စက်ရုံလို့ ပြောပါတယ်။
နမ့်ခမ်းမြို့ခံတဦးကလည်း “ယမ်းတွေထားတဲ့နေရာလို့ ကြားတယ်။ ပေါက်ကွဲတာကလေ အရမ်းကြီးတယ်။ အိမ်နားလေးကပ်ပြီး လေယာဉ်ဗုံးကြဲတယ်ထင်တာ။ အဲ့အနားကလူတွေ ထိခိုက်သေဆုံးများတယ်လို့ ကယ်ဆယ်ရေးလုပ်နေသူတွေကတဆင့် သိရတယ်” လို့ပြောပါတယ်။
ပြင်းထန်တဲ့ပေါက်ကွဲမှုကြောင့် အနီးဝန်းကျင်ကအဆောက်အအုံနဲ့ နေအိမ်များစွာပျက်စီးနေတာကိုလည်းဒေသခံတွေကရိုက်ကူးပြီးလူမှုကွန်ယက်မှာတင်ထားတဲ့ရုပ်သံမှတ်တမ်းတွေမှာတွေ့ရပါတယ်။
ဒါအပြင် ဆယ်နဲ့ချီတဲ့ရုပ်အလောင်းတွေကို လူမှုကယ်ဆယ်ရေးအဖွဲ့တွေက ထုပ်ပိုးနေတာကိုလည်းသတင်းဓါတ်ပုံတွေမှာတွေ့ရပါတယ်။
အခုပေါက်ကွဲမှု ဖြစ်တဲ့ ကောင်းတစ်ကျေးရွာဟာ အိမ်ခြေ ၅၀ ကျော်သာရှိတဲ့ ကျေးရွာလို့ ဒေသခံအချို့က ပြောပါတယ်။
“အရပ်သားပြည်သူလူထုတွေရှိတဲ့နေရာတွေအဲဒီ ပတ်ဝန်းကျင်တွေမှာ လက်နက်သိုလှောင်ရုံတွေ လက်နက်ခဲယမ်းထုတ်လုပ်တဲ့ စက်ရုံတွေမလုပ်တာတော့ အကောင်းဆုံးပါပဲ။” လို့ ဒေသခံ သတင်းရင်းမြစ်တဦးကပြောပါတယ်။
ဒါ့အပြင်အခုပေါက်ကွဲမှုဟာမတော်တဆဖြစ်တာလား ၊ ပြင်ပ ပယောဂတစ်ခုခုကြောင့်လားဆိုတာ စောင့်ကြည့်ရမယ့်အခြေအနေဖြစ်တယ်လို့ဒေသခံ သတင်းရင်းမြစ်အချို့ကပြောပါတယ်။
ပြီးခဲ့တဲ့ ဧပြီ ၇ရက်နေ့ကလည်း ရှမ်းပြည်နယ် မြောက်ပိုင်းဝကိုယ်ပိုင်အုပ်ချုပ်ခွင့်ရဒေသပန်ဆန်းမြို့၊ယောင်းပန်းရွာကျေးရွာမှာရှိတဲ့တရုတ်နိုင်ငံသားပိုင် ယမ်းချက်စက်ရုံ မီးလောင်ပေါက်ကွဲပြီး လူ ၁၇၀ထက်မနည်းသေဆုံးတယ်လို့ သတင်းတွေထွက်ပေါ်ခဲ့ပါတယ်။
