မင်း​အောင်လှိုင်သားရဲ့စီမံကိန်းအနီးရှိ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌အနီးစခန်းလေဆိပ်ကို နိုင်ငံတကာအဆင့်မီ​လေဆိပ်အဖြစ်တိုးချဲ့ဆောက်လုပ်နေ

ဇွန်-၄၊၂၀၂၆။ကတ်သရင်းနှင်း/People’s Spring

အာဏာသိမ်းခေါင်းဆောင် မင်းအောင်လှိုင်ဟာ သားဖြစ်သူရဲ့စီမံကိန်းလုပ်ကွက်အနီးက ပြင်ဦးလွင်မြို့ရှိ အနီးစခန်းလေဆိပ်ကို နိုင်ငံတကာအဆင့်မီ လေဆိပ်အဖြစ် စစ်အုပ်စုကတိုးချဲ့ဆောက်လုပ်နေတယ်လို့ ဒေသခံတွေကပြောပါတယ်။

ပြင်ဦးလွင်မြို့ကအနီးစခန်းလေဆိပ်ကို မန္တလေးမြို့က တံတားဦးအပြည်ပြည်ဆိုင်ရာလေဆိပ်လို ဖြစ်​အောင် အာဏာသိမ်းခေါင်းဆောင်မင်းအောင်လှိုင် အမိန့်နဲ့ ဆောက်လုပ်နေတာလို့ ဒေသခံတွေက ပြောပါတယ်။

အဲဒီနေရာကို ဖေဖော်ဝါရီ နဲ့ မေလက စစ်ခေါင်းဆောင်လာပြီးနောက်ပြေးလမ်းအသစ်​တွေတိုးချဲ့ဆောက်​တာ ၊မြေနေရာချဲ့ထွင်တာတွေပါလုပ်နေပြီးဧရိယာအလွန်ကြီးမားတယ်လို့ မြို့ခံတွေက ပြောပါတယ်။

Public Service Announcement

“သတိထားမိကြတာက မြေတွေ တအားဖို့ပြီး ပြေးလမ်းအသစ်တွေအများကြီးဖြစ်လာမှ အပြင်ဘက်က နေလှမ်းမြင်ရတာ။ ဆောက်တာက တော့ကြာနေပြီ။မြို့အဝင်ကနေ အရှေ့ဘက်တက်တဲ့လမ်းအထိကျယ်တယ်။အဲဒီလမ်းအကပ်နားအထိ ပြေးလမ်းရှိတယ်။မြို့ထဲကနေလှမ်းကြည့်ရသလောက်ဆို စီမံကိန်းက တော်တော်တောင်ပြီးနေပြီ”လို့ ဒေသခံတစ်ဦးက ပြောပါတယ်။

ဒီလေဆိပ်ဟာ ယခင်က စစ်ဘက်သုံး လေဆိပ်သာဖြစ်ပြီး အာဏာသိမ်းခေါင်းဆောင် မင်းအောင်လှိုင်လက်ထက်မှာ အဓိက အသုံးပြုခဲ့တာပါ။

အဲဒီလေဆိပ်အနီးမှာဘဲပြီးခဲ့တဲ့ဖေဖော်ဝါရီအတွင်းမှာ ရတနာပုံဆိုက်ဘာစီးတီး မြို့သစ်စီမံကိန်းဖွင့်ပွဲလုပ်ခဲ့ပြီး မင်း​​အောင်လှိုင်ကိုယ်တိုင်ဖွင့်လှစ်ခဲ့ပါတယ်။ ဖွင့်ပွဲပြီးနောက် မြေဧက ၁၀၀၀ သိမ်းယူကာ မြို့သစ်စီမံကိန်း စတင်နေတာလို့ စုံစမ်းသိရပါတယ်။စီမံကိန်းကို အာဏာသိမ်းခေါင်းဆောင်မင်းအောင်လှိုင်ရဲ့သားဖြစ်သူ အောင်ပြည့်စုံရဲ့ကုမ္ပဏီက အဓိကလုပ်နေတာလို့ စစ်​ကောင်စီနဲ့ နီးစပ်သူ​တွေက​ပြောပါတယ်။

ဒါ့အပြင် အဲဒီစီမံကိန်းအတွက် မြေမလွတ်လို့ဆိုပြီး ပြည်သူတွေရဲ့ အိမ်တွေကို ဇွန်လ ၈ရက်နောက်ဆုံးထားပြီး စစ်အုပ်စုကဖျက်ခိုင်းထားပါတယ်။

စစ်ခေါင်းဆောင်မင်းအောင်လှိုင်ဟာ ပြင်ဦးလွင်မြို့ကို မကြာခဏလာရောက်ပြီး ဈေးတွေဖျက်ပြီး အသစ်ဆောက်ခိုင်းသလို စီမံကိန်းအသစ်တွေ လုပ်ခိုင်းတာလည်းဆက်တိုက်လုပ်နေပါတယ်။