ဇွန်-၇၊၂၀၂၆။ရောင်နီ/People’s Spring
ရန်ကုန်မြို့၊တောင်ဥက္ကလာပမြို့နယ်မှာ အမျိူသမီး ၁ဦး ဓာတ်လိုက်သေဆုံးမှုဖြစ်ခဲ့တယ်လို့ သွားရောက်ကူညီပေးခဲ့တဲ့ မေတ္တာသီတာရေစင်လူမှုကူညီရေးအသင်းက အသိပေးထားပါတယ်။
“မနက်က တောင်ဥက္ကလာ မှာ စိတ်မကောင်းခြင်းများစွာနဲ့ သယ်ရတဲ့ Dead Body ။ဖြစ်စဉ်ကသေဆုံးသွားတဲ့အန်တီက မနက်၇ နာရီဝန်းကျင် လမ်းလျှောက်ပီးအပြန် ဓာတ်လိုက်ပြီးဆုံးသွားတာ” လို့ အထက်ပါပရဟိတအသင်းက ရေးသားထားပါတယ်။
အဲဒီဖြစ်စဉ်က တောင်ဥက္ကလာပမြို့နယ် (၁၅)ရပ်ကွက်မြင်သာ(၁)လမ်းမှာ ဖြစ်ခဲ့တာဖြစ်ပြီး သေဆုံးသွားတဲ့ အမျိုးသမီးရဲ့ သားဖြစ်သူလည်း မိခင်ကို ကယ်ရင်းဒဏ်ရာရှိသွားတယ်လို့ သိရပါတယ်။
Public Service Announcement
ဓာတ်လိုက်ခံရတဲ့ အမျိုးသမီးက အခင်းနေရာမှာ သေဆုံးသွားတာကြောင့် အသင်းရဲ့ လူနာတင်ယာဉ်နဲ့ စံပြဆေးရုံ ရင်ခွဲရုံကို ပို့ဆောင်ပေးခဲ့တယ်လို့ မေတ္တာသီတာရေစင် လူမှုကူညီရေးအသင်းက အသိပေးထားပါတယ်။
ဒဏ်ရာရရှိသူကိုတော့ ဓမ္မစိန်ရောင်လူနာတင်ယာဉ်နဲ့ မြောက်ဥက္ကလာဆေးရုံ သို့ ကူညီပို့ဆောင်ပေးခဲ့တယ်လို့ သတင်းထုတ်ပြန်ထားပါတယ်။
“မိုးတွင်းသတိပြုစရာထဲမှာ မိမိအိမ်ရောမိမိ ပတ်ဝန်းကျင်မှာရော လျှပ်စစ် အန္တရာယ်ကိုသတိရှိကြဖို့ လိုအပ်ပါတယ်။” လို့ အဆိုပါအသင်းကသတိပေးထားပါတယ်။
မြန်မာနိုင်ငံမှာ မိုးရာသီရောက်လာပြီဖြစ်ပြီး ယခုရက်ပိုင်းရန်ကုန်အပါအဝင်ဒေသအများစုမှာ မိုးရွာသွန်းခဲ့ပါတယ် ။ ဓါတ်လိုက်သေဆုံးမှုတွေဟာမိုးရာသီမှာပိုအဖြစ်များပါတယ် ။
