ဇွန်-၁၀၊၂၀၂၆။သုည/People’s Spring
တောင်ကိုရီးယားနိုင်ငံ ဆိုးလ်မြို့ရှိ အိန္ဒိသံရုံးရှေ့မှာ ပြည်ပရောက် မြန်မာ့ဒီမိုကရေစီအရေး လှုပ်ရှားနေတဲ့ အဖွဲ့အစည်းတွေနဲ့ တော်လှန်ပြည်သူတွေ ပူးပေါင်းပြီး အိန္ဒိယအစိုးရအနေနဲ့ မြန်မာစစ်တပ်အပေါ် အသိအမှတ်ပြုဆက်ဆံနေခြင်းနဲ့ စစ်လက်နက်ပစ္စည်းတွေ ထောက်ပံ့ပေးနေခြင်းတို့ကို ကန့်ကွက်ရှုတ်ချတဲ့ သတင်းစာရှင်းလင်းပွဲတစ်ရပ်ကို ဒီကနေ့ (ဇွန် ၁၀) မှာ ပြုလုပ်ခဲ့ပါတယ်။
ယင်းသတင်းစာရှင်းလင်းပွဲမှာ အိန္ဒိယအစိုးရအနေနဲ့ မြန်မာစစ်တပ်ထံ စစ်လက်နက်ပစ္စည်းတွေ၊ စစ်ဘက်နည်းပညာတွေ၊ ရေတပ်သုံးဒီဇယ်နဲ့ လေယာဉ်ဆီ (Jet Fuel) တွေလွှဲပြောင်းထောက်ပံ့နေမှုကို ချက်ချင်းရပ်ဆိုင်းဖို့နဲ့ စစ်ဘက်ဆိုင်ရာ သင်တန်းပေးအပ်နေမှုအား လုံးဝ ရပ်တန့်ဖို့ တောင်းဆိုခဲ့ပါတယ်။
မြန်မာပြည်သူတွေက ငြင်းပယ်ထားတဲ့ စစ်အုပ်စုနဲ့ နိုင်ငံတော်အဆင့် ထိတွေ့ဆက်ဆံမှုများကို ရပ်ဆိုင်းပြီး အမျိုးသားညီညွတ်ရေးအစိုးရ (NUG)နဲ့ ဒီမိုကရေစီအင်အားစုတွေနဲ့ ပူးပေါင်းဆောင်ရွက်ဖို့၊ ရွှေသဘာဝဓာတ်ငွေ့စီမံကိန်း၊ မြန်မာ-တရုတ် ရေနံနဲ့သဘာဝဓာတ်ငွေ့ပိုက်လိုင်းစီမံကိန်းနဲ့ အခြားရင်းနှီးမြှုပ်နှံမှုများမှတဆင့် စစ်အုပ်စုထံ ဝင်ငွေစီးဆင်းနေမှုကို ရပ်ဆိုင်းဖို့ကိုလည်း ဆန္ဒထုတ်ဖော်ခဲ့ပါတယ်။
Public Service Announcement
သတင်းစာရှင်းလင်းပွဲအပြီးမှာ တောင်ကိုရီးယားရောက် မြန်မာပြည်သူတွေက စစ်အာဏာရှင်ဆန့်ကျင်ရေး ကြွေးကြော်သံတွေ ဟစ်ကြွေးခဲ့ကြပြီး အိန္ဒိယအစိုးရအနေနဲ့ ဒီမိုကရေစီနဲ့ လူ့အခွင့်အရေးဆိုင်ရာ ကတိကဝတ်တွေနဲ့အညီ မူဝါဒတွေကို ပြန်လည်သုံးသပ်ကာ မြန်မာစစ်တပ်အား ထောက်ပံ့နေမှုတွေကို ချက်ချင်းရပ်တန့်ဖို့ တောင်းဆိုထားတဲ့ ကန့်ကွက်လွှာအား အိန္ဒိယသံရုံးကို ပေးအပ်ခဲ့ကြပါတယ်။
ဓာတ်ပုံ – ရွေးကောက်ပွဲ ဆန့်ကျင်ရေး ပူးပေါင်းလှုပ်ရှားမှု
